Oliy liganing 4-turida «Qizilqum» Navoiyda «Buxoro»ni qabul qiladi.
Bu jamoalar shu kungacha milliy chempionatlarimiz tarixida jami 32 marta o'zaro kuch sinashgan. Shulardan 16tasida «Qizilqum» futbolchilari g'alabaga erishishgan. To'rtta o'yinda esa tomonlar murosa ko'chasini tanlashgan. Qolgan 12 uchrashuvda esa omad buxoroliklarga kulib boqqan.
O'zaro o'tkazilgan bahslarda darvozalarni ishg'ol etish borasida ham ustunlik navoiyliklar tomonida — 49:37.
Navoiyda (Zarafshonda) kechgan uchrashuvlarda mezbonlar 9 marta g'alaba qozonishgan. O'tgan yilgi mavsumga qadar «Buxoro» Navoiydan 12 yildan buyon g'alaba bilan qayta olmay kelayotgandi. 2016 yilda eng yaxshi mavsumlaridan birini o'tkazgan buxoroliklar 12 yillik noxush an'anaga barham berishga ulgurdi. Bungacha jamoa 2004 yilda «Qizilqum»ni mehmonda mag'lubiyatga uchratgandi.
Jami bo'lib Buxoroliklar Navoiydan to'rt marotaba g'alaba bilan qaytishgan. uchta uchrashuvda g'olib nomi aniqlanmay qolgan.