Bugun, 24 mart sanasida Toshkentdagi “Bunyodkor” stadionida 2018 yil Rossiyada o'tkazilishi rejalashtirilgan Jahon chempionati ikkinchi saralash bosqichi doirasida O'zbekiston milliy terma jamoasi Filippinga qarshi maydonga tushadi. Jahon chempionati-2018 hamda Osiyo Kubogi-2019 qo'shma saralashining “H” guruhidan o'rin olgan ushbu jamoalar o'rtasidagi dastlabki uchrashuv 2015 yilning 8 sentyabr kuni bo'lib o'tgan edi. Filippin poytaxti manilada bo'lib o'tgan o'sha o'yinda Samvel Babayan boshchiligidagi O'zbekiston milliy terma jamoasi yirik — 5:1 hisobida g'alalaba qozongandi. Sardor Rashidov hamda Igor Sergeevning dubllari, shuningdek, Odil Ahmedov kiritgan gol O'zbekistonning yirik g'alabasini ta'minlagandi. Bu — ushbu jamoalar o'rtasida shu vaqtgacha o'tkazilgan birinchi o'yin edi. Unga qadar O'zbekiston va Filippin o'zaro to'qnash kelmagan. O'zbekiston milliy terma jamoasi bu o'yinga tayyorgarlik ko'rish uchun o'quv-mashg'ulot yig'inlariga 17 mart kuni kirishgan edi. Yig'inga O'zbekiston milliy terma jamoasi murabbiylar shtabi avvaliga 29 nafar futbolchini jalb etdi. Keyinroq, Doston Hamdamov hamda Jaloliddin Masharipovga salomatligi borasidagi muammolar sabab ruxsat berib yuborildi. Keyinroq ushbu o'yin uchun Samvel Babayan 23 futbolchidan iborat tarkibni ma'lum qildi. Ta'kidlash kerakki, Birlashgan Arab Amirliklarining “Ash-Shabob” klubi a'zosi Azizbek Haydarov diskvalifikatsiya tufayli Filippinga qarshi o'yinda ishtirok eta olmaydi. Yig'in davomida o'tkazilgan mashg'ulotlardan fotosuratlarni O'FF rasmiy saytining fotogalereya bo'limi orqali yoki O'zbekiston futbol federatsiyasi matbuot xizmatining Facebook hamda Instagram ijtimoiy tarmoqlaridagi rasmiy sahifasi orqali tomosha qilish mumkin. Kecha, 23 mart kuni har ikki jamoa bosh murabbiylari ishtirokida matbuot anjumani bo'lib o'tdi. Unda murabbiylar o'yin oldi fikrlari bilan o'rtoqlashdi. Filippin terma jamoasi bosh murabbiyi Tomas Duli: “Men realistman va bilamanki, O'zbekiston — guruhdagi eng kuchli jamoa. Guruhimiz ham saralash bosqichidagi eng qiyinlaridan biri. Bundan tashqari saralash o'yinlari davomida juda uzoq vaqtni oladigan parvozlarni amalga oshirishga to'g'ri keldi. Bu ham jamoaning jismoniy holatiga ta'sir qiladi. Shularning barchasini hisobga olib aytishim mumkinki, erataga osonlikcha ochko qo'lga kirita olmaymiz. Lekin o'yindan faqat yaxshi natija kutaman”. O'zbekiston terma jamoasi bosh murabbiyi Samvel Babayan: Ertangi raqibmizga hurmat bilan qaraymiz. Kuchli mutaxassisga ega bo'lgan yaxshi jamoaga qarshi o'ynaymmiz. Ertaga tartibli harakat qilib, o'z o'yinimizni namoyish etishimiz va muxlislarni hursand qilishga intilamiz. Manilada 5:1 hisobida g'alaba qozonganimizga qaramay, ertaga o'yin oson kechadi deb o'ylamayman. Avvalgi o'yinimizda yirik hisobda g'alaba qozonganimizdan keyin ular Shimoliy Koreya bilan durang natija qayd etdi. Raqib o'ziini yaqqol autsayder deb atayotgan bo'lsa-da, aslida unday emas”. Shuningdek, 23 mart kuni jamoalar uchrashuv oldidan rasmiy mashg'ulotlarini ham o'tkazishdi. Rasmiy mashg'ulotdan fotolavhalarni ham O'FF rasmiy saytining fotogalereya bo'limi orqali yoki O'zbekiston futbol federatsiyasi matbuot xizmatining Facebook hamda Instagram ijtimoiy tarmoqlaridagi rasmiy sahifasi orqali tomosha qilish mumkin. Eslatib o'tamiz, O'zbekiston – Filippin uchrashuvi, bugun, 24 mart kuni, soat 18:00da start oladi. Uchrashuv “Bunyodkor” stadionida bo'lib o'tadi.
— deya xabar beradi uff.uz nashri.