Oliy liganing navbatdagi turida atigi 14ta gol urilgani o'yinlarning u qadar sermahsul kechmaganidan dalolat. Shunga qaramay, ayrim uchrashuvlarda keskinlik kuzatildi, futbolchilarda g'alabaga bo'lgan ishtiyoq sezilib turdi. Tabiiyki, jamoalar safida boshqalardan alohida ajralib turgan o'yinchilar ham uchradi. 3-tur ramziy terma jamoasini tuzishda aynan shu nomlarga murojaat etdik.
Darvozabon:
Muhiddin Xudoyorov («Buxoro»)
Amaldagi chempionga qarshi bahsda buxoroliklar posboni ajoyib o'yin ko'rsatdi. «Sherlar» tomonidan uyushtirilgan xavfli hujumlar vaqtida ba'zan omad poytaxtliklardan yuz o'girgan bo'lsa, boshqa vaziyatlarda «Buxoro» joniga aynan Muhiddin Xudoyorov oro kirdi. Natijada, mahoratli kiper haqli ravishda mezbonlar safidagi eng yaxshi futbolchi, deb topildi.
Himoyachilar:
Akrom Komilov («Bunyodkor»)
Garchi «qaldirg'ochlar» o'z maydonlarida «Mash'al»ni enga olishmagan bo'lsada, shu kuni muborakliklar darvozasi oldida ko'plab xavfli vaziyatlarni yaratishdi. Oldingi chiziq vakillariga ko'maklashishni o'rinlatadigan Akrom Komilov esa himoyani unutmagan holda hujumlarga qo'shilib turdi. Xullas, yosh himoyachi shu kuni ancha faol ko'rindi.
Murod Xolmuhammedov («So'g'diyona»)
Jizzaxliklar Namangandan ochko olib qaytishni uddalashdi. «So'g'diyona» darvozasi daxlsizligining saqlab qolinishiga ko'p jihatdan Murod Xolmuhammedov ham katta hissa qo'shdi. Ayniqsa, Akmal Xolmurodov chetlatilgach, Jizzax klubining himoya chizig'i yanada qiyin ahvolda qoldi. Natijada, Xolmuhammedovdan yanada ko'proq ter to'kish talab etildi. Iste'dodli himoyachi esa murabbiy va ishqibozlar ishonchini oqladi.
Sherzod Fayziev («Lokomotiv»)
Nemanya Yanichich va Islom To'xtaxo'jaevlar jarohat olishgach, «Lokomotiv» markaziy himoyasi biroz zaiflashadigandek tuyulgandi. Ammo Sherzod Fayziev bu taxminlar noo'rin ekanligini isbotladi. «Neftchi»ga qarshi kechgan bahsda «temiryo'lchilar»ning nafaqat hujum, balki himoya chizig'idagilar ham ajoyib o'ynashdi. Bunda esa Fayzievning ulushi ham bor, albatta.
Shuhrat Muhammadiev («Nasaf»)
Qarshiliklar oliy liga debyutantini kichik hisobda engishdi. Asosiysi, shu kuni «Nasaf» futbolchilari ham hujumda, ham himoyada tartibli o'yin ko'rsatishdi. Ayniqsa, Shuhrat Muhammadiev mezbonlar safidagi eng faol o'yinchilardan biri bo'ldi.
Davomi InterFUTBOL gazetasi blogida.
— deya xabar beradi uff.uz nashri.