Onamning aytishiga qaraganda, kichkinaligimda kitoblarni xush ko'rganman va ularni birma-bir mutolaa qilib chiqishni qanda qilmagan ekanman. Ayniqsa, avtobus ichida kitob o'qib o'tirganimni katta yoshdagilar ko'rib qolishsa, hayron holatda men tomonga nazar solib qo'yishar ekanlar. O'zingiz bir o'ylab ko'ring, yoningizda 9 yashar bola o'tiribdi, qo'lida kitob. Yo'q, maktab darslarida o'qitiladigan kitob emas, haqiqiy «adabiyot qirollari» bo'lgan navisandalarning mahsuloti edi bu. Qizig'-a?
 O'zim ham bu damlarni ahyon-ahyonda eslab turaman. Adashmasam, o'shanda 9 yoki 10 yoshda edim. Gapning iddaosi shundaki, kichkinaligimdan kitob o'qishni hamda bir nimalarni ichimdan to'qib yozishni xush ko'rganman. Ulg'aygach, taniqli bir adabiyotshunos, muxbir, shoir bo'lishni orzu qilganman. Ammo keyinchalik bu orzularimni ro'yobga chiqara olmadim. Kuz faslining boshlarida daraxt barglari so'lib, erga tushib ketgani singari, mening orzuim ham sarobga aylandi-qo'ydi...
 Hozirda bolalik davrimni eslab, maqola yozib turishga harakat qilyapman. Ammo baribir bularning barchasi men uchun oddiy bir xobbi, xolos. Aniqrog'i, bo'sh vaqtni maroqli o'tkazish uchun qo'llaniladigan uslub.
 To'g'ri-da, axir har bir erkak kishi katta ishlarni amalga oshirishni, xususan, oilali bo'lishni va ushbu oilani elkasida ko'tarib yurishni, uni to'laqonli parvarish qilishni istamaydimi? Kelajakda o'zi ham, oilasi ham qiyinchiliklarga yo'liqmasliklari uchun qo'ldan kelgancha harakat qilmaydimi? Aynan shu sababli, men o'z orzularimni oddiy bir xobbiga almashtirib, pul topish ilinjida butunlay o'zgacha burilish yasashga, butkul qarama-qarshi yo'llar tomon yuz burishga majbur bo'ldim.
 Bularni nega yozdim? Futbolga yozganlarimning nima aloqasi bor? Shoshmay turing, hozir hammasini bir boshdan tushuntirib beraman.
 Donetskning «Shaxtyor» futbol klubida javlon urib kelgan, raqib futbolchilarini birma-bir chiroyli tarzda aldab o'ta oladigan yuqori texnika sohibi hamda kuchli va aniq zarbasiga ega bo'lgan 26 yoshli braziliyalik futbolchi Aleks Teysheyra atrofida sodir bo'lgan voqealarni eslaysizmi? Ushbu mavsum doirasida «konchilar» safida 26 o'yinda maydonga tushib, 26 marotaba raqib darvozasini ishg'ol qilishga muvaffaq bo'lgan futbolchini Evropaning eng saralangan kuchli klublari o'z saflariga qo'shib qo'yishni maqsad qilgandilar. «Liverpul», «Manchester Yunayted» hamda «Yuventus» shular jumlasidandir. Hattoki, «Liverpul» rahbariyati ushbu futbolchiga jiddiy qiziqish bildirib, uning uchun 32 million evro taklif qilishgan. Barchasi nima bilan yakun topdi? Futbolchilik faoliyatining eng cho'qqisida turgan bu futbolchi Xitoyning «Tszyansu Sunin» jamoasiga 50 million evro evaziga ravona bo'ldi. Tamom. Shu joyda ertak tugadi.
 Ushbu olamshumul transfer amalga oshirilgach, «Liverpul» bosh murabbiyi bu borada o'z fikrlarini qo'yidagicha bayon etdi: «Agar sen 26 yoshda bo'lsang va senda shunday ajoyib taklif bo'lsa, bu haqda yaxshilab o'ylab ko'rishing kerak bo'ladi. Aytishim mumkinki, Teysheyra "Liverpul"da o'ynashni emas, Xitoyning "Tszyansu" jamoasini tanlash orqali o'z bolalarining va boshqa qarindoshlarining kelajagini ta'minlab qo'ydi.»
 Ha, Evropa maydonlarida ko'plab sovrinlarga ega bo'lishi mumkin bo'lgan ulkan iste'dod sohibi shu tariqa o'z kelajagini belgillab oldi. Albatta, u ham bolaligidan kuchli jamoa safida o'ynashni, futbol olamida o'z o'rniga ega bo'lishni orzu qilgan. Ammo yuqorida Yurgen Klopp ta'kidlaganidek, u o'z kelajagi va bola-chaqasini o'ylab, shu ishga qo'l urishga qaror qildi.
 Hay, Teysheyra-ku, mayli, braziliyalik futbolchi. U haqda ko'p o'ylashimiz kerak emas, zotan, uning taqdiri bizni tashvishga solmaydi. Lekin o'zimizdan chiqqan yuksak iqtidor egasi Sardor Rashidov borasida ham xuddi shu fikrdamizmi, demak, ushbu maqolamni yozishga to'laqonli xaqim bor ekan. Sizning nazaringizda, Rashidov ham braziliyalik hamkasbiga o'xshab, o'zini o'zi xarob qilib qo'ymadimi?
