“Zob-Ahan” – “Bunyodkor” uchrashuvi oldidan tashkil etilgan matbuot anjumanining ikkinchi qismida eronliklar ishtirok etishdi. “Zob-Ahan” bosh murabbiyi Yahyo Gulmuhammadiga yarim himoyachi Mehdi Mehdipur hamrohlik qildi. - Ertaga bizni qiyin o'yin kutib turibdi. Toshkentdagi o'yinda hisob ochilmagandi. O'shanda biz durang uchun harakat qilgandik. O'ylashimcha, ertaga tamomila boshqacha o'yin bo'ladi. Raqibimizni hurmat qilamiz. “Bunyodkor” – kuchli jamoa. Ushbu o'yinga yaxshi tayyorgarlik ko'rdik. Ertangi bahsda taktik uslubimizni o'zgartiramiz. Biz shunga majburmiz. Chunki ba'zi futbolchilarimiz jarohat olishgan. Aynan kimlar jarohat olishganini ayta olmayman. O'z uyimizda o'ynayotganimiz tufayli, muxlislarimiz ko'magida ularga g'alaba bilan xursand qilishga harakat qilamiz, - deydi Yahyo Gulmuhammadi. - “Bunyodkor” maydonida kechgan bahsda raqib yaxshi o'yin ko'rsatgandi. “Bunyodkor” tarkibida ajoyib futbolchilar bor. O'shanda safarda durang o'ynay oldik. O'z muxlislarimiz qarshisida g'alaba qozonishga urinamiz, - deydi Mehdi Mehdipur.
— deya xabar beradi uff.uz nashri.