Yakuniga etgan haftada Evropada bir qator voqealar, rekordlar qayd etildi.  Biz haftaning eng muhim 10 voqeasini alohida tilga olib o'tishni joiz deb topdik.
 
1. Runi safardagi golsiz seriyasiga yakun yasadi
"Manchester Yunayted" hujumchisi Ueyn Runi  nihoyat o'zining  mehmondagi golsiz seriyasiga "Everton" jamoasi darbozasiga to'p kiritib barham berdi.   Runining mehmondagi golsiz seriyasi 1550 daqiqaga etgan edi.   "Qizil iblislar" sardori Premer ligada safar o'yinida oxirgi marta 2014-yilning noyabrida o'z nomini tabloga yozdirib qo'ygandi.
 
2. “Nasaf” o'z tarixida ilk bora O'zbekiston kubogini qo'lga kiritdi
Qarshining “Nasaf” jamoasi nihoyat 5-urinishida O'zbekiston kubogida g'olib bo'ldi.  “Ajdarlar” hal qiluvchi bellashuvda Toshkentning “Bunyodkor” jamoasi ustidan 2:1 hisobida zafar quchishdi.  Aytish joizki,  ushbu g'alabaga Qarshiliklar to'la haqli edilar.
 
3. “Bavariya”dan rekord
Myunxenning “Bavariya” jamoasi Bundesliganing 9-turida safarda Bremenning “Verder” jamoasi ustidan kichik 1: 0 hisobida g'alaba qozondi va Germaniya chempionatida yangi rekord o'rnatdi.  Gap shundaki,  Bundesligada hali hech qaysi jamoa chempionatning dastlabki 9 o'yinida g'alaba qozonmagan edi.  Gvardiola shogirdlari esa buning uddasidan chiqishdi.
 
4.  Kloppning debyuti omadli chiqmadi
“Liverpul”ning yang bosh murabbiyi Yurgen Klopp klubdagi debyutini omadli boshlay olmadi.  “Qizillar” Premer liganing 9-turida “Tottenxem” mehmoni bo'lib nursiz durangga imzo chekishdi.  Yurgen hali jamoasi bilan birga ko'p ishlar qilishiga to'g'ri keladi shekilli.
 
5.  Neymarning ilk “poker”i
“Barselona” hujumchisi Neymar Messining yo'qligidan unumli foydalanib,  jamoa  etakchisiga aylanmoqda.  Braziliyalik 23 yoshli hujumchi “Rayo Valekano”ga qarshi uchrashuvda Kataloniyaliklar tarkibida ilk bora bir o'yinda to'rtta golga mualliflik qildi.  Neymar oxirgi marta Braziliya terma jamoasi tarkibida Yaponiyaga qarshi bahsda “poker” qayd etgan edi.
 
6.  Sterling ishga kirishdi
Yozda katta umidlar bilan “Liverpul”dan sotib olingan Rahim Sterling “Manchester Siti”ga foyda keltira boshladi.  U “Bornmut”ga qarshi uchrashuvning birinchi taymidayoq uchta gol urib,  “shaharliklar” tarkibida APLda “xet-trik” qayd etgan ilk ingliz futbolchi bo'ldi.
 
7.  Xayr Raul
“Real” afsonasi Raul futbolchilik faoliyatini yakunlayotganini ta'kidladi.  Ispaniyalik 38 yoshli futbolchi yaqin yaqingacha 323 ta gol bilan “Real” tarixidagi eng sermahsul to'purar bo'lib kelayotagn edi.  Bu rekordni Ronaldu yangilaganidan xabaringiz bor.  “Real” - “Levante” uchrashuvida “Santyago Bernabeu” stadionida muxlislar afsonaga atab katta banner ko'tarib,  unga xurmat va ehtiromlarini bildirishdi.
 
8.  Levandovski to'xtadi
“Bavariya” hujumchisi Robert Levandovski yaqinda “Ginnesning rekordlar kitobi”ga kirganidan xabaringiz bor.  U o'zi maydonga tushgan oxirgi 6 o'yinda 15 ta gol urib,  Ronaldu va Messining “mazasini” qochirib qo'ygan edi.  Polshalik hujumchi “Verder”ga qarshi uchrashuvda super golli seriyasiga yakun yasadi.  Shunday bo'lsa ham u 12 ta gol urib Bundesliga to'purari bo'lib turibdi.  Ronaldu (6 gol) va Messi (3 gol) ikkalasi birgalikda Robertning 4 dan 3 goli bilan teng to'p kiritishgan.
 
9.  “Penta-trik”lar o'rnini “Poker”lar egallamoqda
Ushbu mavsumda Kuchli beshlikda “penta-trik”lar ketma-ketligi kuzatilgan bo'lsa endi navbat “poker”lar seriyasiga kelganga o'xshaydi.  O'tgan haftada Neymardan tashqari “Nyukasl” hujumchisi Veynaldum ham to'rtta gol kiritishga muvaffaq bo'ldi.  Demak Ispaniya va Angliya “penta-trik”dan keyin “poker”ni ham qayd etib berdi,  endi Bundesligadan javob kutamiz.  
Davomi Furqat Yusupov blogida.
— deya xabar beradi uff.uz nashri.