Xitoyning Kuinan shahri (Xitoy)da XXXI yozgi Olimpiada o'yinlarining yo'llanmalari uchun o'tkazilayotgan Osiyo va Okeaniya qo'shma litsenzion chempionati hal qiluvchi pallaga kirdi.
Yana bir necha daqiqalardan so'ng (Toshkent vaqti bilan soat 11:00da) ushbu musobaqaning yarim final janglari boshlanadi va biz boks bo'yicha Osiyo va Okeaniyadan “Rio-2016” o'yinlariga yo'llanma olgan navbatdagi 26 nafar sportchining nomini bilib olamiz. Qolgan yana 13 nafar bokschining nomi uchinchi o'rin uchun kechadigan bahslardan so'ng aniqlanadi.
Bugun ringga ko'tariladigan jami 52 nafar charm qo'lqop ustalarining 7 nafari O'zbekiston terma jamoasi a'zolari hisoblanadi. Sportchilarning yarim finalga qadar etib kelishi bo'yicha mamlakatimiz vakillari mezbonlardan (8 nafar) keyin turishibdi.
Umuman bugungi yarim final janglarida mezbonlarlardan 8 nafar, O'zbekiston va Qozog'istondan 7 nafardan, Mo'g'ilistondan 5 nafar, Filippindan 4 nafar, Qirg'iziston, Hindiston, Tailand va Avstraliyadan 3 nafardan, Xitoy Taypeyidan 2 nafar, Yaponiya, Eron, Iordaniya, Tojikiston, KXDR, V'etnam va Turkmanistondan bir nafardan bokschi ringga chiqadi.
Yarim finalda mamlakatimiz sportchilaridan Hasanboy Do'smatov (-49 kg) mo'g'ilistonlik Gan-Erden Ganxuyag, Shahobiddin Zoirov (-52 kg) qirg'izistonlik Azat Usenaliev, Shahram Giyasov (-69 kg) filippinlik Santos Marsial, Elshod Rasulov (-81 kg) qirg'izistonlik Erkin Adilbek ulu, Rustam To'laganov avstraliyalik Jeyson Vateley, Bahodir Jalolov (+91 kg) eronlik Abdulmajid Sepaxvandi, Yodgoroy Mirzaeva (-51 kg) esa Xitoy Taypeyi vakili Yu Ting Lin bilan bahs yuritadilar.
Eslatib o'tamiz, 2015 yili Doha (Qatar)da bo'lib o'tgan jahon chempionatida 4 nafar charm qo'lqop ustalarimiz – Murodjon Axmadaliev (-56 kg), Elnur Abduraimov (-60 kg), Fazliddin G'oipnazarov (-64 kg) va Bektemir Meliqo'ziev (-75 kg) “Rio-2016” Olimpiada o'yinlariga yo'llanmalarni qo'lga kiritishgan edi.  Maqolaning to'liq qismi bilan quyidagi havola orqali tanishib olishingiz mumkin...
— deya xabar beradi uff.uz nashri.