Futbol bo'yicha O'zbekiston milliy chempionati nima uchun tomoshabinlarni o'ziga jalb qila olmayapti? Bu og'riqli savolning javoblari juda ko'p. Jumladan, o'yinlarning noqulay sanalar, boz ustiga, sutkaning noqulay soatlariga tayinlanishi, sensatsiyalarning deyarli uchramasligi, kuchli hisoblanadigan jamoalarning deyarli barcha uchrashuvlarda g'alaba qozonaverishlari va hokazolarni aytib o'tish mumkin. Qolaversa, «Paxtakor», «Bunyodkor», «Lokomotiv» va «Nasaf» klublaridan iborat «kuchli to'rtlik»ning har yili sovrinlar uchun kurashaverishiga shunchalik ko'nikib ketdikki, asti qo'yaverasiz. Xuddiki, chempionatimizda bundan boshqa «pichoqqa ilinadigan» klublar yo'qdek. Bu hol qachongacha davom etadi? «To'rtlik»dagilarga munosib qarshilik ko'rsatadigan klub, nahotki, topilmasa?!
Bu jo'yali savollarga javob izlab, 2016 yilgi mavsum uchun berilgan «zayavka»larga ko'z yugurtirdig-u, ko'nglimiz xiyol yorishgandek bo'ldi. Chunki ro'yxatlar va ulardagi nomlarga qaraganda, kuchlilarga qarshilik ko'rsatishga qodir bo'lgan «da'vogar» jamoalar oz bo'lsa-da, topilar ekan. Keling, ularga birma-bir to'xtalib o'tsak...
1-da'vogar: «Buxoro»
Olim Tillaevlar davridagi «Nurafshon» klubi yodingizdami?! Katta yoshli muxlislar bu jamoani juda yaxshi eslashadi. Chunki «Nurafshon» ko'rsatgan o'yinlar, aniqrog'i, etakchi klublarga qarshi tengma-teng kurashishlar har qanday kishida beixtiyor hurmat hissini uyg'otardi. Ayniqsa, «Paxtakor» bilan o'tadigan o'yinlarda bu jamoani tanib bo'lmasdi. Biroq keyingi paytlarda turli muammolar sababli «Buxoro»ning natijalari juda achinarli holatga kelib qoldi.
Joriy mavsumdan boshlab esa hammasi tubdan o'zgardi. Ya'ni, yangi mavsumga tayyorgarlik jarayonida ko'hna shahar jamoasi hammadan faol bo'lib, tarkibga ko'plab iste'dodli futbolchilarni jamladi.
«Buxoro»ning yangi o'yinchilari ro'yxatiga nazar soling: Aleksandr Merz-lyakov, Artyom Filiposyan, Sardor Rahmonov, Shavkat Salomov, Aziz Ibragimov, Jasur Hasanov (kichigi), San'at Shixov, Kamoliddin Murzoev, Bahodir Pardaev... Bu futbolchilar O'zbekistonda o'zlariga yarasha dovruq qozonishga ulgurishgan. Ularning aksariyatini esa, hattoki, milliy terma jamoa libosida ham ko'p bor ko'rganmiz.
Demak, yuqorida nomlari keltirilgan mahoratli charm to'p ustalariga to'g'ri yo'nalish berilsa, endilikda «ligada jon saqlab qolish» tushunchasi buxorolik futbol ishqibozlari zarracha xavotirlantirmasligi tayin. Aksincha, bunday tarkib bilan bemalol sovrinli o'rinlar uchun kurashish mumkin. Klubga bosh murabbiy sifatida Jamshid Saidovning tayinlanishida ham alohida ma'no bordek. Zero, Saidov futboldagi ilk qadamlarini aynan shu jamoada qo'ygan va imkoniyat yaratib berilsa, «Buxoro» uchun jonini berishga ham tayyor mutaxassis. Bundan bir-ikki yillar oldin ham Saidov og'ir pallalarda ko'hna shaharliklardan yordamini ayamagandi.
Mana, unga yana ishonch bildirilib, imkoniyatlar eshigi keng ochib berildi. Bizningcha, murabbiy jamoasiga o'zi istagan futbolchilarni to'play oldi. Faqat endi «Buxoro»dan talab qilinadigani - «kuchli to'rtlik»dagi jamoalarga qarshi munosib raqobat tug'dirib, chempionatimizga intriga bag'ishlash, xolos.
2-da'vogar: «Navbahor»
«Navbahor» haqida fikr yuritish chog'ida chempionatning dastlabki ikki turiga tayanish yaramaydi, nazarimizda. Zero, namanganliklar har ikki o'yinda ham mag'lubiyatga uchrashdi. Ammo ularning kimlar bilan to'qnash kelishganini ham inobatga olish zarur. Avvaliga tengma-teng o'tgan o'yinda nisbatan kuchliroq hisoblangan «Lokomotiv»ga imkoniyat boy berildi. Keyin esa «Vodiy derbisi»da «Neftchi»ning qo'li baland keldi. Bu uchrashuvni ko'rganlar aytishi mumkin, aslida, «Navbahor» futbolchilari mag'lubiyatga mos harakat qilishmagandi. Aksincha, o'yinda ko'proq mehmonlar ustunlika erishdilar. Biroq futbolda ko'p narsani hal qiluvchi OMAD tushunchasi shu kuni farg'onaliklar tarafida bo'lgani yaqqol sezildi.
Umuman, xuddi «Buxoro»da bo'lgani kabi, «Navbahor» ham bu yilgi chempionatga alohida dastur bo'yicha tayyorgarlik ko'rdi. Dastlab jamoaga bosh murabbiy sifatida asli namanganlik bo'lgan Rashid G'ofurov olib kelindi. Keyin esa bu mutaxassis bilan «Bunyodkor»da elkama-elka ishlagan tajribali Aleksandr Volkov ham umumiy ishga jalb etildi. Shu orqali «qaldirg'ochlar» bilan hamkorlik yo'lga qo'yilib, «Bunyodkor»dagi faoliyati orqali tajriba oshirgan ba'zi mahalliy va legioner futbolchilar «Navbahor»ga chaqirtirildi. Masalan, so'nggi yillarda jamoaning himoya chizig'i kuchsizlanib qolgani uchun Xayrullo Karimovga shartnoma hamda sardorlik bog'ichi taklif etildi. Hujum chizig'idan esa Oleksandr Pishurga joy ajratildi. Obid Jo'raboevni ham ko'pchilik taniydi.
Davomi InterFUTBOL gazetasi blogida.
— deya xabar beradi uff.uz nashri.