“Olmaliq” jamoasi Oliy liganing uchinchi turida Navoiyning "Qizilqum" jamoasiga qarshi maydonga tushadi. Kon-metallurgiya sanoati homiyligi ostida ishtirok etuvchi ikki jamoa o'rtasida bahslar doimo qiziqarli va kurashlarga boy tarzda kechgan. Bu ikki jamoa shu kungacha elitada 16 marta uchrashgan. 8 uchrashuvda jamoamiz g'alaba qozongan, 2 o'yin durang va 6 bahsda navoiyliklar g'olib bo'lishgan. To'plar nisbati - 28-23 jamoamiz foydasiga. "Olmaliq"ning "Qizilqum" maydonidagi uchrashuvlari statistikasi esa quyidagicha: 1 g'alaba, 1 durang va 6 mag'lubiyat. To'plar nisbati - 10-18. Bu ikki jamoa safida ham bir qator futbolchilar turli davrlarda to'p tepishgan. 2 aprel kuni jamoamizga qarshi bir qator sobiq futbolchilar maydonga tushishi mumkin. "Qizilqum" tarkibida 2016 yilda ro'yxatdan o'tgan Akmal Rustamov, Georgiy Kvesieshvili, Sherali Jo'raev, Samandar Shodmonov va Sobir Usmonxo'jaevlar turli yillarda "Olmaliq" sharafini himoya etgan. Shuningdek, hozirda jamoamiz tarkibida bo'lgan Ruslan Vagapovda ham sobiq jamoasiga qarshi to'p tepish imkoniyati mavjud. Bu bahsni boshqarib boruvchi hakam borasida ham ma'lumotlar bor. Olim Tolibjonov bunga qadar bir marta bu ikki jamoa o'rtasidagi bahsda bosh hakamlik qilgan. 2012 yil Zarafshon shahrida "Qizilqum" 2:1 hisobida g'alaba qozongan. San'at Shixov va G'ulom O'runov mezbonlarga g'alaba kelturuvchi ikki golga mualliflik qilgan bo'lsa, Zafar Polvonov javob to'pi muallifi bo'lgandi. Umumiy statistika bo'yicha Tolibjonov jamoamizning safarda 5 uchrashuvini boshqargan ekan. Shundan 1 o'yinda g'alaba ("Navbahor" 1:0, 2010y), 1 durang ("Sho'rtan" 1:1, 2013y) va 3 bahsda mag'lubiyat ("Paxtakor" 0:1, 2011y, "Qizilqum" 1:2, 2012y, "Lokomotiv" 0:3, 2013y) qayd etilgan. "Qizilqum"ning o'z maydonidagi uchrashuvlarda Tolibjonov hakamligida 6 o'yindagi statistika quyidagicha: 1 g'alaba ("Olmaliq" 2:1, 2012y), 4 durang ("Dinamo" 1:1, 2013y, "Mash'al" 0:0, 2014y, "Buxoro" 1:1 2014y, "Metallurg" 1:1 2015y) va bir mag'lubiyat ("Paxtakor" 1:4 2014y).
— deya xabar beradi uff.uz nashri.