 O'zining individual mahorati bilan ko'pchiligimizni hayron qoldirgan bu futbolchi kelajagi to'g'risidagi qarori bilan hammani hayron qoldirdi. Aynan uning chap oyoqdagi kuchli va aniq zarbalariga, yuqori tezligiga, «parashyut» uslubida darvozani ishg'ol qila olishiga, yuqori texnika va driblinglariga mahliyo bo'lgan muxlislar stadionlarimizga tashrif buyuraverishardi. U sabab, ha, aynan uning o'yinlari sabab, so'nggi paytlarda «Bunyodkor» stadioni liq to'lardi. Bilasiz, hashamatli stadionlarimiz ko'pincha bo'm-bo'sh turishadi, ularni to'ldirishning o'zi oson ish emas. Yaqin o'tmishda Aleksandr Geynrix va Odil Ahmedov «Paxtakor» safida o'ynagandagina, Rivaldo va Server Jeparov «Bunyodkor»da ajoyib tandem xosil qilganlaridagina muxlislarimiz futbolimizni shu qadar sevib  tomosha qilishardi. Aytishim mumkinki, aynan Sardor o'sha shonli davrlarni qaytargandi, ya'ni, muxlislarni stadionlarga qaytara olgandi.
 Biz barchamiz uning Evropa klublarining birida harakat qilishini o'z ko'zimiz bilan ko'rishimizni istagan edik. Bu amalga oshirilishi mumkin bo'lgan vazifa ekanligiga ishongan edik. Sardorning o'zi ham bir necha marotaba Evropa maydonlarida to'p surishni orzu qilishini aytib o'tar edi. Orzu qilar edi u. Orzu...
 Rashidovni sotib, yaxshigina daromad ko'rgan «Bunyodkor» oradan ko'p vaqt o'tmasdan yana muxlislarni o'z stadioniga jalb etishni boshladi. Ha, to'g'ri ilg'ay oldingiz, gap aynan Eldor Shomurodov va Doston Hamdamov haqida boryapti. Yosh futbolchilar o'z jamoasi safida juda erkin harakat qilishmoqda, gollar urishmoqda. Qolaversa, yaqindagina o'z individual harakatlari evaziga arab jamoalarini ham hayratga solib qaytishgandi. Bu ikkita futbolchidan tashqari jamoa safida maydonga chiqayotgan yana ko'plab yosh futbolchilarni ta'riflab berishim mumkin: Rustam Ashurmatov, Akromjon Komilov, Otabek Shukurov, Zabihillo O'rinboev.
 Yaqinda Doston Hamdamov hamda Eldor Shomurodov o'yinlarini portugaliyalik skautlar kuzatib o'tirishganlari haqidagi ma'lumotga ko'zim tushgandi. Juda yaxshi! Bir paytlar Odil Ahmedov ham bir yil ijarada o'ynab, keyinchalik transfer xuquqini to'liq sotib olish sharti bilan «Anji» jamoasiga yo'l olgandi. Keyinchalik voqealar rivoji qanday tus olgani sizga ma'lum. Ahmedov hanuzgacha Rossiya Premer-ligasida eng ko'zga ko'ringan futbolchilardan biri bo'lib turmoqda. Terma jamoamizning sardori, etakchi futbolchisi!
 Toshkentning «Bunyodkor» jamoasi hamshaharlaridan o'rnak olishini juda istayman. Aynan «Odil Ahmedov operatsiyasi» qay tariqa amalga oshirilgan bo'lsa, shu tariqa qolgan futbolchilar ham Evropa jamoalariga yo'l olishini kutmoqdaman. Ko'z tegmasin, bugun «Bunyodkor» safida etarlicha yosh futbolchilar etishib chiqishmoqda. Ular allaqachon muxlislarimiz mehrini qozonishga ulgurishgan. «Bunyodkor» rahbariyatidan iloji boricha, Osiyo jamoalaridan tushgan takliflarga e'tibor qaratmaslikni so'rardim, aks holda, Sardor Rashidov voqeasi takrorlangach, balki «Bunyodkor» futbol klubi boyib ketar, ammo o'zbek futboli bundan faqatgina jabr ko'rishi qoladi...
 Tasavvur qiling, oradan ko'-o'-o'p yillar o'tib siz o'z nabiralaringizni atrofingizda yig'ib olib, hordiq chiqarmoqdasiz. Ularga futbolimiz tarixi to'g'risida quyidagilarni so'zlab berasiz: «Bilasizlarmi, mening davrimda O'zbekiston futboli eng yuksak davrlarni boshidan o'tkazgan. Futbolimiz tarixida bunday voqealar qayta takrorlanmadi. 1994 yili Xirosimada Osiyo o'yinlarida zafar quchganmiz. Keyinchalik ko'p marta Jahon chempionati hamda Olimpiada yo'llanmasi uchun kurash olib borganmiz va har doim bizga ozgina omad etishmasdi. Hattoki, terma jamoamiz Mirjalol Qosimov boshchiligida 14 ochko jamg'argan holda, o'z guruhida qolib ketgandi. Tarkibimiz ham shunga monand juda kuchli bo'lgan: Vitaliy Denisov, Odil Ahmedov, Server Jeparov va Sardor Rashidovdek mahoratli futbolchilar to'p surishardi. Qalay, qoyilmisizlar?!» Nabiralaringiz ham shu onda ko'zlaringizga havas bilan boqib: «Attang, bobom davrida terma jamoam shunday kuchli bo'lgan ekan!» - deb, qattiq xo'rsinib qo'yishadi.
 Bu manzarani o'z tasavvuringizga singdira oldingizmi? Qo'rqinchli, a? Men ham mana shundan qo'rqaman.
— deya xabar beradi uff.uz nashri.