Bu yilgi oliy ligamizning ikki turi ortda qoldi va anna shu ikki turda ham mag'lub bo'lgan, Muboarakning “Mash'al” klubining 90-raqamdagi hujumchisi Zafar To'raev bilan bog'landik va suhbatlashdik. -Zafar mana oliy liga boshlandi va ikki tur ortda qoldi. Jamoa ana shu ikki turda ham mag'lub bo'ldi, sizningcha bunga asosiy sabab nima? -Aslida biz startni yaxshi boshlagandik Navoyida bir emas ikki bor gol kiritdik, ammo darvozamizga belgilangan ikkita penalti bizni g'alabadan mahrum qildi. Biz hali hech narsa yo'qotmadik, mavsum endi boshlandi. – “Mash'al” jamoasi orta qolgan ikki turda o'z darvozasidan olti marotaba to'p olib chiqdi. Raqiblari darvozasiga esa uch marotaba yo'l topishdi. O'tkazib yuborilgan gollarda kimning aybi ko'proq, darvozabonnimi yoki himoyachilarni? -Yo'q nega endi, futbol bu jamoaviy o'yin o'tkazib yuborilgan gollarda darvozabon yoki himoyachilarni ayblash noo'rin. Bu mag'lubiyatlarimizda hammamiz birdek aybdormiz, hech bir jamoa yoki futbolchi mag'lub bo'lish uchun maydonga tushmaydi. O'z maydonimizda “Metallurg”ga mag'lub bo'lganimiz, muxlislarimizni ham juda ranjitdi. Buni hammamiz sezib turibmiz. Ammo hali biz muxlislarimiz oldida o'zimizni oqlaymiz. -Maydonlaringizda bo'lgan yana bir o'yin bu “Mash'al-2” bilan bahsdir, bu o'yinda sizlar jiddiy qarshilikka uchradinglar, ko'pchilik bu bahsda “Mash'al-2” osonlikcha taslim bo'ladi deb, o'ylashgandi. Ammo sizlarga bu bahs juda qiyin kechdi? -Ha to'g'ri aytasiz, “Mash'al-2” bu o'yinga ancha yaxshi tayorgarlik ko'rgan ekan. Chindan ham bizga ancha qiyin bo'ldi, yoshlarimiz bizga osonlikcha taslim bo'lishgani yo'q, o'yin penaltilargacha borgani bu bahs qanday o'tganligidan dalolat berib turibdi. Bu albatta bir tomndan quvonarli hol, chunki bular bizning o'rinbosarlarimizdir. Ikkinchi tomondan bu uchrashuv bizni navbatdagi o'yinlarga har qachongidan puxtaroq tayyorgarlik ko'rishimizni anglatdi. -Oliy ligada bu yil qaysi jamoani favorit deb bilasiz? -Men bu yil hech ikkilanmay bu mavsumning favoriti “Nasaf” degan bo'lardim. Chunki “ajdarlar” o'tgan ikki turda yuz foizlik natija qayd etishdi, qolaversa OChLda eng kuchli jamoalarga qarshi ko'rsatgan o'yinlari fikrimni tasdiqlaydi. – Siznigcha “Nasaf” OChL guruh bosqichidan o'ta oladimi? – “Nasaf” juda yaxshi shakllangan jamoa, ularning bu yilgi OChL uchrashuvlaridagi o'yinlari hammaga ma'qul bo'ldi deb, o'ylayman, afsuski o'tgan uchrashuvdagi birgina kichik omadsizlik ularni ochkodan mahrum qildi. Umid qilardimki, ular Qarshida bo'ladigan navbatdagi uchrashuvda g'alaba qozonishsa, bu ular uchun guruhdan chiqishlariga imkon yaratgan bo'lardi. – Zafar “So'g'diyona”ga qarshi kubok bahsiga qanday tayyorgarlik ketmoqda? – Tayyorgarlik bir maromda ketmoqda, biz bu bahsda g'olib chiqmasak bo'lmaydi. Muxlislarimiz ko'z o'ngida o'ynaymiz va ijobiy natija qayd etishimiz shart deb, hisoblayman. – Jamoaga yangi kelgan futbolchilar xususida nima deya olasiz? – Yangi jamoadoshlarimiz ham astoydil harakat qilishmoqda, o'ylaymanki ular ham hali o'z o'yinlarini topib ketishadi, bunga men albatta ishonaman. Suhbatni Dilshod Safarov yozib oldi.  
— deya xabar beradi uff.uz nashri.