29 mart kuni o'tkazilgan O'zbekiston – Bahrayn uchrashuvini bevosita “Bunyodkor” stadionining VVIP lojasida kuzatgan frantsiyalik mashhur sobiq futbolchi bugun poytaxtimizdan Madridga uchib ketdi.
“Barselona” va “Real” o'rtasidagi 2 aprel kungi El-Klassikoga sanoqli kunlar qolganligiga qaramay, madridliklar bosh murabbiyi yurtimizga O'zbekiston terma jamoasining hozircha ismi sir tutilayotgan futbolchisining o'yinini ko'rishga kelgandi.
Yodingizda bo'lsa, Zidan bundan bir necha yil oldin ham Toshkentga tashrif aylab, “Kelin-kuyov” teleshousi muallifi va boshlovchisi Soat Sharipovning taklifiga binoan, ushbu ko'rsatuvda ishtirok etib qaytgandi. O'zining o'sha xotiralarini esga olib, “Real” ustozi bu gal ham Soat Sharipov bilan uchrashuvda bo'ldi va ular bir necha yil oldingi voqealarni maroq bilan yodga olishdi.
- Mesyo Sharipov, siz nafaqat O'zbekistondagi, balki butun dunyodagi eng tez gapiradigan shoumenlardan birisiz, - dedi Zidan. – Siz qanchali tez gapirsangiz, men o'z futbolchilarim shunchali tez yugurishlarini xohlayman. Shuning uchun futbolchilarimga siz bu borada saboq berib, ular yanada tez yugurishlariga hissangizni qo'shishingizni istardim...
Fursatdan foydalanib, Zidan do'sti Soat Sharipovni UEFA Chempionlar ligasi chorak final bellashuviga taklif qildi va unga 12 aprel kuni bo'ladigan “Real” – “Volfsburg” uchrashuvi uchun chiqarilgan VIP chiptalarini tuhfa etdi. Shuningdek, Zidan tomonidan taqdim etilgan koptokka javoban, Soat Sharipov ham, ramziy ma'noda, jahon futbol yulduziga esdalik uchun soat sovg'a qildi.

— deya xabar beradi uff.uz nashri.