Oliy liganing 4-turidan o'rin olgan «Nasaf» va «So'g'diyona» jamoalari uchrashuvidan (4:0) keyin qarshiliklar ustozi Ro'ziqul Berdiev o'z fikrlarini bildirib o'tdi.
«Raqibga bosim o'tkaza oldik. Ularni xato qilishga majbur qildik. Birinchi bo'lim o'rtalarida o'yinimizni bo'shashtirib yubordik. Raqib esa bundan foydalanishga harakat qildi va vaziyatlar yaratishga urindi.
G'alaba haqli ravishda qo'lga kiritildi deb o'ylayman. Hisob bundan ham yirikroq bo'lishi mumkin edi. Ammo shogirdlarim bir qancha vaziyatlardan unumli foydalana olishmadi. Bugun yigitlar maydonda erkin harakat qilishdi.
Biz jamoaviy o'yin namoyish etamiz. Maydonga tushgan barcha o'yinchilarimiz o'zlariga yuklatilgan vazifalarni to'liq ado etishdi. Bugungi g'alabaga hamma birdek hissa qo'shdi.
Jarohati tufayli keyingi paytlarda Farruh Sayfiev xizmatidan foydalana olmayapmiz. Shukrki, u hozir umumiy guruh mashg'ulotlariga qaytdi. Umid qilamanki, keyingi o'yinlarimizda u maydonga tushishga tayyor bo'lib qoladi. Eldorbek Suyunov ham hozir to'liq mashg'ulotlarda ishtirok etmoqda. U maydonga tushishga tayyor. Keyingi o'yinlarda u bizga albatta yordam beradi» - deya Berdievning so'zlarini keltiradi klub rasmiy sayti.
Bosh sahifaga
248