«Barselona» hujumchisi Luis Suares nihoyat, diskvalifikatsiyasini o'tab, terma jamoaga qaytdi. 25 mart kuni Urugvay JCh-2018 saralash bahslari dorasida safarda Braziliya bilan uchrashib, aynan Suaresning goli evaziga durang qayd etdi.
Umuman olganda, Luis o'z terma jamoasining 16ta uchrashuvida maydonga tushmadi. U JCh-2014da Italiya termasi himoyachisi Jorjo Kellinini tishlab olganidan so'ng jazoga tortilgandi. Qolaversa, «Barselona»ga o'tganidan ke­yin dastlabki to'rt oyda klubiga yordam bera olmagandi. Shunga qaramay, Suares jamoaning asosiy o'yinchilaridan biriga aylanib, La-ligada to'purar bo'lib turibdi. Braziliyaga qarshi uchrashuvdan oldin u ESPN kanaliga Urugvay termasi va «Barselona»dagi xolati haqida gapirib o'tdi.
- Ayni paytda terma jamoamiz bir o'yinchiga bog'lanib qolmagan, tarkibda natijaga ta'sir o'tkaza oladigan bir qator futbolchilar bor. Bu esa meni biroz xotirjam qiladi va katta bosimni his qilmayman, -deb gap boshladi Suares.
- Termamiz Kopa Amerika turnirida haqiqiy kuchini namoyish etdi. Urugvay terma jamoasi Suaressiz hech nima emas, degan gaplarni eshitgan futbolchilar o'zlarini ko'rsatishga harakat qilishdi. Menimcha, bu narsa sardorimiz Diego Godindan boshlab, Edinson Kavanigacha yaxshi ta'sir o'tkazdi. Ular avvalo, bir jamoa ekanliklarini, muayyan o'yinchiga bog'lanib qolmaganliklarini isbotladilar. Men esa, umumiy muvaffaqiyatga oz bo'lsada hissamni qo'shaman, xolos.
Aytish joiz, Suares Urugvay terma jamoasi tarixidagi eng yaxshi to'purar hsoblanadi. Jamoa safida 2007 yilning fevralida deb-yut qilgan hujumchi 83ta uchrashuvda raqiblar darvozasini 45 marta aniq nishonga olgan.
- Futbol g'ildirakka o'xshaydi. U aylanib yuradi. Terma jamoadagi keyingi uchrashuvimni Braziliyada o'tkazaman. E'tiborli tomoni, oxirgi o'yinimni ham aynan shu mamlakatda o'tkazgandim. Bu men uchun o'ta muhim o'yin bo'ladi. Shunga qaramay, bosimni his qilmayapman.
Urugvay terma jamoasi bosh murabbiyi Oskar Tabares va jamoa hujumchisi Diego Forlanlar Suaresga bunchalik qattiq jazo tayinlashganini hamon anglay olishmaydi.
- Juda oshirib yuborishgan,-deydi Forlan. — Nima uchun u jamoa bilan mashg'ulot o'tkazmasligi va stadionga bormasligini tushuna olmayman.
Tabares esa Angliya OAVlarini tanqid qildi.
- Bu jazo o'ta qattiq edi. Diskvalifikatsiyaning maqsadi «qonxo'r» OAVlarning nafsini qondirishga o'xshaydi. Ular o'sha uchrashuvdan so'ng xuddi urush boshlangandek vahima solib yuborishdi. Ayrim jurnalistlar esa bor e'tiborlarini Kellini bilan bo'lgan holatga qaratishdi,-deydi Tabares. — O'sha jurnalistlarning millati qandayligini bilmadimu, ammo faqat ingliz tilida yozishgandi.
- 2030 yilgi jahon chempionati Urugvay va Argentinada o'tkazilishi mumkin...  Bu mamlakatlar birlashib shu ishni amalga oshirishsa, ajoyib bo'lardi. Chunki Urugvay mundialni o'zi yolg'iz o'tkazishga qodirmas.
Suares «Barselona»dagi birinchi mavsumidayoq «trebl» qayd etdi. Joriy mavsumda esa urugvaylik futbolchi 47ta uchrashuvda 46ta gol urdi. Uning maqsadi - o'tgan yilgi natijani takrorlash. Uning aytishicha, hujumdagi Janubiy amerikalik jamoadoshlari bilan munosabatlarining yaxshiligi «Barselona»ning muvaffaqiyatlarida qo'l kelayotgan ekan.
- Chaqchaqlashishimiz uchun doimo asos bor,-deydi Suares. — Neymar juda xushchaqchaq inson. U o'z hayotidan juda mamnun. Leo ham shunday. Odamlar uning qandayligini tubdan bilishmaydi. Lekin Messi ajoyib inson. Har kun birgalikda o'ynash bizga yoqadi. Shuningdek, natijadan ham qoniqyapmiz...
Davomi InterFUTBOL gazetasi blogida.
— deya xabar beradi uff.uz nashri.