O'tgan haftada Misrning «Zamalek» klubi bosh murabbiyini ishga tayinlanganidan 37 kun o'tib, ya'ni  ilk muvaffaqiyatsizlik ro'y berishi bilan iste'foga chiqarib yuborgani haqida xabarlar tarqaldi. Jamoa Mido rahbarligida avvaliga milliy chempionatning to'rtta uchrashuvida g'alaba qozonib, so'ng bir durang qayd etgan. Afsuski, “Zamalek”ning azaliy raqibi “Al-Ahli”dan mag'lubiyatga uchrashi klub mutasaddilari tomonidan ana shunday qarorga kelinishiga olib keldi.  Saytimiz mushtariylariga   jahon futbolida  eng qisqa muddat murabbiylik qilgan mutaxassislar haqida ma'lumot beramiz.
Xose Antonio Kamacho («Real», 1998 yil, 23 kun)
Xose Antonio Kamacho — “Real” afsonasi, u  “qaymoqranglilar” safida 414 marta maydonga tushgan bo'lib,  sobiq himoyachi butun faoliyatini Madrid klubida o'tkazgan.   Uning 1998 yili  nemis murabbiyi Yup Xaynkes o'rniga bosh murabbiy etib tayinlanishi mutaxassis va ishqibozlarni hayron qoldirmadi.  Chunki, futbolda o'zi to'p surgan jamoaga murabbiy bo'lib bir qator sovrinlarni qo'lga kiritgan o'yinchilar ko'p uchraydi.
Lekin Kamachoning  «Real»ga kelishi bunday xotima topmadi. Murabbiy va mutasaddilarning o'rtasida paydo bo'lgan kelishmovchilik oqibatida, tomonlar mehnat shartnomasini imzolanganidan 23 kun o'tib bekor qildilar. Kamacho jamoa bilan biror marta ham rasmiy o'yin o'tkaza olmadi.  
Lekin, 2004- yili Kamacho o'z nomini “qirollik klubi”da faoliyat yuritgan ustozlarning uzundan-uzoq ro'yhatiga yozdirib qo'yish imkoniyatiga ega bo'lgan.    Portugaliyaning “Benfika”sida 2002-2004 yillardagi muvaffaqiyatli yurishi, madridliklarni befarq qoldirmadi va Kamachoni yana “Real”ga chaqirishdi.  Ispan mutaxassisi bu safar oldingi natijasidan yuqorirog'iga erishib, “Real”da roppa-rosa 115 kun faoliyat yuritgan. Afsuski, murabbiy bu davrda maqtashga arzigulik hech narsaga erishmagan: ikki oylik mavsum oldi  mashg'ulotlari va uchta rasmiy o'yin.
Yuriy Krasnojan (“Anji”, 2011 yilning dekabridan - 2012 yil fevraligacha, 48 kun)
2011 yilning yanvarida rossiyalik milliarder Suleyman Kerimov Maxachqal'aning   “Anji” klubini sotib olib - “Orzular jamoasi”ni tuzishga kirishadi. Dog'istonliklar tarkibiga birinchi bo'lib qo'shilgan futbolchi –“Real”ning sobiq afsonaviy himoyachisi Roberto Karlos bo'lgan. Yozgi transfer oynasi ochilishi bilan sariq-ko'klar safiga bir guruh  taniqli ijrochilar hamda “Barselona”ning sobiq hujumchisi Samuel Eto'O ham keldi. Bunday jahon yulduzlariga 2011 yilning 27 dekabrida ishga olingan Yuriy Krasnojanning bosh murabbiylik qilishi barchaga g'alati tuyula boshladi. Murabbiyni bu davrgacha Nalchikning “Spartak”, Moskvaning “Lokomotiv”klublari va Rossiyaning ikkinchi terma jamoasida faoliyat yuritganligidan xabaringiz bor, albatta.  2012 yilning 13 fevralida Krasnojan ishqbizlarni hayratga solganicha o'z arizasi bilan jamoani tark etdi. Shuni alohida aytib o'tish joiz, murabbiy yangi vazifasida bir dona ham rasmiy o'yin o'tkaza olmadi. Ommaviy axborot vositalari rossiyalik mutaxassisning obro'si uchun bu voqea atrofida shov-shuv ko'tardilar.
Krasnojan esa bu voqeani izohlab ham o'tirmadi. Ba'zi manbalarda uning ketishiga sabab etib, mutaxassisni taniqli futbolchilar bilan til topisha olmaganligi aytildi. Oradan to'rt kun o'tib Kerimov jamoasida barchaga tanish murabbiy – Gus Xiddink paydo bo'ldi. Ta'kidlash lozimki, Krasnojan uzoq vaqt ishsiz yurmadi va o'sha yilning yozidayoq Krasnodarning “Kuban” klubini boshqarishga o'tdi.
