Rim imperiyasining mashhur sarkardalaridan bo'lgan Tsezar Rubikon daryosini kechib, o'tar ekan, «qur'a tashlandi», deb xitob qilgan edi. Bu bilan u ortga yo'l qolmaganini bildirgandi. Tsezar yo raqiblari bilan kurashda g'olib chiqib, Rim imperatori bo'lishi yoki mag'lubiyatni tan olib, tarix qatlarida izsiz yo'qolib ketishi kerak edi. Rubikonni kechib o'tar ekan, unda boshqa yo'l qolmagandi.
Ushbu tarixiy qissadan futbol borasida ham hissa chiqarish mumkin. Har qanday murabbiy butun boshli mamlakat termasini boshqarishga rozi bo'lar ekan, o'z «Rubikon»ini kechib o'tadi. Unda endi ortga yo'l qolmaydi. Yo shu jamoa bilan g'alabalarga erishib, nom qozonadi yoki mag'lubiyatga uchrab, sharmanda bo'ladi. Afsuski, nom qozonishga erishganlar u qadar ko'p emas. Deyarli yo'q, desa ham bo'laveradi.
Samvel Babayan ham mana shunday qismatni o'z gardaniga olgan murabbiylardan. U termadagi faoliyatini yaxshi va balki aytish mumkinki, juda yaxshi boshladi. Har holda, ketma-ket g'alaba qozonish borasida rekord o'rnatish hammaga ham nasib qilgan emas. Ammo JCh yo'lida «xashaki» o'yinlar kamayib, so'nggi bosqich bahslari yaqinlashar ekan, murabbiyga ishonchsizlik bilan qarayotganlar uchrab turgani ham bor gap. Va bu fikrlarda asos yo'q, deyish ham qiyin. Boisi, Yaponiya, Avstraliya va Janubiy Koreya kabi jiddiy raqiblarga qarshi ayovsiz janglar kechadigan so'nggi bosqichda qanday natijalar qayd etilganini ilgari ko'p ko'rganmiz. Shu sababli, terma jamoa boshqaruvida xorijlik tajribali murabbiy bo'lishini istayotganlar topilishi turgan gap. Shunday emasmi?
Albatta, shu o'rinda «ha» degan javobni berganlar ko'p bo'lishi tabiiy hol. Axir kim ham terma jamoa boshqaruvida nomdor murabbiy turishini istamaydi? Ammo shu o'rinda boshqa istihola birinchi o'ringa chiqadi - Babayan nima bo'ladi? Axir ketma-ket g'alabalarga erishgan va birinchi turda KXDRdan uchralgan alamli mag'lubiyatdan so'ng termani og'ir vaziyatdan olib chiqib, ketma-ket g'alabalar bilan keyingi bosqich yo'llanmasini qo'lga kiritgan murabbiy hech narsadan hech narsa yo'q, shunchaki chetga chiqib qolaveradimi? Qani adolat? Kim aytadi ikkinchi bosqich o'yinlari oson kechdi, deb? Balki hozir shunday o'ylayotgandirmiz, rost. Ammo KXDRdan uchralgan 2:4 hisobidagi mag'lubiyatdan so'ng ham shunday fikrdamidik?
Albatta, bu savollarga javob qaytarish ancha qiyin. Boz ustiga, O'FF ham Samvel Babayanni shunchaki iste'foga chiqarib yubormasligi turgan gap. Hozir aksariyat mutaxassislar uning tajribasi saralashning eng jiddiy qismida etmay qolishi mumkinligini aytishmoqda va ular haq bo'lib chiqishlari ehtimoli ham juda katta. Chunki har to'rt yilda shu holat takror bo'laverib, zadamiz ham chiqib ketdi. Biroq hozir faqat ehtimollar nazariyasiga ko'ra, Babayanni iste'foga chiqarib yuborish - bolasi sho'rvani to'kib qo'yishidan qo'rqib, avvalroqdan unga shapaloq tushirgan Afandining ishi bo'lar edi. Shunday ekan, murabbiyning tajribasi etmay qolishidan qo'rqayotganlarning so'nggi bosqich o'yin-lari boshlanishini kutishdan o'zga ilojlari yo'q. O'shanda hammasi aniq bo'ladi. Yo chika bo'ladi, yo puka...
Hozirgi holatda faqat bir kishi O'zbekiston terma jamoasida bosh murabbiy o'zgarishini amalga oshirishi mumkin, u ham bo'lsa - Babayan! Agar murabbiy hozirdan so'nggi bosqichdan o'ta olishiga ko'zi etmasa, iste'fo berishi mumkin. Ammo bunday qilgan taqdirda, bir umr ta'na ostida qolib ketadi. Chunki u «Rubikon»ni kechib o'tib bo'lgan, endi ortga qaytsa hech kim uni tushunmasligi turgan gap. Kim biladi, deysiz, balki u ishini davom ettirganda mundialga yo'l olarmidik, deydiganlar topilishi ham aniq. Shu sababli ham Babayan endi ortga qayta olmaydi. Uning uchun qaytish eshiklari yopilgan. Shunday ekan, so'nggi bosqich oldidan murabbiy iste'fosini kutayotganlarning indamay qismatlariga rozi bo'lishdan o'zga ilojlari yo'q.
Ammo muammoning qandaydir echimi bo'lishi kerak-ku! Xo'sh, bunday holatdan chiqib ketish uchun nima qilish lozim?
Shunday yo'l bor, albatta. «O'limdan boshqa hamma narsaning iloji bor», deydi xalqimiz. Shunchaki, terma jamoa boshqaruviga yaxshi maslahatchi-murabbiy jalb qilish bilan ham vaziyatni o'z foydamizga yaxshilash imkoni bo'lsa kerak. Xorijdan kuchli murabbiy chaqirsak, shubhasiz, ancha foydali bo'lar edi. Termaga hozir kuchli maslahatchi-murabbiy kerak. Xuddi bir vaqtlari Babayanning o'zi «Paxtakor»ni boshqargan Murod Ismoilov, Ravshan Haydarov va boshqalarga maslahat bergani kabi yaxshi saviyadagi murabbiyni topish lozim.
Samvel Vyacheslavovichning o'zi ham «Paxtakor»ning avvalgi chempionliklariga katta hissa qo'shganini ta'kidlaydi. O'sha vaqtda jamoani bosh­qargan murabbiylar unga quloq solishganini aytadi. Hozir ham terma jamoaga aynan shunday mutaxassis zarar qilmagan bo'larmidi...
Davomi InterFUTBOL gazetasi blogida.
— deya xabar beradi uff.uz nashri.