OChL guruh bosqichining 3-turida Toshkentning «Bunyodkor» jamoasi o'z maydonida yana ochko yo'qotdi. Avvalgi uy uchrashuvida mag'lubiyatga uchragan «qaldirg'ochlar» bu safar Eronning «Zob-Ohan» klubi bilan nursiz durangga imzo chekishdi.
«Qaldirg'ochlar» hozirda 2 ochko to'plagan holda o'z guruhlarida 3-o'rinni egallab turishibdi. Hali keyingi bosqich masalasini ijobiy hal etish uchun imkoniyat bor. Bundan qay darajada foydalanish futbolchilar va murabbiylarning o'zlariga bog'liq. Biz Toshkentdagi o'yindan so'ng «Bunyodkor» yarim himoyachisi Aleksandr Alimpievichdan intervyu oldik.
- Bugungi o'yininglarni qanday izohlaysiz? Faqat omadsizlikmi yoki boshqa sabablari ham bormi?
- Menimcha, muvaffaqiyatsizlikning asosiy sababi - omadning etishmagani. Yuzaga keltirilgan vaziyatlarning hech bo'lmasa bittasidan unumli foydalanganimizda, hisob boshqacha ko'rinish olardi. Inkor etmayman, birinchi bo'limda ustunlik biroz raqiblarimiz tomonida bo'ldi. Jamoamiz ikkinchi bo'limni shiddatli hujumlar bilan boshladi. Ayniqsa, dastlabki 10 daqiqa mobaynida golga tortadigan bir nechta qulay vaziyatlar yuzaga keltirildi.
- «Bunyodkor»ning guruhdan chiqish imkoniyatiga qanday baho berasiz?
- Har qanday vaziyatda ham oxirigacha kurashamiz. Buning uchun mehmonda «Zob-Ohan»ni mag'lub etishimiz shart. Aks holda, vaziyat yanada murakkablashadi. Hammasi o'z qo'limizda, harakat qilsak, maqsadga erishamiz. Mana, «Lokomotiv» ham mehmonda g'alaba qozonish mumkinligini isbotladi. Nima uchun biz bu natijani takrorlamasligimiz kerak? To'g'ri, «Zob-Ohan» osonlikcha taslim bo'lmaydi, raqiblarimiz bu o'yinga faqat g'alaba ilinjida tushishadi.
- «Zob-Ohan»dan shunday o'yin kutganmidinglar?
- Albatta, kutgandik. Raqib ishtirokidagi 2-3ta uchrashuvni o'rganib chiqqandik. Ularning asosan pressingga tayangan futbol namoyish etishlari, himoyada mustahkam o'ynashlarini bilardik. Agar to'p kiritishni uddalaganimizda, ularning o'yin uslubi o'zgarib ketardi. Ammo ana shu muhim vazifani ijobiy hal qilolmadik. Bizga tezkor gol etishmadi.
- Ikkinchi bo'limda Doston Hamdamov va Eldor Shomurodovning maydonga tushirilishi «Bunyodkor» hujumlarini keskinlashtirdi. Balki birinchi bo'limda ularning yo'qligi bilingandir?
- Shunday desa ham bo'ladi. Hamdamov jarohati sabab bugungi o'yinda maydonga tushmasligi kerak edi. Lekin vaziyat taqozo qilgani uchun ikkinchi bo'limda uni o'ynatishdi. Shunda ham Doston ukol ta'sirida to'p surdi. Shomurodov esa o'yinlar sonining ko'pligidan charchab qolgandi. Ikkala futbolchi ham mavsum boshlanmay turib, juda ko'p uchrashuvlarda maydonga tushishdi. Oqibatda, charchoq alomatlari yaqqol ko'zga tashlanib qoldi. Ular juda yosh. Bunday yoshda ham terma jamoada, ham klubda ketma-ket o'yinlar o'tkazish futbolchini toliqtirib qo'yadi.
Davomi InterFUTBOL gazetasi blogida.
— deya xabar beradi uff.uz nashri.