JCh-2018 saralashi doirasida O'zbekiston va Filippin terma jamoalari o'rtasida kechgan o'yin yakuniga etgach, raqib jamoa bosh murabbiyi Tomas Dyuley matbuot anjumanida ishtirok etdi va jurnalistlar savollariga javob qaytardi.
- Men eslashni juda ham yoqtirmaydigan avvalgi o'yinga taqqoslaydigan bo'lsak, bu safar bizning futbolchilar juda yaxshi harakat qilishdi. Biz 10 daqiqadayoq bir kishi kam bo'lib qoldik, ammo buni bildirmadik. Jamoamiz kamchilik bo'lib ham juda yaxshi o'ynadi. Ular bilan faxrlanaman. Qizil kartochkaga keladigan bo'lsak, aslida o'sha vaziyat chetlatishga tortmas edi. Aftidan hakam futbolchimizning avvalgi ikkita qo'polligi tufayli shunday jazo chorasi qo'lladi. Bugun O'zbekistonga 40 mingga yaqin muxlis yordam berdi. Bunday vaqtda juda og'ir ahvolga tushasan. Bugun darvozabonimiz ajoyib o'yin namoyish qildi. Umuman olganda jamoamiz o'yinidan juda qoniqdim.
- Oxirgi o'n daqiqada raqib o'yinini darvozangizdan uzoqlashtirishga muvaffaq bo'ldingiz. Nima uchun shu ishni ertaroq bajarmadingiz?
- Albatta O'zbekiston terma jamoasini jarima maydonchasidan uzoqroqdan kutib olib o'ynash mumkin. Ammo bizning asosiy rejamiz gol o'tkazib yubormaslik edi. Bu ishni dastlabki 20 daqiqada uddalay olsak. raqib boshqa reja asosida o'ynashi mumkin edi. Shu sababli ham o'yin boshidan raqibni uzoqroqda ushlab turishimiz mumkin emas edi. Birinchi bo'limda himoyada yaxshi o'ynaganimizdan so'ng, ikkinchi bo'lim oldidan nima uchun yarim himoyada to'pni olib qo'yib, hujum uyushtirish mumkin emas, deb o'yladik va bu ishni amalga oshirishga kirishdi. O'zbekistonga o'xshash jamoalarga qarshi ilk daqiqalardan ochiq o'yin ko'rsatish juda qiyin. Balki 11 kishi o'ynaganimizda boshqacha bo'lishi ham mumkin edi.
- Raqibingiz o'yini u qadar o'xshamadi. Bunday vaziyatda g'alaba uchun kurashsangiz ham bo'lardi. Ammo nima uchun bunga urinib ko'rmadingiz?
- O'zbekiston yaxshi o'ynay olmaganiga kelsak, bunga biz imkon bermadik. Avvalgi matbuot anjumanida aytganim singari men realistman, haqiqatga tik qarayman. Shu sababli ham o'z imkoniyatlarimizdan kelib chiqib o'ynadik. Jamoalar o'rtasidagi farqni FIFA reytingi ham ko'rsatib turibdi. Boz ustiga O'zbekiston 40 mingga yaqin muxlis qarshisida o'ynadi, biz esa uzoq yo'l bosib safarga keldik. Futbolda hamma narsa bo'lishi mumkin. Bugun 11 kishi bo'lganimizda, siz aytgandek boshqacha o'yin bo'lishi mumkin edi. Agar reytingi baland raqibga qarshi safarda maydonga tushar ekansan, boz ustiga bu raqib o'z maydoningda 1:5 hisobida mag'lub etgan bo'lsa, yana qanday o'ynash mumkin? Bugun biz imkon qadar himoyada turib berishga harakat qildik. Yana bir bor yirik hisobda mag'lub bo'lishimiz mumkin emas edi.
— deya xabar beradi uff.uz nashri.