12 aprel kuni Jahon Chempionati Osiyo mintaqasi saralash bosqichining 3-bosqichiga qur'a tashlanadi. Ishtirok etadigan jamoalar FIFA reytingi bo'yicha tartiblangan. Har bir savatchada ikkitadan jamoa bor va ikkisidan biri bizga qarshi o'ynaydi. Hozircha Saudiya Arabistoni bilan o'ynamasligimiz aniq, xolos.
Azaldan qur'aning ko'zini ko'r bo'ladi, deydilar. Lekin u bu safar ko'r bo'lmasligini, bizga ozgina rahmi kelishini istardik. Shundog'am kuchli jamoalar to'plangan bu izdihomda biroz bo'lsin engilroq raqiblar tushsa yaxshi-da, to'g'rimi?! Orzu deb ataysizmi, taxmin deysizmi, ishqilib, bizning guruhimiz quyidagicha ko'rinish olishini istardik.
1-raqib: AVSTRALIYa Yo ERON
Albatta, bu savatchada deyarli barcha Eron variantini tanlaydi. Eron kuchsizligidan emas, uning o'rnida Avstraliya bo'lish ehtimoli borligidan, albatta.
Eronliklar ayni paytda Osiyo mintaqasidagi reyting peshqadamlari. Oxirgi jahon chempionati ishtirokchilari. Ishtirok etganda ham chiroyli o'yinlari bilan yodda qolgan. Messi ham eslab qolgan bu yurt terma jamoasini. Ammo har qancha nomdor va reyting lideri bo'lmasin, Avstraliyadan ko'ra biz uchun qulayroq raqib. Qo'shilasiz-a?
Birinchidan, Eron bilan ko'p o'ynaganmiz. Gohida yutqazganmiz, gohida yutganmiz. Muhimi, bizga ular emas, ularga biz noqulay raqib bo'lib qoldik oxirgi paytlar. O'yin uslubimiz, klublarimiz o'rtasidagi o'xshashlik va boshqa ko'pgina jihatlarimiz yaqin ekanligidan ham xabaringiz bor. Nasib qilib bizning guruhga Eron terma jamoasi tushib qolsa, ikki yo'llanma uchun kurash kechishi turgan gap. Chunki uning teskarisi ro'y bersa, ya'ni Avstraliya bilan bir guruhdan o'rin olsak, faqat ikkinchi o'rin uchun kurashishimizga to'g'ri keladi. Tan olib qo'ya qolaylik.
Avstraliya bilan ko'p o'ynamaganmiz. O'ynagan bahslarimizda ham g'alaba nimaligini bilmaganmiz. Juda noqulay va o'yin uslubi mutlaqo o'zgacha raqib. Yo'l azobi – go'r azobi, degan maqol aynan shu yurt bilan tushib qolsak bot-bot eslanadi. Ishqilib, Avstraliya varianti narigi guruhdan joy olsinki, Rossiya yashil maydonlariga borish uchun imkoniyatlarimiz ko'paysin.
Yana bir gap. Bu, albatta, taxmin. Hozirgi siyosiy holatlardan kelib chiqib, saudlar o'ynaydigan guruhga Eronni tushirmasliklari ham ehtimoldan uzoq emas. Boya aytdik-ku, bu gal qur'a ko'r bo'lmasligi mumkin.
2-raqib: J.KOREYa Yo YaPONIYa!
Bu savatchada ham ko'pchilikning fikri bir xil bo'lsa kerak. Yaponiya varianti hech kimga yoqmayapti. To'g'ri, Janubiy Koreya ham aslida juda qulay raqib sanalmaydi. Biroq, uning o'rnida yaponlar tursa, ilojsiz holda koreyslarni tanlaymiz-da.
Janubiy Koreya nimasi bilan bizga qulayroq? Bu yurt terma jamoasi oxirgi payt u qadar fantastik o'yin ko'rsatmayapti. Hatto o'tgan yilning boshidagi Osiyo chempionatida ham finalga etib bormasliklari mumkin edi. Lutfulloning zarbasi golga aylansa kifoya edi. Tamom. Janubiy Koreya etib kelgan edi manzilga. Biroq, bo'limlarning so'nggi soniyalarida koreyslar o'z ishlarini qilib ketishdi va finaldagi qahramonliklari sari yo'l oldilar.
Umuman olganda, baribir biz so'nggi yillarda bugungi Janubiy Koreyadan u qadar cho'chimayapmiz. Oldingi saralashda ham tengma-teng o'ynaganimiz yodingizdan chiqmagan. Turgan gap. Bu safar Lutfullo emas, Akmalning zarbasi noaniq ketsa bo'ldi edi, raqiblarimiz etib kelishgan edi. Ammo taqdir ekan, o'sha  aniq zarba terma jamoamiz yo'llariga to'g'anoq bo'ldi. Ko'ryapsizmi, qandaydir aniq va noaniq zarbalar qurboniga aylanib yuribmiz ular bilan. Endi esa o'sha alamni oladigan vaqt keldi. Ikkinchi bosqichdagi Koreyani ko'rdik. Yangilangan avlodi u qadar kuchli emas. Nomdorlik e'tibori bilan ham. Hatto Livan ham tengma-teng o'ynab, bu jamoaning bo'y-bastini ko'rsatib berdi.