Xuande Ramos (TsSKA, 2009 yil, 46 kun)
Ispaniyalik mutaxassis 2005 yildan 2007 yilgacha “Sevilya”ni boshqargan paytida katta shon-shuhratga erishgandi.   Bu davr davomida andalussiya klubi ikki marta UEFA Kubogini qo'lga kiritib bir martadan Ispaniya Kubogi va Superkubogiga egalik qilgan yana UEFA Superkubogida g'alaba qozongandi.Samarali mehnati natijasida uni Angliya premer-ligasiga taklif qilishdi va Ramos “Tottenxem” bilan 2008 yili Angliya ligasi Kubogini yutib oldi. Bu yutuq «shporlar» uchun o'n yil davomida qo'lga kiritilgan ilk sovrin edi. Ammo, keyingi mavsum jamoa uchun juda omadsiz kelib, sakkiz turdan so'ng ispan mutaxassisi iste'foga chiqarildi.
So'ng,  Madridning “Real” klubidagi oz muddatli faoliyat va 2009 yilning 10 sentyabrida Ramos Moskvaning “TsSKA” klubi bilan shartnoma imzolaydi. Biroq, oradan 46 kun o'tib, 26 oktyabr kuni kelishuv ikki tomonning roziligi bilan bekor qilingan. Bunga sabab, iqtisodiy tanglik oqibatida TsSKA klubi prezidenti Evgeniy Ginerning puli ozayib ketganida edi. Armiyachilar ispan murabbiyi so'ragan mablag'ni topib bera olmaydilar. Natijada Ramos jamoa rulida bor-yo'g'i to'qqizta uchrashuv(4 g'alaba, 1 durang, 4 mag'lubiyat) o'tkazadi, xolos. Lekin, bu vaziyatdan klub va mutaxassis bir-birlariga gina-kudrat qoldirmay chiqib ketishgani e'tiborga molik. Giner ispan murabbiyini “Dnepr” prezidenti Igor Kolomoyskiyga tavsiya qiladi. Ramos 2010 yilning 1 oktyabridan Dnepropetrovsk jamosining rasmiy bosh murabbiyiga aylanib, tuzilgan to'rt yillik shartnomani  muammolarsiz adog'iga etkazgan.
Kevin Kallis («Suonsi Siti», 1996 yil, 7 kun)
Kevin Kallas ismi-sharifini juda kam inson biladi. Chunki, u profeesional futbolchi bo'lmagan va murabbiy sifatida ish ham olib bormagan. Shunday bo'lsada, o'sha payt Angliya chempionati uchinchi divizionida to'p surgan “Suonsi Siti” klubi prezidenti Maykl Tompson uni jamoaga bosh murabbiy etib tayinlaydi. “O'z oldiga hech qanday yuksak vazifalarni qo'ymagan klub murabbiyi qanday muammolarga duch kelishi mumkin” deyishingiz mumkin. Afsuski, Kallis yangi lavozimda bir hafta ishladi, xolos. “Suindon Taun” jamoasi bilan bo'lgan debyut uchrashuvida uning shogirdlari kichik hisob 0:1 hisobida mag'lubiyatga uchragan. Ikkinchi uchrashuvning tanaffusida tajribasiz murabbiy iste'foga chiqariladi. Barcha muammo shundaki, “Blekpul” bilan boshlagan bahsning birinchi bo'limining o'zidayoq, tabloda Kallis uchun tahlikali 0:4 hisobi yonib turar edi. Futbolchilar o'ylanib o'tirmay, to'polon ko'taradilar.Tanaffusda ular murabbiyning so'zlariga umuman quloq solmaydilar va boshchilikni uning  o'rniga futbolchilardan biri oladi. Shunday qiib, Kevin Kallisning “bir haftalik general”ligi yakuniga etgan.
Leroy Rosenor («Torki Yunayted», 2007 - yil, 10 daqiqa)
2007 yili  «Vest Xema» va «Fulxem»ning sobiq hujumchisi Leroy Rosenor o'zining murabbiylik faoliyatida ikkinchi bor Angliyaning «Torki Yunayted» klubini boshqarishga keladi. Birinchi marta mutaxassis jamoada to'rt mavsum – 2002-2006 yillari ish olib borgan. Navbatdagi urinish avvalgisidan ancha omadsiz chiqqani, aniq. Chunki, Rosenor o'zining yangi lavozimga tayinlangani uchun o'tkazilayotgan matbuot anjumanidayoq iste'foga chiqariladi.
Bu hodisaga sabab shundaki, xuddi o'sha paytda klub egasi almashadi va yangi xo'jayin murabbiylikka boshqa nomzod- Pol Baklni tanlaydi.  Shunday qilib, Angliya jamoalarida eng kam faoliyat yuritish bo'yicha yangi - 10 daqiqalik rekord o'rnatiladi. Bu voqea Rosenorni qattiq hafa qilmagan ham rost. Chunki u “Torki”ga ikkinchi bor kelishidan oldin, Angliyaning yana bir klubi “Brentford” jamoasida besh oygina faoliyat olib borgan va klub 16 bor qatorasiga mag'lubiyatga uchraganidan so'ng ishsiz qolgan edi.
Rikardo Gomes (Saudiya Arabistoni, 2011 yil, ish boshlamay turib iste'foga chiqarilgan)

— deya xabar beradi uff.uz nashri.