“Navbahor” – “Qo'qon-1912” jamoalari o'rtasidagi uchrashuv yakuniga etgach, matbuot anjumanida Rashid G'ofurov ishtirok etib, savollarga javob qaytardi: - Bunday natija qayd etiladi deb o'ylamagandim. Jamoamizga nima etishmayotganligini tushuna olmayapman. Uchrashuvlar davomida o'ylagan va rejalashtirgan ishlarimizni amalga oshira olmayapmiz. Futbolchilarga maydonda faqat ikkinchi qavatdan hujum tashkil etavermasdan boshqacha uslubda harakat qilishni uqtirayotgan bo'lsakda, bularni foydasi bo'lmayapti. Yigitlarga imkon bo'ldi deguncha olis masofalardan ham zarba berish kerakligini ta'kidlamoqdamiz. Lekin, hujumda baland bo'yli Pishurni to'p bilan ta'minlashga berilib ketishmoqda. Aslida hujumchimiz raqib himoyachilarini chalg'itayotgan bir pallada hujumlarni boshqacha uslubda yakunlash haqida ko'rsatma bersakda, amalda buni ko'rmayapmiz. Shok holatiga tushib qolganligim sababli qandaydir fikr bildirishga hayronman. G'alaba qozonilgan paytlarda futbolchilar g'alaba qilishadi. Mag'lubiyatda esa hamma vaqt murabbiy aybdor bo'ladi. Shu sababli, jamoamiz ishqibozlaridan uzr so'rayman. Chempionatdan o'rin olgan navbatdagi uchrashuvni “So'g'diyona” jamoasiga qarshi o'tkazamiz. Agar shu o'yinda ijobiy natijani qo'lga kiritsak, hammasi yaxshi bo'ladi degan umiddaman. Ayrim futbolchilarimiz tajribali bo'lishlariga qaramay, to'pni yo'qotib qo'ysam, so'kish eshitishim mumkin degan hayolga borishmoqda. O'yin borasida olib qaraganda, tashabbusga erishgandek tuyulmoqdamiz. Shunday bo'lsada, yakuniy natija foydamizga bo'lmayapti. Bu hal har bir uchrashuvda takrorlanmoqda. Gol urish uchun imkoniyatlar bo'lsada, gol ura olmayapmiz. Aksincha raqibning kam sonli zarbalarini o'tkazib yubormoqdamiz. Bu gaplarni o'zimni oqlash uchun gapirayotganim yo'q. Shunchaki o'yinlardan kelib chiqqan holda aytmoqdaman. Vaziyatlardan foydalana olmayapmiz, raqib jamoa esa bitta aniq zarbasi bilan barchasini barbod qilmoqda. Mavsumlar oralig'ida jamoamizga qabul qilingan legionerlardan birgina Igor Golban o'ziga bildirilgan ishonchni oqlamoqda xolos. Qolganlarining harakatidan ko'nglim to'lganicha yo'q. Bugun Golbanni yo'qligi ham sezildi deb o'ylayman. Alamli mag'lubiyat kuzatildi. Oldinda hali javob uchrashuvi ham bor. Mana bugun “Qo'qon-1912” jamoasi mehmonda g'alaba qozondi. Nima sababdan biz ham bu ishni uddalay olmasligimiz kerak. Xudo xohlasa safarda ijobiy natijani qayd etish uchun qo'limizdan kelganicha harakat qilamiz. Shu sababli mag'lubiyatdan katta fojea ham yasamaslik kerak deb o'ylayman. Javob o'yini borligi sababli hali hammasi yo'qotilgani yo'q. Bugungi o'yindan xulosa qilgan holda kamchiliklar ustida ishlab, legioner bo'ladimi yoki mahalliymi maydonda jamoa manfaati uchun to'p suradigan futbolchilarga ishonch bildiramiz.
— deya xabar beradi uff.uz nashri.