O'tgan mavsumda to'rtinchi o'rinni egallagan «Buxoro» o'z maydonida Toshkentning «Obod» jamoasini qabul qilib, kutilmaganda mag'lubiyatga uchradi.
Uchrashuvning 63-daqiqasida G'ayrat Umirov kiritgan yagona gol «Obod»ga safarda muhim g'alaba keltirdi. Bu toshkentliklar jamoasining mavsumdagi ilk g'alabasi bo'ldi.
Bu turda Qashqadaryo viloyatining ikki jamoasi to'qnashdi. «Sho'rtan» «Mash'al»ni qabul qilib, 0:2 hisobida yutqazdi. Mehmonlar jamoasi safida Rahmonov penaltidan, Zafar To'raev esa o'yindan gol kiritdi. Muborakliklar o'yinda bir kishi kam bo'lib qolgandi, ikkinchi bo'limda Qo'ziboev maydondan chetlatilgandi.
«Qo'qon-1912» hamda «Qizilqum» klublari o'rtasidagi uchrashuvda mezbonlarning 1:0 hisobidagi g'alabasi qayd etildi. O'yinda yagona gol 51-daqiqada Rayevats tomonidan kiritildi. Ushbu g'alabadan keyin qo'qonliklar 4 ochko bilan 7-o'ringa joylashdi.
«So'g'diyona» hamda «Olmaliq» klublari o'rtasidagi uchrashuvda mezbonlar 3:2 hisobida g'alabaga erishdi. Bu jizzaxliklar jamoasining mavsumdagi ilk g'alabasi va ilk ochkolari bo'ldi.