O'zbekiston chempionatining 3-turidan o'rin olgan uchrashuvda Samarqandning «Dinamo» klubi Toshkentda «Paxtakor» mehmoni bo'lib 1:0 hisobidagi g'alaba bilan qaytdi.
Ushbu natija orqali samarqandliklar Oliy liganing bu mavsum startida ketma-ket 3-g'alabani qo'lga kiritdi va natijada barcha davrlardagi eng yaxshi startini qayd etdi. «Dinamo» hali Oliy liganing biror bir mavsumini ketma-ket uchta g'alaba bilan boshlamagandi.
Bungacha «Dinamo»ning eng yaxshi starti 1999 yilgi mavsumda kuzatilgandi. O'shanda «Samarqand» nomi ostida musobaqalarda ishtirok etgan jamoa dastlabki uchta turda 7 ochko to'plagandi. O'shanda ham 3-turda jamoa «Paxtakor»dan ustun kelgandi(shuningdek, «Navbahor» mag'lub etilgan, «Neftchi» bilan durang).
Ammo 1999 yilgi mavsum jamoa uchun eng yaxshi startligicha qolmoqda. Samarqandliklar o'sha mavsumning dastlabki 6 turida 16 ochko (5 g'alaba, 1 durang) to'plashga muvaffaq bo'lgan. Jamoa chempionat yakunida 5-o'rinni qo'lga kiritgandi.