JCh-2018 saralashi doirasida O'zbekiston va Filippin o'rtasida kechgan o'yindan so'ng (1:0) Samvel Babayan matbuot anjumanida ishtirok etdi va fikrlarini bildirib o'tdi.
- Bugun juda og'ir o'yin bo'ldi. Raqib qay darajada kuchli ekanini avval ham aytgan edik. Baxtimizga biz g'alaba qozondik. Gol urish uchun juda ko'p imkoniyatlarga ega bo'ldik, ammo Filippin darvozaboni mo''jiza yaratdi. Bu darvozabon Angliyadan, "Chelsi" klubi tarbiyalanuvchisi hisoblanadi. Avvalgi o'yinda ham garchi biz 5:1 hisobida g'alaba qozongan bo'lsakda, raqib ham etarlicha qulay vaziyatlarga ega bo'lgan edi. Yana bir gapni aytishim lozim, chetlatish Filippin foydasiga xizmat qildi. Chunki ular chetlatishdan so'ng bor e'tiborni himoyaga qaratdilar va gol urishimiz qiyin bo'lib qoldi.
- Ikki tayanch yarim himoyachisi bilan o'ynaganda yaxshi harakat qildingiz. Ammo bir yarim himoyachi markazda qolganda o'yiningiz oqsab qolmoqda.
- Biz imkon qadar gol urishga harakat qilishimiz lozim edi. Shu sababli Odil Ahmedov hujumga yaqin o'ynadi.
- Bahreynga qarshi kechadigan o'yinda rotatsiya bo'ladimi?
- Agar keyingi bosqichga o'tishimiz yuz foiz aniq bo'lsa, keyin rotatsiya qilishimiz mumkin. Ammo ungacha tavakkal qilmaymiz.
- Server Jeparov zaxiraga olingandan keyin burchak to'plari yaxshiroq amalga oshira boshlandi. Siz ham sezdingizmi shuni?
- Server kuchli futbolchi, u chap oyog'i evaziga ikki marta Osiyoning eng yaxshi o'yinchisi deb tan olingan edi. Uning funktsional tayyorgarligi hozir yaxshi bo'lmasligi mumkin, biroq u shu holatda ham jamoamizga foyda keltira oladi. U burchak to'plarini ham imkon qadar oshirib bermoqda.
- Ammo bu oshirmalar sifati sizni qanoatlantiradimi?
- Ha, bizni qanoatlantirdi. Yana takrorlayman, raqib himoyasi juda yaxshi o'ynadi.
- O'yin Odil Ahmedov orqali ko'p tashkil etildi va futbolchilaringiz uni kutib, hujumni ham sekinlashtirib qo'ymoqdalar.
- Odil Ahmedov hujumlarni tashkil etib beradigan futbolchi. Shunchaki raqib bir futbolchi kam bo'lib qolgach, bor e'tiborni himoyaga qaratdi va tig'iz himoyadan o'tishi qiyin bo'ldi. Afsuski Javohir Sohibovda hozircha tajriba etarli emas.
- Bu savolni avvalgi murabbiylarga ham berganman, ammo javob qaytarishmagan. Bugun ko'p vaziyatlar ko'kka sovurildi. - Bunga sabab nimada, deb o'ylaysiz? Agar javob berishni istamasangiz uchta variant berishim mumkin...
- Kerak emas. Savolingizga shundoq ham javob berishim mumkin. Hammasiga aybdor - futbol. Bugungi o'yin 30 million xalqni hayajonda ushlab turdi. Shunisi bilan ham bu futbol. Gollarni ura olmaganimizga kelsak, kechirasizku, yana bir bor takrorlayman, Filippin ancha kuchli jamoa. Baxtimizga g'alaba qozondik. Bugungi o'yinning eng yaxshi futbolchisi - Filippin darvozaboni. Agar Evropaning kuchli klublari shu o'yinni tomosha qilgan bo'lsa, uni Angliyaning uchinchi divizionidan olib ketgan bo'lardilar.
- Geynrixga minnatdorchilik bildirgan bo'larmidingiz? U maydonga tushgach o'yin o'zgardi.
- Men uzoq vaqt terma jamoadan chetda bo'lgan Geynrixni yana ortga qaytardim. Bizning jamoamiz juda ahil. Zaxirada qolgan o'yinchilar hech qachon xafa bo'lmaydilar va o'z imkoniyatlarini kutadilar. Men Aleksandrga alohida minnatdorchilik bildirishni istamayman, balki butun jamoaga rahmat aytaman. Bugun g'alaba uchun hamma birdek mehnat qildi.
Matbuot anjumanidan so'ng Samvel Babayan fikr bildirish uchun so'z oldi.
- Men OAV orqali bir gapni aytishni juda istayman - iltimos muxlislarga butun jamoa nomidan minnatdorchilik bildirib qo'ying. Bugun ular bizni juda ajoyib tarzda qo'llab-quvvatladilar. Bizni yana bir juda muhim o'yin kutib turibdi, ishonamanki bu o'yinda ham muxlislar biz bilan elkama-elka turadilar. Hammasi uchun rahmat.
— deya xabar beradi uff.uz nashri.