«Oltin to'p»-2007 sohibi  Kaka MLSdagi ikkinchi mavsumini boshlayapti. «Orlando Siti»ning 33 yoshli sardori So Foot jurnaliga bergan intervyusida hozirgi ishlari xususida atroflicha gapirish barobarida sobiq jamoalarini esga oldi. Shuningdek, Braziliya terma jamoasi, umuman, mamlakat futboli haqida ham to'xtaldi.
- Frantsiyada sizni nafaqat  «Frans Futbol» nashri taqdim etgan «Oltin to'p», balki yana «PSJ»ga o'tishingiz amalga oshmay qolgani tufayli ham tez-tez tilga olishadi. O'zi o'shanda nima ro'y bergandi?
- 2003 yili «Milan» safiga qo'shilganimda, Leonardo klub sport direktori lavozimida ishlardi. Leo va Parij jamoasi o'rtasida o'ta iliq munosabatlar shakllangan bo'lib, meni tajriba oshirishim uchun Frantsiyaga yuborish g'oyasi tug'ildi. Zero, o'sha payt juda yosh edim, qolaversa, «Milan»da men o'ynaydigan pozitsiya kimsan Rui Koshta va Rivaldo tomonidan band qilingandi. Lekin yakunda g'oya amalga oshmadi - klub meni shunchaki, Anchelotti ixtiyorida qoldirishni ma'qul ko'rdi.
- Natijada Rui Koshta va Rivaldodan ko'p narsalarni o'zlashtirdingiz, shundaymi?
- Shubhasiz. Har ikkisi deyarli bitta pozitsiyada to'p surardi va men ularning harakatlarini alohida kuzatardim. Eng muhimi shuki, oramizda hech qachon qandaydir nosog'lom raqobat sezilgan emas. Rivaldo bilan terma jamoada tanishgan edim, biroq «Milan»da atigi yarim yil birga o'ynadik, xolos. Koshta bilan hamkorligimiz esa ancha davomli bo'ldi. U ko'pincha o'yinlar tanaffusi chog'i barchasini erinmay tushuntirardi. Boshqacha aytganda, muayyan vaziyatlar misolida alohida ta'qibchidan qanday qochish, harakatlanish uchun bo'sh hududga chiqish va hokazolar xususida zarur maslahatlar berardi.
- Maldini bir safar shunday degandi: «Kakaning ustozi - Rui Koshta».
- Bu gap rost. Chindan ham, oramizda ustoz va shogird o'rtasidagi kabi munosabat shakllangan edi.
- Jurnalistlarning futbolchi shaxsiy hayoti haqida ko'p yolg'on narsalarni yozishlaridan nolib, media odami roli etarli muammolar keltirib chiqarishini ta'kidlagandingiz. Shu ma'noda aytsak, futbol hali uncha ommalashmagan AQShda nisbatan xotirjamroq yashash mumkindir...
- Nima desam ekan? Agar mahalliy matbuotni nazarda tutsak, darhaqiqat, hammasi sokinroq. Harqalay, bu erda sizni qat'iy kuzatuv ostiga olishmaydi, qandaydir voqeani haddan ziyod  bo'rttirib ko'rsatishmaydi. Biroq agar siz media «figura»si bo'lsangiz, doimo o'z haqingizda turli-tuman gap-so'zlar yangrashiga tayyor turishingiz lozim. Tan olaman, AQShda o'zimni ancha erkin sezyapman. Misol uchun, xotirjam ko'chaga chiqishim va sayr qilishim mumkin. To'g'ri, oxirgi vaqtlarda bu erda ham umumiy holat o'zgara boshladi. Deylik, odamlar meni tanib, birga suratga tushishni iltimos qilishlari odatiy holga aylandi.
- «Orlando Siti»dagi missiyangiz mohiyatini tushuntira olasizmi?
- G'oyaning asosiy mazmuni shuki, klubning taraqqiyotiga imkon qadar yordam berishim kerak. Nafaqat «Orlando»ga, balki butun Amerika chempionatiga. Maqsad - «Orlando Siti»ni futbol olamida mashhurlik darajasiga ko'tarish. Misol uchun, rahbariyat jamoaga braziliyalik futbolchilarni taklif etishni istayapti. Bu orqali braziliyalik muxlislarga AQShda shunday klub borligini bildirish va ularda alohida qiziqish uyg'otish maqsad qilingan. Umuman, MLS taraqqiyoti yo'lida keng ko'lamli ish olib borilyapti.
- Zlatan Ibragimovichning aytishicha, «PSJ» safiga qo'shilgan vaqti klubda alohida oshpaz yo'qligiyu, boshqa xodimlar ham etishmasligidan hayron qolgan ekan. MLSda infratuzilmaga bog'liq shunday kamchiliklarga duch kelmayapsizmi?
- Yo'q. Bu erga kelib ko'rdimki, klub infratuzilmasi yuqori darajada, eng mayda jihatlar ham e'tiborga olingan. Ortiqcha dabdaba yo'q, lekin hammasi o'z o'rnida. Tibbiyot markazi zamonaviy jihozlar bilan ta'minlangan, o'quv-mashg'ulotlar bazasida talabga javob beruvchi maydonlar etarli, stadion zo'r...
Davomi InterFUTBOL gazetasi blogida.
— deya xabar beradi uff.uz nashri.