Oliy liganing 5-turidan o'rin olgan «Olmaliq» - «Nasaf» uchrashuvidan (1:0) keyin mehmonlar bosh murabbiyi Ro'ziqul Berdiev o'yin haqida fikrlarini bildirdi.
«Olmaliq»ni g'alaba bilan tabriklayman. Ular xatolarimizni kutib o'ynadi va xatolarimiz uchun bizni jazolashdi. Olmaliqliklar yaxshi himoyalanishdi. Bizda imkoniyatlar bo'ldi. Ammo vaziyatlarni golga aylantira olmadik.
Odil Hamrobekov ikkita o'yinda to'liq harakat qildi. Shuning uchun uni zaxirada qoldirgandik. Asosiysi bizda 3 ta tayanch yarim himoyachisi bor. Ularning barchasiga imkon berayapmiz. Bugungi o'yinni Rahmatullaev va G'anievga ishonib topshirgandik. Keyingi uchrashuvlarda Hamrobekov to'liq yordam beradi.
Shahboz Erkinov kecha mashg'ulotlarda jarohat oldi. Uning yo'qligi ham bugun bilindi. Hujumda o'ynagan Bobir Abduholiqov ozgina yoshlik qildi. Eldor Suyunov jarohatidan forig' bo'ldi. Keyingi o'yinlarda u maydonga tushadi.
Bugun g'alabaga loyiq o'yin ko'rsatmadik. Bugun g'alaba qozonganimizda birinchi o'ringa ko'tarilib olishmizni bilar edik. Lekin bunday o'yin bilan u pog'onaga chiqib olish ancha qiyin», - deya Berdievning so'zlarini keltiradi klub rasmiy sayti.