23 mart kuni 2018 yilgi jahon chempionati saralashining uchinchi bosqichidagi Osiyo jamoalari 6-tur o'yinlarida maydonga tushdi.
«A» guruhi
«A» guruhidagi har uch uchrashuvda 1:0 hisoblari qayd etildi. Avvaliga Xitoy Janubiy Koreyani o'z maydonida engdi, bu o'yindan yarim soat keyin tugagan Suriya va O'zbekiston bahsi mezbon maqomidagi suriyaliklar g'alabasi bilan yakunlandi, uchinchi bellashuvda Eron Qatar maydonidan 3 ochko bilan qaytdi.
Endilikda Eron terma jamoasi hisobidagi ochkolar soni 14taga etdi va Keyrush shogirdlari Rossiya mundialiga yana bir qadam yaqinlashdi. 5 o'yinda minimal hisobda g'alaba qozonib, Suriya bilan durang o'ynagan eronliklarda 6 uchrashuvdan keyin to'plar nisbati 5:0.
Janubiy Koreya Xitoyga safarda yutqazdi va terma jamoa 10 ochkosi bilan ikkinchi o'rinda qolmoqda. Marchello Lippi bilan ikki o'yinda 4 ochko olgan Xitoy esa 5 ochko to'plagan holda Qatardan oldinga o'tib, beshinchi o'ringa joylashdi.
O'zbekiston ketma-ket muvaffaqiyatsizliklardan keyin JCh-2018 yo'llanmasini deyarli qo'ldan chiqardi. Ayni vaqtda Samvel Babayan jamoasi 9 ochko bilan uchinchi o'rinda joylashgan bo'lsada, oldinda Xitoy va Eronga qarshi safar o'yinlari, Qatar va Janubiy Koreyaga qarshi uy o'yinlari kutmoqda. Jamoa uchinchi o'rinni saqlab qolsada, pley-offning birinchi bosqichida parallel guruhdagi uchinchi o'rin egasi bilan o'ynashiga to'g'ri keladi. Bu esa katta ehtimol bilan Avstraliya bo'ladi.
7-tur o'yinlari 28 mart kuni bo'lib o'tadi. Qatar O'zbekiston bilan o'yin uchun Toshkentga tashrif buyuradi. Eron esa Tehronda Xitoyni qabul qiladi. Janubiy Koreya o'z maydonida Suriya bilan bahslashadi.
«B» guruhi
Avstraliya Iroqqa safar qilib, 1:1 hisobida durang o'ynab qo'ydi. Bu «sokkerouz» uchun ketma-ket to'rtinchi durang natija va jamoa 10 ochko bilan uchinchi o'ringa tushib ketdi. Iroq esa guruh autsayderlaridan biri, iroqliklar atigi 4 ochko bilan beshinchi o'rinda joylashgan.
Guruhda Yaponiya va Saudiya Arabistoni 13tadan ochko jamg'arib peshqadamga aylangan.
5 turda BAA ustidan 3:0 hisobida zafar quchgan Saudiya Arabistoni bu turda Tailandni shu hisobda taslim qildi. Saudiyaliklar endi to'plar nisbatiga ko'ra birinchi o'rinda, Tailand 1 ochko bilan so'nggi pog'onada qolmoqda.
Yaponiya birinchi davrada BAAga yutqazgandi, 5-turda 2:0 hisobidagi g'alaba qayd etildi. Kunchiqar yurt vakillari bu safar ham mundialdan quruq qolmasligi oydinlashmoqda.
Guruhda 28 mart kuni bo'lib o'tadigan 7-tur uchrashuvlaridagi juftliklar shunday ko'rinish olgan: Avstraliya — BAA, Yaponiya — Tailand, Saudiya — Iroq.
Bosh sahifaga
201