«Sanderlend» bosh murabbiyi Devid Moyes VVS jurnalisti Viki Sparksga nisbatan qilgan qo'polligi uchun kechirim so'radi. Bu haqda The Telegraph nashri xabar tarqatmoqda.
Manbaga ko'ra, jurnalist ayol murabbiyga APL 29-turidan o'rin olgan «Byornli»ga qarshi uchrashuvida «Sanderlend» xo'jayini Yellis Shortning stadionga tashrif buyurishi Moyesning kelajagini so'roq ostiga qo'yadimi, degan savol bilan murojaat qilganidan so'ng shotlandiyalik mutaxassisning jahli chiqib ketgan va unga tarsaki tushirib qolishi mumkinligi bilan do'q qilgan.
«Bu juda qo'pol gap bo'ldi, o'zingga yehtiyot bo'lishingga to'g'ri keladi. Ayol kishi bo'lishingga ham qarab turmayman, tarsaki yeb qolishing mumkin. Keyingi safar savol berayotganingda yehtiyot bo'l», degan Moyes.
Sparks 53 yoshli murabbiyning ustidan hech qaerga shikoyat qilmagan. Ammo jurnalist ayolning ishxonasi VVS Moyesni muxbirni qo'rqitishda ayblab chiqqan.
Keyinroq Moyes ayolga qo'ng'iroq qilib, kechirim so'ragan. Sparks ham, VVS ham murabbiyning uzrini qabul qilishgan.