«Milan»ning Li Yonxong rahbarligidagi xitoyliklar va amerikaliklar konsortsiumiga (Sport Investment Lux) sotilishi jarayoni yakunlandi. Bu haqda Football Italia xabar tarqatdi.
13 aprel kuni o'tkazilgan uchrashuvda yendilikda «Milan»ning sobiq xo'jayini Silvio Berluskoni klub aktsiyalarining 99,93 foizini sotgan. Savdoning umumiy qiymati 740 mln yevroga baholangan.
Silvio Berluskoni «Milan»ni 1986 yilning fevralidan buyon boshqarib keldi. Berluskoni davrida rossonerilar 8 marta Italiya chempionatida, bir marta Italiya Kubogi finalida, 7 marta Italiya Superkubogida g'olib chiqdi. Shuningdek, jamoa Chempionlar Ligasida 5 marta, UEFA Superkubogida 5 marta, Qit'alararo Kubokda ikki marta va klublar o'rtasidagi jahon chempionatida g'alaba qozongan.