«Real» hujumchisi Karim Benzema Frantsiya terma jamoasining JCh-2018 saralashi doirasida 25 mart kuni Lyuksemburg, 28 mart kuni Ispaniya terma jamoalariga qarshi o'yinlari uchun tarkibidan joy olmaganiga munosabat bildirdi.
«Bu adolatsizlik, men bu safar ham Frantsiya milliy terma jamoasi safiga chaqirishmadi. «Real»dek katta jamoa safida o'ynab turib, terma jamoadan taklif olmaslikni tushunish qiyin. Milliy terma jamoa safida maydonga tushish – hamisha katta sharaf. Men futbolni sevaman, shuning uchun bu safar ham terma jamoadan chaqiruv olgan futbolchilar ro'yxatida yo'qligim meni qayg'uga soladi.
Men buni adolatsizlik sifatida baholayman va buning uchun izoh talab qilaman. Meni Frantsiyani sevmaydi deganlar adashadi. Meni Valbuena bilan bog'liq mojaro tufayli chetlatishdi, ammo men bu ishda aybdor bo'lib chiqmadim. Lekin buning uchun hamon to'lamoqdaman», — deya Benzemaning so'zlarini keltirgan Marca.
Benzema oxirgi marta 2015 yilining oktyabrida, Armanistonga qarshi o'yinda Frantsiya terma jamoasi tarkibida maydonga tushgandi. U Mate Valbuenaga shantaj qilinishi bo'yicha mojaroga aralashib qolgach, terma jamoaga chaqirilmay qo'ygandi. Frantsiya futbola federatsiyasi rahbari Noel Le Gre ma'lum qilgandiki, Benzemaning chaqirilishi bo'yicha taqiq yo'q, ammo qarorni bosh murabbiy Dide Desham qabul qiladi.
Frantsuzlar Benzema terma jamoaga qaytishini istamayapti
Frantsiya terma jamoasiga chaqirilgan futbolchilar. Benzema bu ro'yxatdan o'z nomini uzoq izladi