«Tulkilar» jamoasi finish yaqinlashgan sari APL chempionligi iforini his etayotgan bo'lsa, ajabmas. Oxirgi damlarda «Lester»ga qiziqish eng yuqori cho'qqiga chiqqani ham ayni haqiqat. Demak, bugun kamtarin klubni nazorat qilayotgan shaxs bilan tanishamiz. Vishay Shrivaddanaprabxa o'yinlardan so'ng shaxsiy vertolyotida uchib ketadi, u «Lester» stadioniga doimiy ravishda budda rohiblarini taklif etadi va Klaudio Raneri shogirdlarini har bir muvaffaqiyat uchun munosib taqdirlaydi. Angliyada joriy mavsum davomida bir qo'polroq latifa to'qildi: 2036 yil. - Otajon, 2016 yili «Lester» chempion bo'lganini eslay olasizmi? Bu qanday ro'y bergandi? - Hmm.. Hammasi Nayjel Pirsonning o'g'li va osiyolik qiz o'rtasida yuzaga kelgan mojaro bilan boshlangandi... Xullas, latifaning kulguli tomoni yo'q. Inglizlar shu orqali yozda ko'tarilgan janjal va uning ijobiy ta'siriga sha'ma qilishgan. Klub obro'sini muxlislar mehrini qozongan va «tulkilar»ni katta jasorat bilan quyi ligaga tushib ketishdan saqlab qolgan murabbiynikidan ustun qo'ygan shaxs - bu Vishay Shrivaddanaprabxa. U Nayjel Pirsonni iste'foga chiqargach, bu qarori ko'pchilik tomonidan yaxshi qabul qilinmagandi. Shuning barobarida klub sohibini qo'llaganlar ham topilgandi? Xo'sh, Jeymi Vardi, Riyod Mahrez va Klaudio Raneri bilan birga yangi tarix yozayotgan Shrivaddanaprabxa kim? 58 yoshli biznesmen, tailandlik. Milliy duty-free do'konlar tarmog'i sohibi. King Power, deb ataluvchi tarmoq Bangkok aeroportlarida o'ziga xos mavqega ega. Vishay AQSh va Tayvan (Xitoy Taypeyi)da tahsil olgan. Oilali, 4 nafar farzandi bor. Ayni payt Tailandning eng boy 10 nafar fuqarosidan biri. Forbes Vishay Shrivaddanaprabxaning boyligini 3,2 milliard dollarga baholagan. Aslida Vishayning familiyasi Raksriaksorn edi. Faqat, 2013 yilning fevralida biznesmen oilasi Tailand qirolidan sovg'a tariqasida yozilishi va o'qilishi ancha murakkab yangi familiya oldi - Shrivaddanaprabxa. Mahalliy an'anaga ko'ra, Tailand hukmdori ulkan yutuqlarga erishgan fuqarolarni faxriy familiya bilan taqdirlaydi. «Shrivaddanaprabxa» iborasi «Uzoq muddatli muvaffaqiyat yo'lini o'zlashtirgan oila» ma'nosiga ega. Umuman, tailandlik tadbirkor «Lester»ni 2010 yili Milan Mandarichdan sotib olgandi. Aniqrog'i, kelishuv King Power klubning bosh homiysiga aylanganidan bir necha hafta o'tgach, rasmiylashtirilgan. Vishay avvaliga London klublaridan birini xarid qilishni mo'ljallagan. Biroq o'g'li - Ayavattning aytishicha, «Lester» foydasiga qaror chiqarishi uchun stadionda 30 daqiqa o'tirishi kifoya qilgan (Londondan jamoa sotib olish harakati haqidagi xabarni esa, o'g'liga «syurpriz» ulashish maqsadida sir tutgan ekan). Savdo amalga oshganidan yarim yil o'tib, Vishay «Lester»da rais lavozimini egalladi. Shunda ham kelishuv shartlari to'liq oshkor etilmadi. Shrivaddanaprabxa oilasi dastlabki davrda chempionship miqyosida olganda, o'ta katta xarajatlar bilan ko'zga tashlandi. Mablag' asosan Jermeyn Bekford kabi personajlarni taklif etishga yo'naltirildi, shuningdek, biznesmen tajribali Sven-Yoran Erikssonni ishga chorlab, unga to'liq ishonch bildirdi. Lekin keyinchalik shov-shuvli xaridlar keti uzildi, ya'ni Shrivaddanaprabxa biroz tin oldi va jamoa hozirgi holatga keldi. Davomi InterFUTBOL gazetasi blogida.
— deya xabar beradi uff.uz nashri.