O'zbekona epigraf:
— Ha, mayli, o'zbekchilikda!!! Keyingi paytlarda “o'zbekchilik” deyishsa asabim buziladi. Agar, mazkur termin — odamiylik, mehr-oqibat, sadoqat, mehmondo'stlik, kechirimlilik va yana shunga o'xshash o'zbek xalqiga xos samimiy tuyg'ular, yuksak axloqiy fazilatlarga nisbatan qo'llanilsa-ku, mayli...Ammo, “tanish-bilishchilik”, “o'zibo'larchilik”, “poraxo'rlik”, “qog'ozbozlik”, “beparvolik” kabi illatlarga ham yuqoridagi so'z bilan nisbat berilishini hazm qilolmayman. Aynan  mana shu illatlar har qanday soha, shu jumladan futbolning ham eng ashaddiy dushmanlari. Ishonmaysizmi? Keling, unda ishontirishga harakat qilaman:
*** 2014 yilda Latviya politsiyasi hamda mamlakat Futbol Federatsiyasi hamkorligida o'tkazilgan reydlardan keyin mahalliy "Daugava" klubi (bir paytlar bu jamoada Andrey Akopyants o'ynardi) murabbiyi Ivan Tabanov va klubning eng yaxshi to'purari, milliy terma  jamoa a'zosi Evgeniy Kosmachev kelishilgan o'yinlarda qatnashgani uchun qamoqqa olingan.
2002 yilgi Jahon chempionatida Xitoy darvozasini qo'riqlagan Tszyan Tszin, keyinroq aynan noqonuniy o'yinlardagi ishtiroki uchun 5,5 yilga ozodlikdan mahrum qilingan. Umuman, bunaqa misollar qalashib yotibdi.
Xo'sh, bizda kelishilgan o'yinlar bilan qanday kurashiladi. Be, biznikilar kurashsin-da! Ana, hali Jahon tajribasida uchramaydigan noyob milliy model — “Kelishilgan o'yinlarga qarshi kurash” Qo'mitasi tashkil etilgan. Yaqinda bir murabbiyni “kelishib qo'ygani” uchun 3-4 oyga malaka oshirishga..., e, tfu, futbol doirasidan tashqariga chiqarib tashlashgan edi. Bundan tashqari, yana bittasini, ya'ni o'sha “kelishuvchi”ning sherigini jazolashga omma oldida va'da berishgan...Shunaqa! O'zbekchilik ketmaydi. O'rgan student!
*** Jahon futbolida messilarni qidirib yurishadi, iqtidor chalajon bo'lsa “tiriltiradi”, oq yuvib, oq taraydi. Kamiga ota-onasidan tortib etti avlodigacha pul beradi. Bizda esa...bo'lajak ronaldularning “boyvuchcha” otalari cho'ntagidan pul chiqarib, klublarning ketidan chopib yurishadi (yoki aksincha). Qurbi etmay iste'dodi qo'yni terisiga singib ketganlar qancha...
***  “Old trafford” yoki “Enfild” muxlislar hayqirig'idan larzaga keladi. “You are never walk alone” deya qo'shiqlar kuylashadi...Umuman, futbol — haqiqiy bayramga aylanadi. Bizdagi manzara esa quyidagicha: atrofini pista-po'chog'iga to'ldirib tashlagan 50-60 tacha odam, shulardan 5-6 tasini kollej yoki litseydan chaqirilgan  yollanma “barabanchi”, chamasi 6-10 tasini uyidan sazoyi qilingan boshi ochiqlar, yana 50 foizini oftobda qoraygan mirshablar tashkil etadi...Chalg'ib ketdim, shunda qancha haqiqiy muxlis qoldi?!
*** Katta maqsadli jamoalarning 4-5 yil oldin o'rtoqlik uchrashuvlari o'tkazadigan raqiblari nomi, o'yinlar sanasi va yana hokazolar aniq bo'ladi. Bizga esa reja-pejaning keragi yo'q. Shartta ikkiga bo'linib, “oq-terakmi ko'k-terak”ni boshlavoramiz. Demak maqsadimiz aniq!
*** Angliya terma jamoasiga Roy Xojson bosh murabbiy etib tayinlanganidan keyin 32 nafar futbolchi mamlakat bosh jamoasida debyut qilibdi. Bizda esa... Birinchidan, ja unaqa debyut qivoradigan futbolchining o'zi yo'q. Ikkinchidan, debyut qilishga arziydigan to'pteparlarni izlab ham o'tirishmaydi. Ana, “Paxtakor” bor-ku!
*** Bundan 2 yil avval Istanbulda “Galatasaroy” o'yiniga tushish uchun rosa xunob bo'lganman. U yoqqa chop, bu yoqqa yugur...(endi, shu, o'zimizdek deb o'ylaganman-da...). Keyin bilsam turklar allaqachon biletlarni internet orqali sotishni yo'lga qo'ygan ekan. Bizda esa...Tsss! Terma jamoalar markazining qulog'iga bu “yangilik” etib bormasin tag'in. Shundoq biznes-a!
*** Darvoqe, yana bir gap. Dunyo futbolida qalamtebratarlar, ya'ni jurnalistlarning nufuzi juda baland. Federatsiyalar “shu ovozing o'chgurlar” nima yozadi yoki ko'rsatadi ekan deb, bezillab turadi. Bizda esa jurnalistlar qalam emas, beshiktervatarga aylanib qolgan. To'g'rirog'i, aylantirib qo'yishgan.    Bargni ustiga chiqib olib, bilinar-bilinmas tebranib yotadi. Qani, boshini ko'tarib ko'rsinchi! Nima demoqchi ekanimni tushundingiz-a?
Aytgancha, bir paytlar "Yuventus" kelishilgan o'yinlarda ishtirok etgani uchun "B" seriyaga tushirib yuborilgan edi, bizda esa odamlarni kelishilgan o'yinlar borligini aytgani uchun "badarg'a" qilishadi...
*** Yana uyalmay Jahon chempionatini orzu qilamiz-a!
Tsss, men yozmadim, siz o'qimadingiz!
Nima qilay, o'zbekchilikda! Dilshod  NURULLOH
— deya xabar beradi uff.uz nashri.