Samvel Babayan boshchiligidagi O'zbekiston milliy terma jamoasi ilk marta jiddiy sinovdan o'tdi. Bahraynga qarshi o'yin hal qiluvchi bosqich oldidan jamoamizning holatini tekshirib olish imkoniyatini berdi.
TAYYoRGARLIK VA TARKIB
Filippinga qarshi kechgan bahsdan keyin bo'lib o'tgan matbuot anjumanida Samvel Babayan savollarga javob berarkan, agar 9-tur doirasidagi o'yinlar yakunlanganidan keyin O'zbekistonning keyingi bosqichga chiqish masalasi 100 foiz aniq bo'lsa, so'nggi turda tarkibda o'zgarishlar qilishi mumkinligini ta'kidladi. Ammo 24 mart kuni bu masala hal bo'lmadi. Natijada, Babayan Bahraynga qarshi o'yinga tayyorgarlikni yana o'zi ishongan 11-12 nafar futbolchini mo'ljallagan holda olib bordi.
So'nggi turda tarkibda o'zgarishlar qilish nima uchun kerak edi? Avvalo, Filippinga qarshi o'yinda ishonchni oqlamagan futbolchilarning o'rniga boshqalarga imkon berilsa, yomon bo'lmasdi. Jumladan, Sanjar Tursunov ancha vaqtdan beri terma jamoada o'z imkoniyatini kutyapti. Babayan terma jamoani qo'lga olganidan keyin hozirda «Umm-Salal» sharafini himoya qilayotgan futbolchi 2ta bahsda o'yin tugashiga 2 va 9 daqiqa qolganida zaxiradan tushdi, xolos.
Qatar chempionatida doimiy o'yin amaliyotiga ega bo'lib, bir nechta gollarga assistentlik qilgan Sanjar, nazarimizda, Toshkentdagi ikki uchrashuvning hech bo'lmasa bittasida o'ynashga haqli edi. Boz ustiga, uning o'rnida harakat qilgan Eldor Shomurodov ikkala o'yinda ham o'zidan yaxshi taassurot qoldira olmadi. «Bunyodkor» futbolchisi na funktsional jihatdan, na jamoaviy o'yin tomonidan terma jamoaga munosib ekanini isbotlay oldi.
MUDDATIDAN AVVAL YO'LLANMA
Bahraynga qarshi o'yin boshlanishiga 2 soat qolganida O'zbekiston termasi saralashning keyingi bosqichiga chiqqani hal bo'ldi. Avst-raliya o'z maydonida Iordaniyani mag'lub etganidan keyin bosh jamoamiz guruhda 2-o'rinni egallasa ham, nazariy jihatdan saralashning 3-bosqichiga chiqishi aniq bo'ldi. Mana shu holat futbolchilarga ruhiy ta'sir qildi, shekilli, vakillarimizning o'yini chiqmadi. Babayan futbolchilardan yuqori kontsentratsiya va ishtiyoq bilan o'ynashni qanchalik so'ramasin, baribir, o'yinchilarimiz sust harakat qilishdi.
Mana shunday pallada, terma jamoada o'z vaqtini kutayotgan futbolchilarga imkoniyat berilsa, ular o'zlarini ko'rsatish maqsadida bor kuchlari bilan harakat qilgan bo'lisharmidi, degan fikr o'tadi kishidan. Balki murabbiy qaysidir yangi futbolchini zaxiradan tushirishni rejalashtirgandir, ammo Vitaliy Denisov jarohat olib maydonni erta tark etishi bu rejani ham yo'qqa chiqardi. Chap qanot himoyasini egallagan Stanislav Andreev qolgan daqiqalarda yomon harakat qilmadi. Ikkinchi bo'limda o'sha kutilgan Hasanov maydonga tushgan bo'lsa, vaziyatdan kelib chiqib murabbiy Sohibovni ham o'yinga tashladi.
Jamoamiz Bahrayndan bunday qarshilikni, bunday o'yinni kutmaganini termamiz sardori Odil Ahmedov uchrashuvdan keyin ta'kidlab o'tdi. Bu jiddiy muammo va jiddiy ogohlantirish qo'ng'irog'i. Keyingi bosqichda kuchli jamoalar to'pni nazorat qilib, bizga nisbatan bosim o'tkazishsa, o'yinimiz butunlay sochilib ketishi mumkin ekan. Shundaymi?
TANAFFUS VA UNING KUChI
Futbolchilar tanaffusga chiqib ketgan paytda Filippin-KXDR o'yini yakuniga etdi va bu bahsda mezbonlar 3:2 hisobida g'alaba qozonishgani aniq bo'ldi. Natijada, terma jamoamiz muddatidan 1 soat avval guruh peshqadamligini ham hal qilib bo'ldi. Osiyo kubogi-2019 saralash guruhida to'g'ridan-to'g'ri ishtirok etishi uchun Bahrayn guruhda 3-o'rinni egallashga harakat qilishi tayin edi. Buning uchun jamoa Toshkentda kamida 1 ochko olishi talab etilishini inobatga olsak, ikkinchi bo'limda raqib o'z o'yinini yanada kuchaytirishi, muddatidan avval guruh peshqadamligini qo'lga kiritib bo'lgan o'zbekistonliklar yanada xotirjamlikka berilishini kutish mumkin edi.
15 daqiqalik tanaffus chog'ida Samvel Babayan kiyinish xonasida futbolchilar bilan qanday ish olib bordi, bilmadigu, har holda, uning ta'siri ikkinchi bo'limning dastlabki 15 daqiqasiga etdi. Xayriyatki, bu vaqt davomida terma jamoamiz gol urishga muvaffaq bo'ldi. Rashidov o'zi ega bo'lgan ikkita imkoniyatdan birini golga aylantirdi. Anzur Ismoilov maydon markazida bosh bilan to'pni oldingi chiziqqa etkazdi va Rashidov uni egalladi. Shundan so'ng futbolchimiz to'g'ri hujum yo'nalishini tanlaganini ta'kidlash lozim: u dastlab ikki himoyachi ta'qibidan qochdi va zarba bermoqchi bo'lganida uchinchi himoyachining «podkat» tashlayotganini ko'rdi. Sardor uni ham aldashga qaror qildi va o'z vaqtida zarba berdi. To'p darvozabon oldida sakragani uchun ham Abbos Ahmad zarbani qaytara olmadi.
Davomi InterFUTBOL gazetasi blogida.
— deya xabar beradi uff.uz nashri.