Xitoyning Kuinan shahri (Xitoy)da boks bo'yicha XXXI yozgi Olimpiada o'yinlarining yo'llanmalari uchun o'tkazilgan Osiyo va Okeaniya qo'shma litsenzion chempionati yakunlandi.
Ikki qit'aning jami 35 davlati vakillari ishtirokida bo'lib o'tgan musobaqada O'zbekiston terma jamoasi a'zolari 5 ta oltin va 2 ta kumush medalni qo'lga kiritib, umumjamoa hisobida birinchi o'rinni egallashdi. Uchtadan oltin va kumush hamda 1 ta bronza medaliga sazovor bo'lgan Xitoy termasi ikkinchi, 3 ta oltin, 2 ta kumush, 2 ta bronza medal bilan Qozog'iston termasi uchinchi o'rinni band etdi.
E'tiborlisi, finalga qadar etib kelgan 7 nafar bokschimiz “Rio-2016” o'yinlarining yo'llanmalarini ham qo'lga kiritdilar.
Mamlakatimiz sportchilari musobaqa davomida 15 davlatning jami 24 nafar sportchisini mag'lub etdilar. Jumladan, Xitoyning – 4 nafar, Indoneziya va Qirg'izistonning – 3 nafardan, Yaponiya hamda Filippinning – 2 nafardan, Mo'g'iliston, J.Koreya, Tailand, Tojikiston, Yangi Zelandiya, Avstraliya, Eron, KXDR, Xitoy Taypeyi va Qozog'istonning – 1 nafardan bokschisini engishga muvaffaq bo'ldilar.
Eslatib o'tamiz, Osiyo va Okeaniya qo'shma litsenzion chempionatida hamyurtlarimizdan Yodgoroy Mirzaeva (-51 kg), Hasanboy Do'smatov (-49 kg), Shahobiddin Zoirov (-52 kg), Shaxram Giyasov (-69 kg), Elshod Rasulov (-81 kg), Rustam To'laganov (-91 kg) va Bahodir Jalolov (+91 kg) XXXI yozgi Olimpiada o'yinlariga yo'llanmalarni qo'lga kiritdilar.
Ushbu muvaffaqiyatdan so'ng, boks bo'yicha O'zbekiston erkaklar terma jamoasi “Rio-2016” Olimpiada o'yinlarida barcha vazn toifasida g'oliblik uchun ringga ko'tariladigan bo'ldilar. Eslatib o'tamiz, 2015 yili Qatar poytaxti Doha shahrida bo'lib o'tgan jahon chempionatida Murodjon Axmadaliev (-56 kg), Elnur Abduraimov (-60 kg), Fazliddin G'oipnazarov (-64 kg) va Bektemir Meliqo'ziev (-75 kg) XXXI yozgi Olimpiada o'yinlarining yo'llanmalarini qo'lga kiritishgan edi. 
Maqolaning davomi bilan ushbu havola orqali tanishib olishingiz mumkin...
— deya xabar beradi uff.uz nashri.