“Navbahor” – “Qo'qon-1912” jamoalari o'rtasidagi uchrashuv yakuniga etgach, har ikki jamoa murabbiylari ishtirokida matbuot anjumani bo'lib o'tdi. Dastlab jurnalistlar savollariga “Qo'qon-1912” jamoasi ustozi Murod Ismoilov javob qaytardi: – Birinchi navbatda ko'pchilik jamoamizni kubok o'yinlariga jiddiy e'tibor qaratishmayapti, degan fikrlarni bildirishgandi. Xususan, 1/16 final doirasidagi “NBU-Osiyo” qarshi o'yinda asosan yoshlar maydonga tushgani sababli jamoaga kubokni ahamiyati yo'q degan fikrlar yuzaga kelgandi. Lekin, amalda bunday emas, “Qo'qon-1912” jamoasi uchun har qanday o'yinni ahamiyati yuqori. Har bir raqibni hurmat qilgan holda har bir uchrashuvga jiddiy tayyorgarlik ko'ramiz. “Navbahor” kuchli jamoa bo'lganligi sababli o'zgacha ishtiyoq bilan hozirlik ko'rgandik. O'ylagan rejalarimiz amalga oshdi. Yigitlarni bor kuchlari bilan harakat qilishlari menga manzur bo'ldi. Futbolchilarimiz maydonda ko'p mehnat qilishdi. Kimgadir himoyaviy o'yin ko'rsatganligimiz yoqmagan bo'lishi mumkin. Lekin futbolda birinchi navbatda natija turadi. Qanday holat bo'lishidan qat'i nazar yigitlar oldilariga qo'yilgan vazifani bajarishdi. “Navbahor” jamoasida ham gol urish uchun ko'plab xavfli vaziyatlar yuzaga keldi. Darvozabonimiz penaltini ham qaytarishga muvaffaq bo'ldi. Umuman olganda omad biz tomonda bo'ldi deb o'ylayman.
— deya xabar beradi uff.uz nashri.