Ko'rmay bo'ladimi, shunday o'yinni?..
Aslida “Barsa”-“Real” o'yini maydonda emas, balki uning tashqarisida ko'proqshov-shuvlarni keltirib chiqaradi. Nuroniy  muxlislardan tortib, qiziqqon yosh-yalang ishqibozlar bir hafta oldin “Kim g'olib bo'ladi?” degan tortishuvlarni boshlab yuborishgan. Bunday qiziqish faqat bizning yurtimizda emasligi ham aniq. Butun jahonda shunday!
Darhaqiqat, “El Klasiko” deya atalmush uchrashuvni ko'rib, rohatlanasan. Kurramizning eng zo'r futbolchilari tomonidan to'p o'yinining yuksak san'at darajasida namoyish qiladigan bahs, bu. Umrida, stadionga borib yoki televizorda biror bahsni 90 daqiqa sabr bilan tomosha qilmagan kishilar ham bugun xuddi urf ketidan quvgandek, yor-birodarlari bilan noiloj ekran qarshisiga keladi. Tushunmasa ham futbol ko'radi. Demak, “El Klasiko”ning menga eng ma'qul keladigan tarafi – uning jahonda futbol targ'ibotiga qo'shgan  yuksak hissasidir.
Ammo, ko'rkam va go'zal futbol uchrashuvi - tortishuvlar epitsentriga aylanib qolishiga mutlaqo qarshiman. Biz biroz chapani, qiziqqon xalqmiz. Bir nima ustida bahslashib qolsak, darrov garov o'ynaymiz. O'tgan “El Klasiko”dan bir kun avval o'zini “Real” va “Barsachilar” deb ataydigan yigitlar qo'ng'iroq qilib, taxminimni so'rashdi. Keyin, ular orasidagi “Real” muxlisi bo'lgan yangi kuyov yigit agar “Barsa” yutadigan bo'lsa, yarim kechasi Andijonsoyga ko'prikdan kalla tashlab, o'n daqiqa turishga garov boylaganini bildim.
Yoshlik – biroz g'o'rlik, albatta. Ertasiga futbol ko'rayapman-u, ichimda “ishqilib “Real” yutsin, bo'lmasa fanat yigit suvda qaqshaydi” degan fikr turibdi. Aksiga olib, “qaymoqranglilar” yutqazdi. Boyagi yigit suvga tushmasin deb bir  kun avvalgi telefon raqamni topib – “Iltimos, garovni bekor qilinglar, uni o'rniga osh-posh qilib bersin” deyishimga to'g'ri keldi. Keyin bilsam,  bunday garov o'ynaganlar soni rosa ko'p ekan.
Qisqasi, bugun zamonaviy futbolning eng kuchli nomoyondalari tomonidan  ijro etiladigan spektaklni zo'r hafsala bilan tomosha qilishga bel bog'lang. Ijtimoiy tarmoq, sport saytlarida tortishib asabni buzishga ne hojat? Mazza qilib, yuqori saviyali futboldan bahramand bo'ling! Iloji bo'lsa, yaqinlaringizni ham ekran qarshisiga chorlang, zora ular orasida millionlar o'yiniga qiziqmaydiganlari ham shu o'yin bois, to'p o'yiniga mehr uyg'onib, qolar.
Birinchi sinfda o'qituvchimiz Yangi yil oldidan “Ajab qorga qarayman, dilimda yashnar bahor” degan qo'shiqni o'rgatgan edi. Biz ham “El Klasiko” ko'ramiz-u, ich-ichimizda o'zimining ham shunday derbimiz bo'lsa qani edi, deya o'y suramiz.
Kim g'olib chiqishidan qat'iy nazar, uchrashuvni ko'ring, zavqlaning – bugun zo'r o'yin bo'ladi!
“EL-KLASSIKO”
Mana sizga futbolning kuchi,
Hayajonda go'yoki dunyo...
Lahza sayin oxanrabodek,
Tortar o'zga “El-Klassiko”.
Choyxonalar banddir bu kecha,
Kafelar band - bahslar avjida.
Bo'linishib ikki guruhga,
Bashoratlar qilinar juda.
Bu ham bitta o'yindir asli,
“Lokomativ”-“Paxtakor” kabi.
Ammo, jahon ahlin lol etar,
Uning zavqi, shiddati-shahdi.
Shuning uchun “El-Klassiko”,
Shuning uchun budir dovrug'dor.
Qani endi rivojlanib tez,
Gurkirasa bizning ham futbol... Elmurod ERMATOV, Ravshan HAMROZ, Andijon
— deya xabar beradi uff.uz nashri.