Balki siz bu maslahatlarni biznes-maslahatchilardan yoki boshqa «bilimdon» kishilardan eshitgandirsiz, lekin ularning bari noto'g'ri. Buning ustiga, bunday maslahatlar zararli hamdir. Qiymati 100 million dollar turadigan «Infusionsoft» kompaniyasi asoschisi Kleyt Mask shunday deb ta'kidlaydi. Uning fikriga quloq tutaylik-chi.

Kleytning aytishicha, minglab maslahatlar olishning eng yaxshi yo'li o'z biznesini yo'lga qo'yishdir. Bir tarafdan maslahatlarsiz «Infusionsoft» muvaffaqiyatga erisha olmasdi. Lekin muammo shundaki, bu maslahatlarning aksariyat Kleytga mutlaqo keraksiz bo'lgan, ayrimlari esa zarar ham keltirgan. Kleyt ana shunday beshta zararli maslahatni sanab o'tadi.

1. Xodimlaringizga ruhan bog'lanib qolmang.

Bu erda gap muhabbat haqida ketmayapti. Menga xodimlar va hamkasblar bilan do'stona munosabat o'rnatmaslikni, orada masofa saqlashni maslahat berishgandi. Bunda biror ma'no bordir, lekin menga bu maslahat to'g'ri kelmadi. O'z ishingizni yo'lga qo'yar ekansiz, ko'plab kishilar bilan muloqotda bo'lish imkoniyatiga ega bo'lasiz. O'zingizga yoqadigan insonlar, siz bilan do'stlashganlar bilan ish vaqtingizni o'tkazsangiz, ishingiz yanada yoqimli bo'ladi. Agar xodimlar bilan faqat ish yuzasidangina gaplashaman deb hisoblasangiz, yutqazasiz.

2. O'z bozoringizni kengaytiring

«Infusionsoft» kichik biznesga xizmat ko'rsatish bilan shug'ullanadi, lekin bir necha yil ilgari yirik korxonalar bilan ham aloqa o'rnatish fikri paydo bo'ldi. Menga o'z bozorim chegarasidan chiqishni va yanada ko'plab mijozlarni topishim mumkinligini maslahat berishdi. Lekin men kompaniyaning mazmunini tashkil etadigan narsani o'zgartirolmasligimni o'yladim. Bizning barcha xodimlarimiz kichik biznes bilan ishlashga moslashishgan va men ularning kuchini ketkazishni, zo'riqtirishni istamayman. Men ichki tuyg'umga quloq solib bu fikrdan voz kechdim va oqibatda boshqalarga nisbatan ko'proq muvaffaqiyatga erishdim.

3. Mijozlarga xizmat ko'rsatishni avtomatlashtiring

Yuqori texnologiyalar sanoatida mijoz bilan xodim muloqotini imkon boricha kamaytirishga harakat qilinmoqda. Bu xizmat ko'rsatish bo'limlarida iqtisod qilish imkonini beradi. Balki bu yirik firmalarga xizmat ko'rsatadiganlar uchun yaxshi maslahatdir, lekin bizning mijozlarimiz yordamimizga muhtoj va buning uchun haq to'lashga tayyor. Ehtiyot bo'ling. Xizmat ko'rsatishni avtomatlashtiraman deb mijozlarni norozi qilib qo'ymang.

4. Biznesingizga oilangiz va do'stlaringizni jalb etmang

Men «Infusionsoft»ni ukalarim bilan boshlaganman. Odamlar bu haqda bilishganida ishonchsizlik bilan qarashdi. Aftidan, hamma oila a'zolar bilan boshlangan biznes hech qachon «kichkinagina oilaviy tadbirkorlik» chegarasidn chiqa olmaydi degan fikrda. Lekin men do'stlar va oila a'zolari bilan ishlash yaxshi fikr deb hisoblayman. Do'stlar va oila a'zolari o'rtasidagi ishonch eng qiyin vaqtlarda sizga yordam beradi. Va bu juda muhim. O'z ishingizni boshlaganingizda sizni qo'llab-quvvatlovchilar kerak bo'ladi.

5. Kredit olmang

Men shaxsiy qarzlarni yoqtirmayman, lekin biznesda rivojlanish uchun chetdan mablag' olish uchun sabablar etarli. Kredit evaziga kompaniya ishi rivojlanishini tezlashtirish mumkin. Agarda oladigan kreditingiz mijozlaringiz, xodimlaringiz, sheriklaringiz va aktsionerlaringiz uchun foyda keltiradigan bo'lsa, u holda bunga jiddiy qarash kerak. Men yillik daromadi 500 mingdan uch million dollargacha bo'lgan, doim kredit olishdan qochadigan tadbirkorlarni ko'p uchrataman. Menimcha, aksariyat hollarda bu xato, chunki u imkoniyatlarni cheklab qo'yadi. Agar biznes mustahkam oyoqqa turib olgan bo'lsa va muntazam ravishda rivojlanib borayotgan bo'lsa, yanada rivojlanish uchun kredit olish qo'rqinchli emas.

 

Kleyt o'z fikrlarini maslahatlarni yaxshi yoki yomonga ajratish oson emasligi haqidagi so'zlari bilan yakunlaydi. Yuqorida keltirilgan noto'g'ri maslahatlar kim uchundir ajoyib g'oya bo'lishi mumkin. Hech kimning maslahatini kelajagingizni belgilab beruvchi haqiqat sifatida qabul qilmang. Har bir biznes o'ziga xos va siz ko'proq o'z fikringizga suyaning.