Futbol…
Bu so'zga ko'zimiz tushar ekan muxlislar hayqirig'i, futbolchilar shijoati, kimningdir baxtli onlari va kimlar uchundir alamli damlar ko'z oldimizda gavdalanadi. Shu so'z ostida sal kam bir yarim asrlik tarix mujassam. Shunchalik darajada bizni o'ziga bog'lab qo'yadiki, vaqti kelib yig'lashga ham majbur qiladi.
Muxlislik qilayotgan jamoangiz mag'lubiyati siz uchun ham mag'lubiyatdek go'yo. Nega? Shu savol doim milliardlab insonlar hayolidan o'tgan bo'lsa, ne ajab. Nega aynan shu sport turi yuraklarni larzaga keltiradi. Mana masalan, boks, basketbol, tennis va boshqa sport turlari nomi hayolingizdan o'tkazing. Baribir futbolchalik jarangli va ma'noli eshitilmaydi. Bu sport turi asos solinganida milliardlab insonlar qalbidan joy olishi hech kimni hayoliga kelish uyoqda tursin, etti uxlab tushiga ham kirmagan edi.
O'zi odam zoti shunday bo'lar ekan. Nimadir bilan mashg'ul bo'lmasa, nimagadir ko'ngil bermasa yoki qiziqmasa ko'ngli joyiga tushmaydi. Futbol bu borada ayni muddao bo'ldi. Odamlardagi bu ehtiyojni qondirish uchun bir ovunchoq vazifasini o'tamoqda. U o'z muxlislarining kun tartibidan joy oldi. Masalan, tasavvur qiling siz “Real Madrid” muxlisisiz, odamlardan holi erlarga ish bilan ketgansiz. Ana o'sha kuni El-klassiko. Sizda o'yinni ko'rishga imkoniyat yo'q. Mayli bunga chidarsiz. Lekin sizda internet ham yo'q deylik. O'yin yakunlangandan so'ng qachongacha hisob qanday bo'lganini bilmay yurishga bardosh bera olasiz? Oxiri “yorilib” ketasiz. Hech bo'lmasa biror do'stingizga qo'ng'iroq qilib hisobni bilishga harakat qilasiz.
Yana o'sha savol… nega? Bunga sizni nima majbur qiladi? Shu ma'lumotsiz yashashni iloji yo'qmi? Qaysidir ma'noda yo'q deya olamiz. Sababi futbol sizning hayotingizning bir qismi, so'nggi imkoniyatingiz qolgunicha undan xabar olishga harakat qilasiz. Bu sport turi shunchalik qudratliki, katta-katta auditoriyalarni tashkil qiladi. Futbol millionlar o'yini? Yo'q endi futbol milliardlar o'yini! Milliard deganda sarf qilinayotgan harajatlar bilan birgalikda o'z auditoriya kengligini ham anglatadi.
Savol…
Dunyo miqyosida necha kishi futbolga be'etibor emas deb o'ylaysiz? Bu qiymat milliardlarda hisoblanadi, kamida 3 milliard. Bu degani sal kam dunyoning 50% aholisiga teng. Futbolning vazifasi shunchaki bir sport turi emas, ayni damda biznes, madaniyat, siyosat va kimlardir uchun xobbiga aylanib ulgurdi. Bu sport turi hozirga kelib oddiygina “institut”dan “universitet”ga aylandi. Sababi avval faqatgina sport turi bo'lgan bo'lsa, endi yuqorida aytib o'tganimizdek ko'pgina yo'nalishlarni o'z ichiga qamrab oldi.
Ammo bir jihat borki, u bu futbolni ko'klarga ham ko'tara oladi va kerak bo'lsa er bilan bitta qilishga ham qodir. Ha to'g'ri topdingiz bu – muxlislar. Dunyo yulduzlarini bir yerga jamlab, bo'm-bo'sh stadionda o'yin o'tkazingchi, kimga qiziq bo'lar ekan. Mashg'ulotdan farqi qolmaydi. O'ta qattiqqo'l ham, haddan ziyod mehribon ham bu muxlislardir. Evropa futbolida o'z klubidan ko'ngli qolgan muxlislar futbolchilarga tosh otishgacha borishganini ko'p bora guvohi bo'lganmiz.
Aynan o'sha muxlislar vaqti kelib klubi uchun borini ham berishga tayyor! Uzoqqa ketmaymiz, o'z yurtimiz misolida. Ming afsuski, chorak asrdan buyon mundial havosidan bahramand bo'la olmayapmiz. Har bir yo'qotilgan imkoniyatdan so'ng, muxlislar futbolchilar haqida istaganlarini gapirib, o'zbek futbolini boshqa ko'rmaslikka qaror qilganlari ham bo'ldi. Lekin muxlislik shunday kasallikki, baribir o'z jamoasiga ko'ngil tortaveradi.
Davomi Penalti.uz blogida.
— deya xabar beradi uff.uz nashri.