Bu yilgi mavsumda «Buxoro» o'z tarkibiga oliy liganing ko'zga ko'ringan futbolchilarini qo'shib olib, keng ommaga maqsadi jiddiy ekanligini bildirib qo'ydi. «Paxtakor»dan Aleksandr Merzlyakov, Bahodir Pardaev taklif etildi.
Shuningdek, Kamoliddin Murzoev, Shavkat Salomov, Artem Filiposyan kabi tajribali o'yinchilar ham ko'hna shahar jamoasi safini to'ldirishdi. Eng qizig'i, «Buxoro»ning zaxira o'rindig'ida ham etakchi futbolchilar qolib ketishyapti. Bu esa klubda ikkita teng kuchli tarkib shakllantirilganini ko'rsatib turibdi. Masalan, «Obod»ga qarshi uchrashuvda Murzoev, Pardaev, Fomin, Smolyachenko kabilar boshlang'ich tarkibdan tushib qolishdi. Biz terma jamoamizning Bahraynga qarshi o'tkazilgan uchrashuvidan so'ng tajribali hujumchi, o'z vaqtida Kievning «Dinamo», Qozog'istonning «Shaxtyor», «Irtish» klublarida to'p surgan Kamoliddin Murzoev bilan uchrashib, dildan suhbatlashdik.
- Kamoliddin, avvalo, terma jamoamizning JCh-2018 ikkinchi saralash bosqichi doirasidagi so'nggi ikki o'yinidan olgan taassurotlaringiz bilan o'rtoqlashsangiz...
- Bilasizmi, g'alaba har qanday holatda ham kishida ijobiy va iliq taassurot qoldiradi. Hisob minimal bo'ladimi yoki yirik, baribir, yutuq uchun uch ochko taqdim etiladi. Muhimi, termamiz ikki o'yinda olti ochkoni qo'lga kiritdi. Bu esa bosh jamoamizning guruh g'olibi sifatida so'nggi bosqichga yo'l olishini ta'minladi. Qolaversa, Osiyo kubogi-2019 final bosqichidagi ishtirok ham naqd bo'ldi. Albatta, stadionga yig'ilgan tomoshabinlar, uchrashuvni televizor qarshisida kuzatgan muxlislar futbolchilarimizdan ko'proq gol kutishgandi. Lekin hamisha ham o'ylangan rejalar amalga oshavermaydi. Boshqa tomondan, Toshkentdagi o'yinda Bahraynga ham, Filippinga ham ochko kerak edi. Bunday holatda mezbon jamoaga oson bo'lmaydi. Axir, futbolchilarimizda muxlislar oldidagi mas'uliyat, javobgarlik hissi borligini ham inobatga olish zarur.
- Termamizning bugungi tarkibiga barcha davrlardagi eng kuchlisi, deya ta'rif berayotganlar yo'q emas. Jumladan, milliy jamoamizning hozirgi bosh murabbiyi Samvel Babayan ham shunday fikrda. Siz bunga qanday qaraysiz?
- Qo'shilaman, lekin har bir davrning o'ziga yarasha kuchli jamoalari bo'lgan. Masalan, 1994 yili Osiyo o'yinlarida zafar quchgan termamizning tarkibini olaylik. JCh-2014 saralash bosqichida ishtirok etgan jamoaga ham shunday ta'rif berish mumkin. E'tibor bersangiz, yildan-yilga mundial sari yaqinlashib boryapmiz. Avvalgi saralashda JCh-2014 final bosqichiga chiqishimizga ikkita to'p etmay qoldi. E'tibor bering, ochko emas, ikkita to'p farqi Braziliyaga borishimizga to'sqinlik qildi. O'ylaymanki, bu galgi urinishimiz omadli chiqadi. Mana, termamiz Samvel Babayan boshchiligida ketma-ket 8ta o'yinda g'alabaga erishdi. Bu muvaffaqiyatlar so'nggi - uchinchi saralash bosqichida ham davomli bo'lishini chin dildan istayman. Binobarin, ayrim etakchi futbolchilarimiz uchun bu so'nggi imkoniyat. Ulardagi JCh-2018ga chiqishga bo'lgan ulkan ishtiyoq yigitlarga qo'shimcha kuch bag'ishlaydi. Qolaversa, tarkibga yosh futbolchilar ham sekin-asta qo'shib borilyapti.
- Haqiqatan, so'nggi paytda yosh futbolchilar etishib chiqayotganini ham e'tirof etmay iloj yo'q. Ayniqsa, «Bunyodkor»ning asosiy tarkibida o'ynayotgan Akrom Komilov, Doston Hamdamov, Rustam Ashurmatov, Eldor Shomurodov, Zabihillo O'rinboev, Otabek Shukurovni aytish joiz. Bu yoshlar haqida fikringiz qanday?
