JCh-2018 saralashi doirasida O'zbekiston va Bahreyn terma jamoalari o'rtasida kechadigan o'yin oldidan o'tkazilgan matbuot anjumanida raqib jamoa bosh murabbiyi Serxio Batista va futbolchi Xumaer Asval ishtirok etdi. 
Serxio Batista: Yamanga qarshi kechgan o'yinda ancha o'zimizga kelib oldik. Jamoamiz bu o'yinga kuch saqlashga ham muvaffaq bo'ldi. Biz O'zbekistonga qarshi kechadigan o'yinga tayyormiz. Biz juda kuchli raqibga qarshi maydonga tushamiz va O'zbekiston terma jamoasi uch ochko uchun o'ynashiga ishonamiz. Shu bilan birga biz ham g'alaba uchun bu erga kelganmiz. Yamanga qarshi kechgan o'yin allaqachon yoddan chiqarildi va ertaga bo'ladigan o'yinga tayyormiz.
Xumaer Asval: Biz uchun bu o'yin odatdagi bir bahs bo'ladi va odatdagidek g'alaba uchun maydonga tushamiz. Uchrashuv qay darajada og'ir kechishini bilamiz va biz bunga tayyormiz.
- Ertaga bo'ladigan o'yinda kuchli jismoniy tayyorgarlik ham talab qilinadi. Bunday o'yinga qay darajada tayyorsiz?
- Biz nafaqat jismonan, balki taktik va ruhiy jihatdan ham juda yaxshi tayyorgarlik ko'rganmiz. O'zbekiston qay darajada kuchli ekanini yaxshi bilamiz va shunga monand tayyorgarlik olib borganmiz.
- O'zbekistonga qarshi kechgan dastlabki bahsdan so'ng ancha vaqt o'tdi va bu vaqt oralig'ida jamoangizda qanday o'zgarishlar bo'lgan?
- O'zgarishlar bo'lgan, ammo jamoamizning asosiy falsafasi aniq bo'lib qolaveradi. Har qancha o'zgarishlar bo'lmasin, bizning maqsadimiz o'zgarishsiz qolaveradi.
- Ertaga yomg'ir yog'ishi haqida xabarlar bor. Maydon holati bilan tanishdingizmi va ertaga yomg'ir yoqqan taqdirda jamoangiz bunday sharoitda o'ynashga tayyormi?
- Ertaga yomg'ir yog'masa, juda yaxshi bo'lar edi. Ammo biz yomg'irli havoga ham tayyormiz. Jamoamiz har qanday sharoitda to'p surishga tayyor. Ertaga stadionga keladigan muxlislar ham chiroyli o'yin ko'rish niyatida bo'lishi tabiiy. Agar maydon quruq bo'lsa, chiroyli o'yin namoyish etgan bo'lar edi.
- Ertaga Bahreyn qarshi hujumga asoslangan himoyaviy o'yin namoyish qilsa kerak. Yoki jamoangiz ochiq, hujumkor o'yin namoyish etishga jur'at eta oladimi?
- Bizning asosiy falsafamiz, qaerda to'p surishimizdan qat'iy nazar - hujumkor o'yin namoyish qilish va g'alaba qozonish. Shu bilan birga O'zbekiston terma jamoasining salohiyati va kuchini yaxshi bilamiz hamda unutmaslikka harakat qilamiz. Ammo biz uch ochko uchun hujum qilish lozimligini ham yaxshi bilamiz.
- 1986 yilda g'alaba qozongan Argentina terma jamoasi futbolchisi bilan ko'rishib turganimizdan xursandmiz. Savolim quyidagicha: ilgari Bahreyn ancha kuchli hisoblanardi, ammo oxirgi vaqtlarda jamoa kuchi biroz pastlagandek. Bahreyn klublari hozir faqat OFK Kubogi bilan cheklanmoqda. Balki termaning kuchsizlanishiga sabab shundadir...
- JCh bilan bog'liq xotiralaringiz uchun rahmat. O'zbekistonda ekanimdan xursandman. Bahreynga kelganimda endi 10 oy bo'ldi va bu vaqt oralig'ida Bahreyn futbol federatsiyasi yordami bilan ijobiy o'zgarishlar qilishga intilmoqdamiz. Yana bir narsani aytish lozim, oxirgi vaqtlarda nafaqat Bahreynda, balki butun dunyoda futbol o'zgardi. Bahreynda futbolni kuchaytirish uchun ko'p ishlash kerakligini bilamiz. Oxirgi vaqtlarda zamon taqozosi bilan kuchayishda davom etish zaruriyati tug'ildi va biz buni his qilib turibmiz. Buning uchun tezis va loyihalarga egamiz. Ular amalga oshirigan taqdirda Bahreyn yana etakchilar orasiga qaytadi.
- Aynan shu savolga futbolchi ham javob qaytarsin. Biz ilgari Talal Yusuf va Xubayl kabi futbolchilardan qo'rqib turardik, ammo hozir Bahreynda bunday futbolchilar yo'qdek. Bunga sabab nimada?
- Albatta bu futbolchilar Bahreyn uchun afsonaviy o'yinchilar. Biz ularga havas qilamiz. Bahreynda yangi avlod o'sib kelmoqda. Umid qilamanki, Serxio Batista termamiz boshqaruvida mana shunday ishlab tursa, yana o'sha Xubayl kabi futbolchilar etishib chiqadi.
— deya xabar beradi uff.uz nashri.