Bugun tunda er yuzidagi millionlab, balki milliardlab futbol ishqibozlari uzoq kutgan o'yin «Barselona» - «Real» jamoalari o'rtasidagi to'qnashuv sabab 90 daqiqa davomida ikki qutbga bo'linadilar. Ularning yarmi «Barselona»ga ishqibozlik qilishsa, qolganlari «Real» tarafida.  Doimgidek saytimiz an'anasiga sodiq qolgan holda yuzerlarimizning ikki grand jamoa o'rtasidagi fikrlarini havola qilamiz.
Rahmatillo Hamzaev (Toshkent):
- Bugungi uchrashuvda «Barselona»ning imkoniyatlari yuqori deb o'ylayman. Birinchidan uchrashuv mezboni «Barselona». Ikkinchidan oxirgi o'tgan o'zaro o'yinlarda katta ustunlik bilan kataloniyaliklar oldinda borishmoqda. Bundan tashqari, «Barselona»ning hujum chizig'i madridliklarnikidan kuchli. Va eng asosiysi bugungi kunda Luis Enrike jamoasi o'yin tashkil qilish borasida Zidan shogirdlaridan kuchliroq deb hisoblayman.
Mansurbek Ibragimov (Sankt-Peterburg, Rossiya):
- Men «Real» muxlisiman va bu safar madridliklarning g'alaba qozonishlarini istayman. Chunki oxirgi «klassiko»larda «Barsa» qator g'alabalarga erishib kelmoqda. Endi navbat «Real»ga keldi. Men madridliklarning g'alabasiga ishonaman. Bugungi g'alaba ko'p jihatdan Ispaniya chempionatining g'olibi nomini ham aniqlab beradi.
Xurshid Qo'chqarov (Andijon) :
- Yoshligimdan Italiyaning «Inter klubi muxlisiman. Shunday bo'lsa-da, bugungi «el klassiko»ni o'tkazib yubormayman. Menimcha uchrashuvda har ikki jamoaning ham g'alabaga bo'lgan imkoniyatlari bir hil. G'olib nomini aniq aytish mushkul. Chunki to'p dumaloq, maydon tekis. Barcha masala 90 daqiqalik vaqt o'tganidan so'ng hal bo'ladi.
Abdumajid Qodirov (Nukus) :
- Bugungi uchrashuvda yaqqol favorit «Barselona» Imkoniyatlar 60-40 ktaloniyaliklar foydasiga. O'zim «Real» muxlisiman. Lekin jamoalarning bugungi holatidan kelib chiqib, uchrashuvning Kataloniyada o'tkazilishini hisobga olib, Luis Enrike jamoasining imkoniyatlarini ko'proq deb o'ylayman. To'g'ri, Zidan shogirdlari oxirgi uchrashuvlarda muntazam ravishda ijobiy natijalarni qayd etib kelishmoqda. Lekin hozircha ular kuchli jamoalarga ro'baro' kelmadi. «Barselona» tarkibidagi yulduzli  «trio»ni to'xtatib qolish juda ham qiyin.
Izzatillo Ahmedov (Istanbul, Turkiya):
- «Barselona» bu uchrashuvda so'zsiz favorit. Sababi kataloniyaliklar «el klassiko»ning oxirgi uchrashuvlarida muntazam ravishda g'alaba qozonib kelishmoqda. Bu safar ham mana shu an'ana davom etishiga ishonaman. Bundan tashqari uchrashuv Kataloniyada bo'ladi. Birinchi davrada Madridda qozonilgan g'alaba 0:4 ham ruhiy ustunlik Luis Enrike shogirdlari tarafida bo'lishini ta'minlaydi.   
Bahromjon Isoqov (Farg'ona) :
- Men «Real» muxlisiman. Lekin bugungi uchrashuvda «Barsa» yaqqol favorit. Ayni paytda turnir jadvaliga nazar tashlasak, ikki jamoaning o'rtasidagi farq 10 ochko ekanligiga guvoh bo'lamiz. Mana shu holatning o'zi ham jamoalarning bugungi kuchini ko'rsatib turibdi. Shu bilan birga kataloniyaliklar tarkibi jangovar ko'rinishdi. Menimcha madridliklar bugun durang natijaga erisha olsalar ham katta gap. Taxminim 2:1 «Barsa» foydasiga.  
Elmurod ERMATOV, Zafarbek NE'MATOV tayyorladi
— deya xabar beradi uff.uz nashri.