«Navbahor» – «Mash'al» jamoalari o'rtasidagi uchrashuvdan (1:0) so'ng muborakliklar ustozi Aleksandr Xomyakov o'yin va bu yilgi chempionat borasida o'z fikrlarini bildirib o'tdi.
«Bugun ancha jonli o'yin bo'ldi. Maydonda keskin kurash kechdi. Bizni Namanganda nimalar kutayotganligini yaxshi bilardik. Umuman olganda o'yinimiz chiqmadi deb ayta olmayman. Ayni paytda meni faqatgina natija qoniqtirmadi xolos. Birinchi bo'limda munosib tarzda himoyalanishni uddasidan chiqdik. Tanaffusdan keyin ham ayrim vaziyatlarni inobatga olmaganda yomon himoyalanganimiz yo'q. Lekin, qarshi hujumdagi o'yinimiz ko'ngildagidek chiqmadi. Bir so'z bilan aytganda natijani inobatga olmaganda jamoamiz maydonda yomon taassurot qoldirmadi. Futbolchilarimizda o'ziga bo'lgan ishonch ham sezildi.
Chempionatda hozircha yaqqol etakchi jamoa ko'zga tashlanmayapti. Barcha qatnashchilar deyarli teng kuchga ega. Har bir jamoa qanday o'yin bo'lishidan qat'iy nazar ochkolar zaxirasini boyitishga harakat qilmoqda. Bunday tenglikni yuzaga kelishiga birinchi navbatda ko'p o'zbekistonlik futbolchilarning xorijda faoliyatini davom ettirayotgani sabab bo'lmoqda. Bunday sharoitda chempionat saviyasi tushib ketishi mumkinligidan xavotirlangandim. Lekin, amalda bunday bo'lmadi. Xorijga yo'l olgan mahalliy futbolchilar o'rni legionerlar bilan to'ldirildi.
Chindan ham bu yilgi mavsum keskin va murosasiz ruhda o'tmoqda. Bu muxlislarning ham katta qiziqishi sabab bo'lishi mumkin. Mavsumning qolgan qismida ham shunday holat kuzatiladimi yoki yo'qmi buni vaqt ko'rsatadi», deya Xomyakovning so'zlarini keltiradi «Navbahor» rasmiy sayti.
Bosh sahifaga
254