- Sanab o'tilgan futbolchilarning 2-3 yildan so'ng milliy termamiz o'zagini tashkil qilishlariga shubham yo'q. Yurtimiz yoshlari barcha sohalarda yutuqlarga erishib kelishgan, xususan, futbolda ham. Adashmasam, yoshlarimiz shu kungacha uch marotaba jahon chempionatlari final bosqichida ishtirok etishgan. O'smirlarimiz ham muntazam ravishda kichik mundiallarda qatnashishyapti. To'g'ri, yoshlar - bizning ertamiz, kelajagimiz. Lekin ularning oldida tajribali o'yinchilarning bo'lishi ham muhim omil hisoblanadi. Tarkibni keskin yoshartirish yaramaydi. Yoshlar kerakli bilim va ko'nikmalarni, albatta, malakali futbolchilardan o'rganishadi. Faqat yoshlardan iborat tarkibni maydonga tushirsangiz, biri bo'lmasa, ikkinchi o'yinda salbiy natija qayd etilishi ehtimoldan xoli emas. Yoshlarning bir maromda o'ynashi qiyin.
- Kelasi hafta JCh-2018ning uchinchi saralash bosqichiga qur'a tashlanadi. Umuman, terma jamoamizning Rossiyaga borish imkoniyatlarini qanday baholaysiz?
- Jahon chempionatida qatnashish istagida ekanmiz, qiyinchiliklardan qo'rqmasligimiz kerak. Mundialga eng kuchli jamoalargina borishadi. Qit'amizning 12ta saralangan termalari 4,5ta o'rin uchun kurashga kirishadilar. Taxminiy raqiblarimiz ham ma'lum bo'ldi. Eng muhimi, hozirgi setkaning biz uchun nisbatan qulayroq raqiblarni taqdim etishi kutilyapti. Saralashning so'nggi bosqichini o'z maydonimizda boshlab, Toshkentda tugatishimiz ham bizga qo'shimcha ustunlik beradi. Demak, bunday imkoniyatlardan maksimal darajada foydalanib qolish kerak.
- Milliy termamiz safida ikkita bahsda maydonga tushgansiz. O'sha o'yinlar haqida nima deya olasiz?
- Ikkala uchrashuv ham o'rtoqlik o'yiniga to'g'ri kelgan. Debyutimni Toshkentda bo'lib o'tgan Eronga qarshi uchrashuvda nishonlaganman. O'shanda bosh murabbiy Mirjalol Qosimov meni bosh jamoamizga taklif qilganlar. Ikkinchi o'yin Chernogoriyaga qarshi safarda kechgan. O'sha kezlari termaga Vadim Abramov ustozlik qilardi. Milliy jamoaga kam chaqirilishimda o'zimning aybim ko'proq, deb hisoblayman.
- Keling, endi legioner futbolchi sifatidagi faoliyatingiz haqida gaplashsak. O'z vaqtida Kievning «Dinamo», Qozog'istonning «Irtish» va «Shaxtyor» klublarida to'p surdingiz. Evropa Ligasida o'ynash nasib qildi. UEFA tashkil etadigan musobaqalarda qatnashishning gashti boshqacha bo'lsa kerak?
- Albatta, fikringizga yuz foiz qo'shilaman. Evropa Ligasida qit'aning ko'zga ko'ringan klublari ishtirok etishadi. Tarkib, taktika, yo'nalish umuman boshqacha. Esimda, bir gal safar o'yiniga borganimizda, u erda hamma kostyum kiyishi shart ekanligini aytishdi. Natijada, samolyotning o'zida kiyimlarimizni almashtirib olgandik. Hattoki, ba'zi davlatlarda shunga ham e'tibor qaratilar ekan. O'yinlar chindan-da muxlislar uchun o'tkazilishini Evropa Ligasi doirasida o'tkazgan uchrashuvlarimizda ko'rganman. Qozog'istonning «Shaxtyor» klubi tarkibida Evropa Ligasida ishtirok etganman. Ungacha Pavlodarning «Irtish» jamoasida Tal'at Bayso'finov murabbiyligida o'ynaganman.
O'shanda Ulug'bek Baqoev jamoaga moslashib ketishim uchun katta yordam bergandi. Faqat bitta kamchiligi bor edi, buni ham aytishim kerak. «Irtish» o'z o'yinlarini sun'iy qoplamali maydonda o'tkazardi. O'sha yili ushbu jamoa bilan Qozog'iston kubogining yarim finaliga qadar etib borgandik. Chempionatni esa to'rtinchi o'rinda yakunlaganmiz. Bayso'finov «Irtish»ni tark etgach, men ham jamoamni o'zgartirdim. Bir paytlari Qarshining «Nasaf» klubida ishlagan Viktor Kumikov «Shaxtyor» (Karaganda)ga taklif qildi. Shavkat Salomov ikkimiz klub safiga borib qo'shilgach, Evropa Ligasi saralash bosqichida o'ynagandik. Agar o'shanda bitta raqibni mag'lub etganimizda, Italiyaning «Udineze»siga qarshi maydonga tushardik.
- Ma'lum muddat Kievning «Dinamo» klubida to'p surganingizni hamma ham bilmasligi mumkin...
