Bugungi kunda millionlab boks muhlislarining diqqat e'tiborlari Xitoyning Kuinan shahri (Xitoy)da XXXI yozgi Olimpiada o'yinlarining yo'llanmalari uchun o'tkazilayotgan Osiyo va Okeaniya qo'shma litsenzion chempionatiga qaratilgan desak mubolag'a bo'lmaydi.
29 mart kuni bu erda chorak final janglari o'tkazilib, barcha 13 vazn toifasida yarim finalga yo'llanma olgan 52 nafar sportchining nomi ma'lum bo'ldi.
Qoidaga ko'ra, mazkur chempionatda har bir vazn toifasida 1-3 o'rinlarni egallaganlar “Rio-2016” o'yinlarining yo'llanmasiga ega bo'ladilar. Ya'ni, finalga etib kelgan sportchilar to'g'ridan-to'g'ri Olimpiada o'yinlariga yo'llanma olsalar, yarim finalda mag'lub bo'lgan sportchilar uchinchi litsenziya uchun o'zaro kuch sinashadilar.
Quvonarlisi, chorak final janglarida ringga ko'tarilgan etti nafar charm qo'lqop ustalarimizning barchasi g'alaba qozonib, yarim finalga chiqdilar.
Endi charm qo'lqop ustalarimiz oldida yana bir o'ta mas'uliyatli bahs turibdi. Umid qilamizki bokschilarimiz hal qiluvchi janglarda ham muvaffaqiyatli ishtirok etib, o'z oldilariga qo'ygan maqsadga erishadilar.
Agarda erkaklar terma jamoamizda yarim finalga etib kelgan olti nafar bokschimizning barchasi hal qiluvchi janglarda g'alabalarni qo'lga kiritsalar, Olimpiada o'yinlarida erkaklar terma jamoamiz barcha 10 ta vazn toifasida ishtirok etadi.
Eslatib o'tamiz, 2015 yili Doha (Qatar)da bo'lib o'tgan jahon chempionatida 4 nafar charm qo'lqop ustalarimiz - bular Murodjon Axmadaliev (-56 kg), Elnur Abduraimov (-60 kg), Fazliddin G'oipnazarov (-64 kg) va Bektemir Meliqo'ziev (-75 kg) “Rio-2016” Olimpiada o'yinlariga yo'llanmalarni qo'lga kiritishgan edi. 
Maqolaning to'liq qismi bilan ushbu havola orqali tanishib olishingiz mumkin...
— deya xabar beradi uff.uz nashri.