Joriy yilda Farg'onada talabalarning shijoat, matonat va mahorat ko'rigi – “Universiada – 2016” musobaqalarning final bosqichi bo'lib o'tadi. Ayni kunlarda viloyatda mazkur sport bayramiga qizg'in tayyorgarlik ko'rilmoqda.
Prezidentimiz tashabbusi bilan tashkil etilgan “Umid nihollari”, “Barkamol avlod”, Universiada sport musobaqalari yoshlarning jismoniy va ma'naviy kamolotida muhim ahamiyat kasb etayotir. Ayniqsa, oliy ta'lim muassasalari talabalari o'rtasida an'anaviy o'tkazib kelinayotgan Universiada musobaqalari talabalar o'rtasida sportning ommaviyligini oshirish, yosh avlodni har tomonlama barkamol etib tarbiyalashga xizmat qilmoqda.
Farg'ona shahrida mazkur musobaqani yuqori saviyada o'tkazish uchun aniq chora-tadbirlar belgilanib, muayyan ishlar amalga oshirilayotir. Musobaqalar o'tkaziladigan 29 ob'ekt, jumladan, Farg'ona davlat universiteti, Farg'ona politexnika instituti, Farg'ona olimpiya zaxiralari sport kollejida tayyorgarlik ishlari avjida. Sport zallari zamon talablari asosida ta'mirlanib, jihozlanmoqda. Farg'ona davlat universitetida 3 ming 200 o'rinli futbol maydoni, yopiq suzish havzasi, uchta voleybol maydoni va engil atletika yo'laklari qurilib, foydalanishga topshirildi.
Musobaqa ishtirokchilarining yashashi, ovqatlanishi va mazmunli dam olishi uchun qulay sharoitlar yaratishga alohida e'tibor qaratilmoqda. Farg'ona davlat universiteti va Farg'ona politexnika institutining talabalar turar joyi binolari zamonaviy ta'mirdan chiqarilmoqda.
Viloyat markazida keng ko'lamli obodonlashtirish va ko'kalamzorlashtirish ishlari amalga oshirilib, xiyobon va ko'chalarda gulzorlar tashkil etilayotir. Farg'ona, Ma'rifat, Murabbiylar kabi markaziy ko'chalar zamonaviy arxitektura talablari asosida ta'mirlanmoqda, qariyb 5 kilometrlik yo'l rekonstruktsiya qilinmoqda. Barcha ko'chalarga Universiada, sport, yoshlikni targ'ib etuvchi pannolar, shiorlar o'rnatilayotir.
Ushbu tadbirga farg'onalik yoshlar ham qizg'in hozirlik ko'rmoqda. Musobaqalarning saralash bahslarida viloyatdagi beshta oliy ta'lim muassasasida tahsil olayotgan talabalar mahoratini namoyish etdi. Hozir viloyat terma jamoasi shakllantirilib, final musobaqalariga tayyorgarlikni boshlab yubordi.
– Talabalarimiz bu yilgi bellashuvlarda sovrinli o'rinlarni qo'lga kiritishni o'z oldiga maqsad qilib qo'ygan, – deydi Farg'ona davlat universiteti rektori Sh.Toshmatov. – Buning uchun mutasaddi tashkilotlar tomonidan sportchilar va murabbiylarga barcha zarur sharoit yaratib berilgan. Universiada dasturiga kiritilgan 15 sport turining har biri bo'yicha oliy o'quv yurtlari va tegishli sport federatsiyalari mas'ul etib belgilanib, tayyorgarlik mashg'ulotlarini yuqori saviyada tashkil etish va o'tkazish choralari ko'rilmoqda.
Manba: UzA, olympic.uz
— deya xabar beradi uff.uz nashri.