Xabaringiz bor, “Lokomotiv” Osiyo Chempionlar Ligasi 4-tur uchrashuvlari doirasida Eronning “Sepaxon” klubiga qarshi bahs olib bordi. Hamyurtimiz Fozil Musaev o'ynayotgan mazkur klubga qarshi o'yinda “temiryo'lchilar” 1:0 hisobida g'alaba qozonishdi.
“Lokomotiv”ning umidli yarim himoyachisi Quvondiq Ro'zievning mazkur o'yin va endilikdagi guruhdagi vaziyat bilan bog'liq fikrlari bilan qiziqdik.
- To'g'risini aytadigan bo'lsam, o'yin biz uchun ham biroz qiyin kechdi. Boisi bizda biroz bo'lsa-da bosim bor edi. Jamoamizdan bu o'yinda faqat va faqat g'alaba qozonish talab etilardi. Shukr, buni uddalay oldik.
Shu o'rinda ta'kidlashim joizki, raqib jamoa ham yaxshi o'yin namoyish etdi. Chunki “Sepaxon”ga ham bu bahsda faqat g'alaba zarur edi. Shu sababli Fozil Musaevning jamoadoshlari ham qo'ldan kelgancha yaxshi o'yin ko'rsatishga urinishdi. Ammo yakunda biz zafar quchdik. Bizga chiroyli o'yindan ko'ra 3 ochko muhimroq edi.
Endi oldinda bizni “Al Nasr”ga qarshi yanada muhim bellashuv kutib turibdi. Bu o'yin shubxasiz, guruhdagi eng hal qiluvchi o'yinlardan biri bo'ladi. Chunki “Al Nasr” ham juda kuchli jamoa, tarkibida taniqli legionerlari ham bor. Ammo biz raqibdan cho'chimaymiz va ushbu uchrashuvga jiddiy hozirlik ko'ramiz. “Al Nasr”ni ham mag'lub etishga harakat qilamiz, - deydi Quvondiq Ro'ziev SPORTS.uz nashriga.
Davomi Sports.Uz blogida.
— deya xabar beradi uff.uz nashri.