O'zbekiston milliy terma jamoasi himoyachisi Vitaliy Denisov FIFA rasmiy saytiga intervyu berdi va JCh saralashi bahslari haqida fikr bildirdi. "Lokomotiv" himoyachisi terma jamoadagi faoliyati haqida gapirarkan, muxlislar qiziqishiga alohida e'tibor qaratgan. Xususan Denisov KXDRga qarshi kechgan va 3:1 hisobida yakunlangan o'yin haqida shunday deydi:
- Men terma jamoada anchadan buyon o'ynayman, ammo hozirgidek ajiotajni eslay olmayman. Terma jamoa o'yinlari oldidan anshlag ilgari ham kuzatilar edi, ammo bu safar nafaqat stadion muxlislar bilan liq to'ldi, balki atrofdagi daraxtlarga ham odamlar chiqib, o'yinni tomosha qilishga harakat qildilar, - deydi 29 yoshli himoyachi.
Shu bilan birga Vitaliy JCh-2018ga chiqish orzusi haqida shunday deydi:
- Men O'zbekistonda tug'ilgan rus yigitiman va Rossiyada o'zbek futboli sha'nini himoya qilmoqdaman. Umid qilamanki, bu ishni yaxshi uddalayapman. Va men Rossiyada bo'ladigan jahon chempionatida ishtirok etishni juda istayman. Bu juda o'zgacha imkoniyat va u qaytib kelmasligi aniq.
Vitaliyning otasi Genaddiy Denisov o'z vaqtida "Paxtakor" sharafini himoya qilgan va 371 o'yinda maydonga tushib, bu borada rekord o'rnatgan edi: "Otam meni hech qachon futbol bilan shug'ullanishga majbur qilmagan. Ammo har doim maslahatlari bilan yordam bergan. Ayniqsa 13 yoshimda, o'zim uchun begona bo'lgan o'lkaga ketayotganimda uning maslahatlari juda asqotgan edi. Moskvadek katta shaharga kelar ekansan, hayratga tushishing turgan gap. Bunday vaqtda eng muhimi - yovvoyi shiddatga ko'nika olish", - deydi Vitaliy Rossiyaga ketishi oldidan otasi bergan maslahatlarni eslar ekan.
Vitaliy Denisov hozirda "Lokomotiv" sharafini himoya qilmoqda va uning eng kuchli jihatlaridan biri - autdan to'pni juda uzoqqa otib berishi. Bu borada uning o'zi shunday deydi:
- To'pni uzoqqa otishni qachon o'rganganimni eslay olmayman. Har holda otamdan o'rganmaganim aniq - u autni bu qadar uzoqqa otmas edi. Bu ishni bolaligimdan yaxshi uddalaganman. Balki basketbol ko'p o'ynaganim qo'l kelgandir...
Denisov o'z Vatani haqida juda iliq fikr bildiradi. Shu bilan birga futbol borasida katta yutuqlar qo'lga kiritilmaganini ham tan oladi. Himoyachining fikricha, buning uchun Evropaning kuchli termalari bilan o'rtoqlik o'yinlari o'tkazish kerak.
- Bizning mamlakatimiz turizm sohasida katta yutuqlarga erishgan. Yurtimizda Buxoro, Xiva va Samarqand kabi qadim shaharlar bor va Evropadan keladigan sayyohlar bu shaharlarni juda yaxshi biladilar. Ko'pchilik Buyuk Ipak yo'li orqali shaxsiy avtomobilida sayohatga chiqadi.
Ammo futbol tomonlama O'zbekiston bu qadar mashhur deya olmayman. Biz bir necha jiddiy g'alabalarga erishganmiz: Osiyo chempionatlarida favoritlar sirasiga kiramiz, kuchli to'rtlik-beshlikda yuramiz. O'smirlar terma jamoamiz esa 2011 yilda Osiyo chempioni bo'lgan. Shu bilan birga "Bunyodkor" Rivaldoni taklif etganida butun dunyoda tilga  tushgan edi. Ammo futbol borasida hali u qadar mashhur emasmiz. Balki bunga erishish uchun Evropaning kuchli termalari bilan o'rtoqlik o'yinlari o'tkazib turish kerakdir. Federatsiyamiz bu borada ish olib bormoqda. Ammo futbolimiz uchun eng yaxshi reklama shubhasi JCh yo'llanmasi bo'lar edi, - deydi Denisov bu borada.
O'zbekiston terma jamoasi JCh-2014 yo'llanmasi uchun pley-off bahsida Iordaniyaga qarshi maydonga tushgan edi. Afsuski o'sha bahs penaltilar seriyasiga ko'ra 8:9 hisobida mag'lubiyat bilan yakunlandi. Denisovning o'zi o'sha o'yinni eslashni yoqtirmaydi.
- O'sha vaqtda o'zimdan o'tganini o'zim bilaman. Alamimni tushuntirib berish uchun so'z topishim juda qiyin. Bizga ozgina omad etmay qolgan edi, bittagina, yagona gol..."
O'zbekiston futboli oxirgi yillarga kelib Osiyoda katta kuchga aylandi.
- Sobiq ittifoq barham topgandan so'ng ko'plab mamlakatlarda futbol muammolarga uchradi. Moliyaviy barqarorlik har doim ham etishmas edi va imkon qadar futbol tizimini yaxshilashga urinardik. Vaqt o'tgani sari muammolar barham topmoqda, ko'plab klublar xorijda yig'in o'tkazishyapti va kuchli klublarga qarshi o'rtoqlik o'yinlarida maydonga tushishmoqda. Natijada hozir iqtidorli yoshlar tarbiyalanyapti va ular to'p surish uchun xorijga yo'l olmoqdalar.
O'zbekiston terma jamoasi JCh-2018 saralashini KXDRga qarshi kechgan va 2:4 hisobidagi mag'lubiyat bilan yakunlangan omadsiz o'yin bilan boshlagan edi.
- Shundan so'ng terma boshqaruvida o'zgarish bo'ldi va Samvel Babayan bosh murabbiy etib tayinlandi. U o'yin uslubi va taktikani o'zgartirdi, yangi futbolchilar jalb qildi. Oqibatda ketma-ket g'alabalarga erisha boshladik.
Futbol borasida ko'p yaxshi o'zgarishlar amalga oshirilgan. Mundialga yo'l olsak futbolchilarimizni butun dunyoda taniy boshlaydilar va ko'plab insonlar yurtimizni kelib ko'rishni istab qolarlar. Buning uchun biz qattiq mehnat qilishimiz kerak, - deydi Vitaliy Denisov JCh yo'llanmasi qay darajada muhimligi haqidagi savolga javob berarkan.
— deya xabar beradi uff.uz nashri.