90-yillardagi «Barselona»ni «Dream team», ya'ni «Orzular jamoasi» deb atashardi. Haqiqatan ham har bir chiziqda jahonning eng kuchli futbolchilarini jamlagan jamoa chindan ham orzular jamoasi, ularning betakror o'yiniga guvoh bo'lganlar esa orzulari ro'yobini ko'rgan insonlardir. O'yinlari bilan qalblarni zabt etgan o'yinchilar haqidagi ma'lumotlar ko'pchilik uchun qiziqarli bo'lsa kerak. Tafsilot.uz shuni inobatga olgan holda «Barselona»ning 90-yillardagi yulduzlari ayni vaqtda nima bilan shug'ullanayotgani bilan qiziqib ko'rdi.
Andoni Subisarreta («Barselona» safida 1986—1994-yillarda o'ynagan)
«Atletik», «Barselona» hamda «Valensiya»ning afsonaviy darvozaboni faoliyatini yakunlagan zahoti Sandro Rossel tomonidan «ko'k-anor ranglilar»ning sport direktori etib tayinlangan edi. Subisarreta ushbu lavozimda 5 yil ishladi. Xosep Bartomeu Kataloniya klubi boshqaruviga kelgach, uni ishdan bo'shatdi.
Albert Ferrer (1988—1998-yillar)
Albert «Barselona» tarbiyalanuvchisi bo'lib, katalon superklubi safida 200 dan ziyod o'yinda maydonga tushgan. U Kruiff jamoasining muhim o'yinchilaridan biri edi, ammo Lui van Galga to'g'ri kelmadi, natijada faoliyatini Londonning «Chelsi»sida yakunlashiga to'g'ri keldi. 2010 yili Ferrer o'zini murabbiylikda sinab ko'rishga qaror qildi. 2010—2011-yillarda u Gollandiyaning «Vitess» jamoasining bosh murabbiyi bo'ldi. 2014-2015-yilgi mavsumda esa «Kordoba»da ish boshladi, biroq jamoasi 8 o'yinda bor-yo'g'i 4 ochko jamg'argach, u iste'foga chiqarildi. 2015 yili «Malorka» rossiyalik mutaxassis Valeriy Karpinning xizmatlaridan qoniqmay u bilan xayrlashgach, uning o'rniga Albert Ferrer tayinlandi. U ayni paytda mazkur klubda ishlab kelayapti.
Xose Mariya Bakero (1988—1997-yillar)
«Barselona»ning afsonaviy yarimhimoyachisi faoliyatini 34 yoshida Meksikaning «Verakrus» jamoasida yakunladi. 1999 yili mahalliy «Puebla» klubi bosh murabbiyi bo'ldi. So'ngra Bakero «Malaga»ning ikkinchi jamoasi («Malaga B») va «Real Sosedad» futbolchilarini shug'ullantirdi, 2009 yili Polshaga ketdi va Varshavaning «Poloniya», Poznanning «Lex» jamoalariga murabbiylik qildi. 2013 yili Peru Oliy ligasida o'ynovchi «Xuan Aurich» jamoasi bosh murabbiy etib tayinlandi. 2015 yili esa Venesuelaning «Deportivo La Guayra» klubi boshqaruviga o'tirdi. Ammo bu erda uzoq ishlay olmadi.
Xulio Salinas (1988—1994-yillar)
«Orzular jamoasi»ning bosh masxarabozi «Barselona» safida 146 o'yinda maydonga tushib, raqiblar darvozasini 60 marta ishg'ol qildi. Kataloniyadan ketgach, «Deportivo La-Korunya» (1994—1995), «Sporting Xixon» (1995—1997), «Yokogama F. Marinos» (1997—1998), «Alaves» (1998—2000) jamoalarida to'p surdi. «Oltin butsa» laqabli futbolchi hozir «La Sexta» kanalida sharhlovchilik qilmoqda, shuningdek, ispan televideniesining turli shou dasturlarida ishtirok etib kelayapti.
Davomi Tafsilot.Uz blogida.
— deya xabar beradi uff.uz nashri.