BAA shayxlari  «Manchester Siti»ni Evropa ChL chorak finalida ko'rish uchun naq 8 yil sabr qilishdi va bu vaqt oralig'ida 1 mlrd. evrodan ko'proq mablag' sarflashlariga to'g'ri keldi. Shundan kelib chiqib aytsak, «Manchester Siti» zamonamizning eng qimmatbaho futbol loyihasidir.
2008 yili yozning so'nggi kuni BAA sarmoya guruhi Angliya klubi aktsiyalari to'liq paketini sotib oldi. Shundan so'ng Manchesterning ikkinchi yarmi uchun futbolda mutlaqo yangi davr boshlandi — klubga pul daryo suvidek oqib keldi va «shaharliklar» APLning o'rtamiyona ishtirokchisidan etakchilaridan biriga aylanishdi. Biroq «Siti» ichki arenadagi ma'lum yutuqlarga qaramay, ChLda 1|8 finaldan yuqoriga hech chiqolmayotgandi. Mana, shayxlar klubi 15 mart kuni nihoyat, o'z tarixida ilk marta chorak final yo'llanmasini naqd qildi. Xo'sh, ko'raylikchi, arablar «Siti»ni sotib olganlaridan buyon milliard evroni qanday sarflashdi?
Mavsum-2008|2009
Asosiy transferlar:
Robino («Real») — 43 mln. evro
Jo (TsSKA) — 24 mln. evro
Nayjel de Yong («Gamburg») — 18 mln. evro
Kreyg Bellami («Vest Xem») — 15,5 mln. evro
Ueyn Brij («Chelsi») — 13,5 mln. evro
Shon Rayt-Fillips («Chelsi») — 11,25 mln. evro
Pablo Sabaleta («Espanol») —  8,7 mln. evro
Vensan Kompani («Gamburg») — 8,5 mln. evro
Jami: 157,4 mln. evro
Xalqaro maydondagi ishtirok: UEFA kubogida 1|4 final. Guruh bosqichi - 1-o'rin, 1|16 final - «Kopengagen» (2:2, 2:1), 1|8 final -  «Olborg» (2:0, 0:2, 4:3 - pen. bo'yicha), 1|4 final - «Gamburg» (1:3, 2:1)
«Manchester Siti» 2008 yili bahorda  mavsumni «Midlsbro»dan qabul qilingan 1:8 ko'rinishidagi xunuk mag'lubiyat bilan tugatdi, ammo «Halol o'yin» sovrinini  olib, UEFA kubogi yo'llanmasiga ega chiqdi. To'g'ri, «Siti» evrokubok o'yinlarida avvalgi mavsumni sust o'tkazgan tarkibga tayandi, hisob. Faqat, bitta jiddiy o'zgarish kuzatildi - Robino. Braziliyalik futbolchi Madrid osmonida oddiy yulduz bo'lishdan bosh tortib, Manchesterda yorqin nur sochishni ixtiyor etgandi. Mark Xyuz boshqargan o'sha «Siti» UEFA kubogida o'rtacha taassurot qoldirdi - yarim final yo'lida «Gamburg»ga bas kelolmadi. Muhimi, jamoa mavsum davomida ancha shakllandi. Deylik, himoyaning chap qanotida Ueyn Brij, o'ng tarafda Pablo Sabaleta, markazda esa Vensan Kompani muqim joy topdi. Aytgancha, hozirda ayrim muxlislar ularning oxirgisi sharafiga «Ittihod» arenasi oldida haykal o'rnatishni taklif qilishyapti. Tayanch hududida Nayjel de Yongning chakki o'ynamaganini ham aytish kerak. Ha, yana Robino yaxshi ko'rindi, faqat transfer summasini nazardan qochirsak...
Mavsum-2009|2010
Asosiy transferlar:
Emmanuel Adebayor («Arsenal») — 28 mln. evro
Karlos Teves («Vest Xem») — 28 mln. evro
Joleon Leskott («Everton») — 27,5 mln. evro
Roke Santa Krus («Blekbern») — 21,2 mln. evro
Kolo Ture («Arsenal») — 18,7 mln. evro
Garet Barri («Aston Villa») — 13,9 mln. evro
Jami: 147,3 mln. evro
Xalqaro maydondagi ishtirok: -
2010 yil bahorga kelib, «Manchester Siti» ChLga intila boshladi. Faqat, bu urinishi natija bermadi. Angliyaga ajratilgan to'rtinchi yo'llanma «Tottenxem»ga nasib etdi. E'tiborlisi, «taqachilar» chiptani aynan «Ko'k oy» maydonida rasmiylashtirishdi. «Siti» esa maqsadi ancha jiddiy ekanligini to'la isbotladi. Ya'ni bir qator bahslarda juda yorqin futbol namoyish etdi («MYu» maydonida 4:3 hisobida g'alaba qozondi, o'z uyida «Arsenal»ni ojiz qoldirdi - 4:2). Tarkibda eski qahramonlar - Robino va Bellami bilan birga yangilar - Adebayor hamda Teves ham o'z so'zlarini baralla ayta boshlashdi.
Mavsum-2010|2011
Asosiy transferlar:
Edin Jeko («Volfsburg») — 37 mln. evro
Yaya Ture («Barselona») — 30 mln. evro
Mario Balotelli («Inter») — 29,5 mln. evro
David Silva («Valensiya») — 28,75 mln. evro
Aleksandar Kolarov («Latsio») — 22,7 mln. evro
Jeyms Milner («Aston Villa») — 22 mln. evro
Jerom Boateng («Gamburg») — 12,5 mln. evro
Jami: 182,5 mln. evro
Xalqaro maydondagi ishtirok: ELda 1|8 final. Guruh bosqichi - 1-o'rin, 1|16 final - «Aris» (0:0, 3:0), 1|8 final - «Dinamo» K. (0:2, 1:0)
«Siti» transfer siyosatini nazorat qilish huquqini qo'lga olgan Roberto Manchinining urinishi munosib natija berdi - «shaharliklar» nihoyat, ChLga yo'l ochishdi. Boz ustiga, to'g'ridan-to'g'ri guruh bosqichiga. Jamoa APLning oxirgi turida «Arsenal»ni engib, 3-o'ringa joylashdi. O'sha vaqtdayoq hozirgi jamoa chizmasi yuzaga kela boshlagandi - Xart, Kompani va Sabaleta yoniga Kolarov, David Silva hamda Yaya Ture qo'shilishdi. Biroq «Siti» ELda aytarli karomat ko'rsatolmadi. Bunga hojat ham sezmadi, chog'i. Harqalay, Angliyada bu turnirni haligacha tan olishmagandek.
Davomi InterFUTBOL gazetasi blogida.
— deya xabar beradi uff.uz nashri.