O'zbekiston chempionatining 4-turidan o'rin olgan «Obod» – «Bunyodkor» jamoalari uchrashuvidan keyin «qaldirg'ochlar» ustozi Sergey Lushchan o'yin borasida fikrlari bilan o'rtoqlashdi.
«Uchrashuv haqida nima deyishga ham xayronman. Bugun maydonda bitta jamoa o'ynadi. Ha, bu shubhasiz – «Obod». Bizning yigitlar esa og'ir uchrashuvdan keyin tiklanish jarayonini o'tkazishayotgandek ko'rindi. Ochig'ini buni boshqacha ta'riflay olmadim.
Terma jamoalarga nomzod bo'lgan etti nafar futbolchimizni kecha ko'rdim. Shu boisdan ham boshqacha uslubda o'ynashga to'g'ri keldi. Bugun 5-3-2 sxemasini tanladik. Bu taktikada avval ham o'ynaganmiz.
37-daqiqadan keyin uslubimizni o'zgartirdik. Hisobni tenglashtirganimizdan keyin o'yinimiz biroz ko'zga ko'rindi va o'zimizga o'xshadik», - degan Sergey Lushchan «Bunyodkor» rasmiy sayti xabarida.