- «Mash'al»da o'ynab yurgan kezlarim ukrainalik agent Vladimir Vovkovskiy men, Botir Qoraev va Hamza Karimovga o'zimizni xorij klubida sinab ko'rishni tavsiya qilgandi. Uning maslahatiga binoan Kievning «Dinamo» klubiga borganman. Hamza Karimov Ukrainada qolishni istamagan, Botir Qoraev ham ayrim sabablarga ko'ra yurtimizga qaytib kelgandi. Men esa «Dinamo» o'rinbosarlari safiga qo'shilganman. O'sha paytda hamyurtimiz Maksim Shatskix Kiev klubining yuragi edi. U bilan ko'rishganimda, qanday yordam kerak bo'lsa tortinmasdan so'rashimni tayinladi, meni hamisha qo'llab-quvvatladi. Bundan tashqari, o'sha paytda Ukrainaning «Dnepr» klubida faoliyat olib borgan Vitaliy Denisov bilan ham ko'rishib turardik. «Dinamo» o'rinbosarlari safida o'ynab, juda katta tajriba to'plaganman.
- «Bunyodkor»ga sizni mashhur Luis Felipe Skolari taklif qilgandi. Bu o'tish qanday amalga oshgan?
- 2009 yili «Nasaf» tarkibida to'p surardim. Ochig'i, bu men uchun ancha kutilmagan taklif bo'lgandi. «Bunyodkor» klubi rasmiylari qo'ng'iroq qilib, meni o'z tarkiblarida ko'rish istagida ekanliklarini aytishgan. Albatta, mazkur chorlov meni xursand qilgandi. Uydagilar bilan maslahatlashgach, «Bunyodkor» taklifiga ijobiy javob qaytarganman. Luis Felipe Skolari qo'l ostida, Rivaldo, Server Jeparov kabi mashhur futbolchilar bilan bir jamoada to'p surish men uchun katta baxt edi.
- Skolarining murabbiylikda o'ziga yarasha ajralib turadigan xislatlari borligi sezilganmi?
- Albatta, uni bejizga «tulki» deb atashmas ekan. O'ziga yarasha yo'nalishi bor. Qaysi klubda ishlamasin, ikki yordamchisi unga doimo hamroh. Ularning har biri o'z ishini mukammal darajada bajaradi. Eng muhimi, bir-birlarining ishiga aralashmaydilar. Mashg'ulot oldidan kelishib olgach, har biri o'z vazifasini bajarishga kirishadi. Kezi kelganda futbolchilar bilan hazillashishadi. Har bir mashg'ulotimiz ko'tarinki kayfiyatda o'tardi. Skolari bir gapni ko'p takrorlardi: «Sizlar maydonga raqs tushish uchun chiqishingiz kerak, shunchaki, sayr qilib yurish yaramaydi». Braziliyalik mutaxassisning shu gaplarini haligacha eslayman.
- O'sha paytda Rivaldo 40 yoshga yaqinlashib qolganiga qaramay, oliy ligamizda ko'plab futbolchilarga ijobiy tomondan o'rnak bo'la oldi. O'z davrining eng buyuk futbolchilaridan bo'lgan mahoratli hujumchi bilan bir jamoada yonma-yon to'p surarkansiz, undan nimadir o'rgandingizmi?
- Shu yoshida chempionatimiz to'purari bo'lganining o'zi ko'p narsadan darak berib turibdi. Haqiqiy professional futbolchi ekanligini barchaga isbotladi. Maydonda o'zini tutishi, sheriklariga o'rnak bo'la olishi bilan qalbimizda qoldi. Mashg'ulotdan kamida yarim soat oldin kelib, alohida shug'ullanardi. O'sha kezlari biz yosh edik. Shaxsan menga bu katta saboq bo'lgan. Nafaqat rasmiy o'yinlar, balki mashg'ulotga ham alohida ishtiyoq bilan yondashardi.
- Joriy mavsumni «Buxoro» jamoasida boshladingiz. Ko'hna shaharga yo'l olishingiz qanday amalga oshdi?
- O'tgan mavsum dastlab «Olmaliq», keyin esa Samarqandning «Dinamo» klublarida o'ynadim. Tan olaman, «Olmaliq»da ishim unchalik yurishmadi. Murabbiyga o'yinim ma'qul kelmadi, shekilli, jamoani tark etdim. Keyin yozda «Dinamo» klubidan taklif tushdi, ularga hujumchi kerak edi. Samarqandda ikkinchi davrani yomon o'tkazdim, deya olmayman. Nisbatan olganda ko'p gol urdim. Ammo yakunda «Dinamo» quyi ligaga tushib ketdi. Jamoani kuchlilar safida olib qolish uchun barcha futbolchilar bor kuchlari bilan harakat qilishdi. Nima ham derdik, bu - futbol, omadimiz kelmadi. «Buxoro»ga esa Tachmurod Agamurodovning taklifi bilan keldim. Klubda tajribali, o'z vaqtida milliy terma jamoada o'ynagan futbolchilar jam bo'lishgan. Mavsumni yomon boshlamadik. O'ylaymanki, yakunda ham natija salbiy bo'lmasligi kerak.
Davomi InterFUTBOL gazetasi blogida.
— deya xabar beradi uff.uz nashri.