Xitoyning Kuinan shahrida boks bo'yicha XXXI yozgi Olimpiada o'yinlarining yo'llanmalari uchun Osiyo va Okeaniya qo'shma litsenzion chempionati boshlandi.
Olimpiada o'yinlarining yo'llanmalari o'ynaladigan mazkur nufuzli musobaqada Vatanimiz sharafini Hasanboy Do'smatov (-49 kg), Shahobiddin Zoirov (-52 kg), Shaxram G'iyosov (-69 kg), Elshod Rasulov (-81 kg), Rustam To'laganov (-91 kg), Bahodir Jalolov (+91 kg), Yodgoroy Mirzaeva (-51 kg), Melieva Maftuna (-60 kg) va Nafisaxon Asqarova (-75 kg) himoya qiladilar.
Osiyo va Okeaniya qo'shma chempionatida har bir vazn toifasida 1-3 o'rinlarni egallagan sportchilar “Rio-2016” o'yinlarining yo'llanmasiga ega bo'ladilar.
Bugun Osiyo va Okeaniya qo'shma litsenzion chempionatining tantanali ochilish marosimi bo'lib o'tdi. Shundan so'ng, har bir vazn toifasida o'tkaziladigan bahslarning jadvallari e'lon qilindi.
Unga ko'ra, og'irlik vazni -49 kg. -52 kg. va -81 kg. gacha bo'lgan sportchilar musobaqasida ikkinchi raqam ostida saralangan hamyurtlarimiz Hasanboy Do'smatov, Shaxobiddin Zoirov hamda Elshod Rasulov 28 mart kuni o'tkaziladigan nimchorak final bosqichidan bahslarga kirishadi.
Vazni 69 kg.gacha bo'lgan bokschilar bahsida ishtirok etadigan Shahram Giyasov ham bahslarga 28 mart kuni nimchorak finaldan kirishadi.
Og'irlik vazni 91 kg.gacha bo'lgan charm qo'lqop ustalari o'rtasidagi musobaqada Vatanimiz sharafini himoya qiladigan Rustam To'laganov birinchi raqam ostida saralangan bo'lib, dastlabki jangini 29 mart kuni chorak finaldan boshlaydi.
Eng og'ir vazn toifasidagi bokschilar musobaqasida ikkinchi raqam ostida saralangan Bahodir Jalolov ham bahslarga chorak finaldan kirishadi. Ushbu vaznda chorak final janglari 29 mart kuniga belgilangan.
Xotin-qizlar o'rtasidagi musobaqada uch vazn toifasida bellashuvlar o'tkaziladi va har uch vazn toifasida ham mamlakatimiz sportchilari ringga ko'tariladilar.
Og'irlik vazni -51 kg.gacha bo'lgan sportchilar bahsida ishtirok etadigan Yodgoroy Mirzaev dastlabki bosqichda indoneziyalik Beatriks Suguroga qarshi ringga ko'tarilsa (27 mart), vazni 60 kg.gacha bo'lgan bokschilar musobaqasida qatnashadigan Maftunaxon Melieva 27 mart kuni o'tkaziladigan chorak finalda Tailand vakili Tassamali Tsongjan bilan yarim final yo'llanmasi uchun kuch sinashadi.
Va nihoyat, vazni 75 kg.gacha bo'lgan sportchilar musobaqasida Vatanimiz sharafini himoya qiladigan Nafisaxon Asqarova o'zining dastlabki jangini 26 mart kuni v'etnamlik Ti Chung Ngoga qarshi o'tkazadi.
Ma'lumot uchun. Boks bo'yicha XXXI yozgi Olimpiada o'yinlarining yo'llanmalari, shuningdek, 13-22 may kunlari Bolgariya poytaxti Sofiya shahrida ayollar o'rtasida o'tkaziladigan Jahon chempionatida, 19-27 may kunlari Astana shahri (Qozog'iston)da bo'lib o'tadigan litsenzion musobaqa hamda 7-19 iyun kunlari Boku shahri (Ozarbayjon)da o'tkaziladigan Jahon litsenzion turnirida o'ynaladi.
Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.