15-16 mart kunlari Osiyo Chempionlar ligasida 3-tur uchrashuvlari bo'lib o'tdi. Ya'ni birinchi davraga yakun yasaldi. Bu esa klublarimizning qit'adagi hozirgi xolati va imkoniyatlarini chamalaydigan ayni payt. O'tgan yili klublarimizning birortasi ham guruh bosqichidan o'ta olmagani, OFK tomonidan beriladigan kvotalarimizga jiddiy ta'sir qildi. Ya'ni bu yilgi 3+1 keyingi yildan 1+2 ga aylanishi tobora oydinlashib bormoqda. Keyingi yil kvotalari shu yilning noyabrda aniqlanadi. Quyidagi jadval esa hozirgi xolatni ifoda etadi:
Ko'rinib turganidek, o'tgan yili eng past ko'rsatkichga ega bo'lganimiz, keyingi yildan o'z ta'sirini o'tkazadi. Ya'ni OChL da endi faqat mamlakat chempioni guruh bosqichidan joy olsa, vitse-chempion va kubok sohibi saralashdan o'tishlariga to'g'ri keladi. Noyabrgacha hali vaqt bor va ko'rsatkichlar o'zgaradi. Terma jamoamizning o'z maydonidagi 2 ta g'alabasi yana qo'shimcha ochkolar olib keldi. OChL da ishtirok etayotgan klublarimiz ham guruhda yana 3 tadan o'yin o'tkazishadi va ular ham qo'shimcha ochkolar to'plashlari mumkin.
Lekin biz noyabrgacha baribir 2+2 kvota beradigan o'rinlarga ko'tarila olmaymiz. Hozirgi 3+1 kvotasi esa endi orzuga aylanadi shekilli. Bitta hotirjam qiladigan tomoni, yaqin orada 1+1 beriladigan o'rinlarga tushib ketmaymiz. Quvayt termasi va klublari FIFA tomonidan barcha xalqaro musobaqalardan chetlatilgan, demakki ularning ochkolari muzlatilgan. Iroq esa bizdan ancha orqada. Demak 2017-18 yilgi futbol mavsumlarida bizga 1+2 kvotasi ajratiladi. Undan keyin-chi?
Mana shunisi hozir katta so'roq ostida. Ochig'i, yaqin orada bu sohada ijobiy ko'rsatkichlarga ishonish qiyin. Bunga asosiy sabab esa etakchi klublarimizning hozirgi ahvoli. Keling, ularning imkoniyatlarini chamalab ko'raylik. “Paxtakor”
Mamlakatning amaldagi chempioni va OChL dagi o'yinlar soni bo'yicha klublarimiz orasida rekord o'rnatgan “Paxtakor” keyingi yildan bu nufuzli turnirda ishtirok etmasligi haqiqatga yaqinroq. Bu yilgi mavsumga tayyorlangan tarkib shunday xulosa chiqarishimizga asos bo'la oladi. Klubni bir qancha etakchi o'yinchilar tark etdi, ular o'rniga qabul qilinganlar esa tarkibni kuchaytirmadi. O'tgan yili superkubok bahsida asosiy raqibi “Lokomotiv”dan qaqshatqich zarba qabul qilib olgan “sherlar” bu yilgi superkubokda Toshkentda “Nasaf”ga imkoniyatni boy berdi. Bu yilgi OChL da eng yirik hisobda mag'lubiyatga uchragan ham aynan “Paxtakor” bo'lib turibdi. Hozircha Igor Sergeevning gollari evaziga jamoa ba'zi o'yinlarda g'alaba nashidasini surmoqda. Lekin u ham tirik organizm va qaysidir sababalarga ko'ra maydonga tusha olmasa, unda axvol nima bo'lishini tasavvur qilish qiyin.
Jamoaning bunday vaziyatga tushib qolgani Samvel Babayanning terma jamoa boshqaruviga o'tgani bilan bog'liq emas. Klub hozir moliyaviy jihatdan qiyin ahvoldaligi hech kimga sir emas va bu sohada ahvol o'nglanmasa, jamoani etakchi o'yinchilar tark etishi davom etaveradi. Agar bu yilgi mavsumda “Paxtakor” yuqori ikkilikdan joy olmasa yoki kubokni qo'lga kiritmasa OChL bilan hayrlashadi, bu esa achinarli xol.
“Lokomotiv”
OChL da bu yil mag'lubiyatga uchramagan yagona klubimiz keyingi bosqichga chiqish uchun yaxshi imkoniyatga ega. Klublarimiz orasida tarkib borasida eng kuchlisi ham aynan “Lokomotiv”dir. Milliy chempionatni vodiyda 2 ta qiyin uchrashuvdagi g'alaba bilan boshlagan “temiryo'lchilar” uyda “Neftchi”ni tor-mor etishdi va bu yilgi chempionlikka asosiy da'vogarlardan biri hisoblanadi. Biroq, tarkibdagi nomlar jarangdorligi bilan, ba'zi pozitsiyalar kuchaytirilmasa, barcha musobaqalarda g'olib chiqish qiyin kechadi. Masalan, o'ng qanot himoyasi va yarim himoyasini to'ldirishda muammolar bor. Goleodor hujumchi ham jamoani kuchaytirgan bo'lardi. Bu muammolarni klub davralar oralig'ida hal qilishi mumkin. Ungacha esa hozirgi tarkib bilan OChL guruhidan chiqish vazifasi amalga oshirilishi talab etiladi.
“Nasaf”
Qarshiliklar ham keyingi bosqichga chiqish uchun yaxshi imkoniyatga egalar. Tarkib jihatidan etakchi klublarimizdek nomdor futbolchilar oz bo'lsa-da, ba jamoaning qolganlarga nisbatan bitta ustun tomoni bor – barqarorlik. Ro'ziqul Berdiev bir necha yildan jamoa o'zagini saqlab qolayapti, bu esa o'yinchilar tajribasi oshib borishi va bir-birini tushunishida muhim omil hisoblanadi. O'tgan yil OChL da asosan himoyalangan “Nasaf” bu yil o'yinni nazorat qilish darajasigacha etdi. Har yili kubok finaligacha etib kelib, alamli mag'luyatga uchragan qarshiliklar endi sovrinlarni yutishni ham hadisini oldilar. Mamlakat kubogi va superkubogining amaldagi sohibi endi chempionlik uchun dadil qadam tashlashga tayyor. OChL dagi o'yinlar ham borgan sari ochilib bormoqda. “Al-Jaish” bilan o'yin juda yaxshi taassurot qoldirdi. Safarda o'ynashiga qaramay, “Nasaf” o'yinni nazorat qildi va legionerlari uchun o'n million dollarlar sarflagan klubga deyarli imkon bermadi. Birgina omadsizlik (Muhammadievning yiqilib tushishi) uchrashuv taqdirini hal qildi. Lekin qarshiliklar bundan ortig'iga arzirdilar. Lekin Berdiev shogirdlarida hali imkoniyat bor va ketma-ket uydagi g'alabalar guruhdagi vaziyatni ijobiy tomonga o'zgartiradi.
Davomi Abror Imomxo'jaev blogida.
— deya xabar beradi uff.uz nashri.