2011 yili Meksika yashil maydonlarida o'tgan o'smirlar  o'rtasidagi mundialda O'zbekiston terma jamoasi tarkibida o'zining maftunkor o'yinlari bilan muxlislar mehrini qozongan Temur Hakimov bugungi kunda 1-liga vakili - Toshkentning «Oq-tepa» klubida to'p suryapti. O'shanda dunyoning kuchli sakkizligiga kirishni uddalagan o'smirlarimizning aksariyati kelgusida etakchi klublar safiga  qo'shilishi taxmin qilingandi. Lekin amalda bunday bo'lib chiqmadi. Futbol osmonida tezda porlagan yulduzchalar ana shunday tezlikda so'nishgandi. Ular orasida Temur Hakimov ham bor. Yosh hujumchi hozirda «Oq-tepa»ning to'purari bo'lib turibdi. Uning hisobida 17ta gol bor. Turnir to'purarlari poygasida esa hozirga qadar «Obod» raqiblari darvozasini 20 marta ishg'ol etgan Alisher Azizovdan ortda bormoqda. O'tgan haftaning so'nggi kuni Temur Hakimov bilan uchrashib, undan intervyu oldik.
- Temur, O'zbekiston birinchiligi yakunlanishiga 5-6 tur qolgan bir pallada «Oq-tepa» oliy ligaga chiqish uchun asosiy da'vogarlardan biri bo'lib turibdi. Suhbatimiz avvalida 1-liga o'yinlari haqidagi fikrlaringiz bilan o'rtoqlashsangiz.
- Ayniqsa, so'nggi tur uchrashuvlari o'ta qiziqarli ruhda kechmoqda. Autsayderlar etakchilarga etarlicha tashvish tug'dirishyapti. Bugun hamma futbol o'ynashni o'rganib olgan. Kutilmagan natijalarning qayd etilishi ham shu omil bilan bog'liq. Ko'z tegmasin, hozircha turnir jadvalida pesh­qadamlik qilyapmiz. Afsuski, safarda «Zomin»ga yutqazdik. Endi ochko yo'qotishga aslo haqqimiz yo'q. Oldimizda elitaga chiqish vazifasi turibdi. Buning uchun qolgan uchrashuvlarda g'alaba qozonishimiz shart. Asosiy ta'qibchilarimizning ochko yo'qotishini kutmasligimiz kerak. Aks holda, pand eyishimiz mumkin.
- «Zomin» bilan o'yindagi mag'lubiyatga nima sabab bo'ldi?
- Menimcha, o'sha kun bizga atalmagandi. Qolaversa, maydonning holati ham ayanchli ko'rinishda edi. Sifatdan tashqari, maydonning hajmi ham kichkina, belgilangan standart­larga javob bermaydi. Bizdan farqli o'laroq, mezbonlar u erda to'p surishga moslashishgan. PFLning bu stadionda o'yin o'tkazilishiga ruxsat berganini tushunish qiyin. Uloq-ko'pkari o'tkaziladigan maydonga o'xshaydi (kuladi). Bir tomondan, mezbonlarning o'yinga yuqori ruhiy tayyorgarlikda tushganligini ham unutmaslik kerak. Har bir to'p uchun oxirigacha kurash olib borishdi. Xullas, yuqorida sanab o'tilgan omillarning bari jamoamiz mag'lubiyatiga, qimmatli ochkolarning boy berilishiga sabab bo'ldi.
- Qiziq jihati shundaki, bundan avvalgi ikki o'yinda asosiy raqib - «Obod»ni mag'lubiyatga uchratganding­lar. Nima deb o'ylaysiz, kichik «Poytaxt derbisi»da nimaning hisobiga g'alaba qozondinglar?
- Haqiqatan har ikkala o'yin printsipial ahamiyatga ega edi. Bu klublar ham oliy liga yo'llanmasi uchun kurash olib borishyapti. Bilasiz, birinchi ligada faqat g'olib jamoa to'g'ridan-to'g'ri oliy ligaga yo'l oladi. Ikkinchi o'rin egasi esa elitaning 15-jamoasi bilan o'tish uchrashuvida maydonga tushadi. Bunda birinchi liga klubining imkoniyatlari pasayadi. Shu sababli ham «Oq-tepa» va «Obod»  quyi ligada g'oliblik uchun kurash olib borishyapti. Shaxsiy fikrim, o'sha ikkala o'yinda ham g'alaba ko'proq bizga kerak edi. Ruhiy tomonlama «Oq-tepa» uchrashuvga yaxshiroq tayyorgarlik ko'ra oldi. «Obod» bilan kechadigan ikkala o'yin ham oliy ligaga chiqish yo'lidagi eng katta tashlangan qadam bo'lishini hammamiz tushunib turgandik.
- E'tiborlisi, «Obod» bilan o'tkazilgan har ikki o'yinda ham «dubl» qayd etib, jamoangiz g'alabasiga ulkan hissa qo'shdingiz...
- Bundan albatta, xursandman. O'zimga qolsa, shaxsiy yutuqlardan ko'ra jamoam muvaffaqiyatini ustun qo'yaman. Gollarim bilan jamoamga yordamim tegayotgani o'z vazifamni bajarishga harakat qilayotganimdan dalolat. Shu o'rinda raqib darvozasini ishg'ol qilishda menga katta yordam berayotgan jamoadoshlarim Sobir Usmonxo'jaev, Anvar Rahimov, Eldor Magdeevga o'z minnatdorchiligimni bildiraman. Nasib qilsa, sport formamni tiklab, yana avvalgidek o'yin ko'rsatishga harakat qilaman.
- Oliy liga havosidan nafas olgansiz. «Paxtakor»da bir necha mavsum to'p surdingiz. Umuman, ko'pchilik yoshlarning orzusidagi klubdan ketish qiyinchilik tug'dirgandir?
- «Paxtakor» hamisha mening yuragimda, qalbimda qoladi. Shu klub orqali katta futbolga kirib keldim, O'zbekiston o'smirlar, yoshlar, olimpiya terma jamoalariga taklif etildim. Vaqti kelib, albatta, «Paxtakor»ga qaytib, mazmunli o'yinlarim va gollarim bilan muxlislarni xushnud etaman. Fursatdan foydalanib, shu klubda futbolchi bo'lib shakllanishimga katta hissa qo'shgan barcha insonlarga tashakkur izhor qilmoqchiman. Ularning qo'llab-quvvatlashlari, bergan saboqlari tufayli futbolchi bo'lib etishdim.
Davomi InterFUTBOL gazetasi blogida.
— deya xabar beradi uff.uz nashri.