Yaponiya esa aksincha. Biz uchun juda noqulay va kuchli raqib. Tarkib juda kuchli. Tartib ham zo'r. Yaponiyaning qo'rqinchlik tomoni shundaki, kunchiqar yurt oxirgi bosqichda haddan tashqari kuchli futbol ko'rsatadi. JCh yo'llanmasini oxirgi turlarga qoldirib o'tirmaydi. Shu jihatdan yaponlar Avtstraliyaga o'xshaydilar. Ular o'ynaydigan guruhdagi kurash asosan ikkinchi o'rin uchun kechadi. Xullas, qur'ada J.Koreya sharchasi biz tomonda chiqishini istaymiz.
3-raqib: BAA Yo XITOY
Mana shu joyga kelganda, fikrlarimiz turfa tomonlarga yo'l olishi mumkin. Sababi, bu savatchadagi raqiblar aslida o'zimiz qatori, hatto bizdan pastdagi terma jamoalardir. Lekin pastroqda ham bizga qulayrog'i tushgani ma'qul-da, nima dedingiz?
Fikrlarimiz nega turfa xil, bilasizmi? Bunga sabab - Xitoy! Ushbu diyorda futbolga bo'lgan munosabat kundan kunga odamni qo'rqitib yuboryapti. Jahon yulduzlarini cho'ntagiga qaramasdan sotib olayotgan investorlar, Xitoy chempionatini ancha kuchaytirib yuborishdi. Bu kuchayish terma jamoaga hozircha jiddiy ta'sirini o'tkazmagandir, biroq, baribir kimdirni cho'chitmoqda. Buning ustiga, xitoyliklar ikkinchi bosqichning so'nggi turlarida yomon taassurot qoldirishmadi. Xullas, Xitoy varianti aynan shu tomoni bilan biroz tahlikali tuyuladi. Ammo shaxsan menga BAA varianti yoqimsizroq baribir.
Xitoyda terma jamoa katta ko'lamdagi ishlar samarasi o'laroq oz-moz siljiyotgan bo'lsa, Amirliklarda esa bir necha yildan beri o'ynab kelayotgan tartibli va shakllangan tarkib bor. Oltin avlod bor. Olimpiyachilarimizni dog'da qoldirgan o'sha mashhur yigitlarga qurilgan bugungi jamoa.
Tasko de La Arbinya boshchilidagi BAA o'tgan yilgi Osiyo kubogida ham juda yaxshi o'yin ko'rsatdi. Chorak finalda Yaponiyani musobaqadan chiqarib yuborib, qit'ada o'z o'rni borligini va bu o'rin anchayin yuqoriligini namoyish etgandi.
Nima deysiz, uzoq yillardan beri bir jamoa sifatida shakllanib kelayotgan yaxlit jamoa qulaymi yo sochqidek sochilayotgan pullar ostida futboli rivojlanishni boshlagan mamlakat termasimi? Men uchun hozircha BAA kuchliroq ko'rinyapti. Xitoyni tanlagim kelyapti.
4-raqib: QATAR Yo IROQ
Olimpiada yo'llanmasi uchun kurashgan bu ikki yurtdan, albatta, kuchsizi tushsa ma'qulroq, deyishingiz mumkin. Lekin bu savatchada ham turfa xillilik ko'zga tashlanmoqda. Kimdir arabcha o'yindan qochib borayotgan, asosan ispan mutaxassislari bilan ishlayotgan Qatarni xush ko'rmasa, kimgadir istalgan raqib bilan irodali futbol ko'rsatadigan, maydonning har bir qarichida shiddatli kurashadigan va hatto nofutbolcha yo'llar bilan bo'lsa ham tortishadigan Iroq varianti yoqmayapti. Tanlash mushkul biroz.
Ammo o'ynalgan bahslardan xulosa chiqarsak, bizga baribir Qatar ma'qulroqdek ko'rinadi.  Qatarliklar ko'pgina arab jamoalaridan farqli ravishda toza o'ynashadi futbolni. To'g'ri, ularning o'yindan oldin “kelishadigan” odatlari ham yo'q emas, ammo qatarliklarning maydondagi holati bizning terma jamoaga anchayin mos tushadi. Vatandoshlarimiz Qatarga qarshi yaxshi o'ynashadi. Iroq variantidan ko'ra Qatarni tanlaymiz.
5-raqib: SURIYa Yo TAILAND
Bu savatchadan Suriyani tanlardik. Ikkita sababi bor buning.
Birinchisi, Suriyada notinch vaziyat hukmronlik qilmoqda. Demakki, bu yurt ishtirokidagi o'yinlarning aksari neytral maydonda o'tkaziladi. Mehmonda vaziyatlar tenglashadi demak. O'ylashimizcha, suriyaliklar bugungi kunda Iroq singari musibati tufayli kuchayadigan salohiyatga ega emaslar, balki Yamanga o'xshab o'z imkoniyatlari darajasida ham o'ynay olmasalar kerak.
Ikkinchidan, Tailand futboli rivojlanmoqda. Umuman bu mamlakatda futbolga bo'lgan munosabat o'zgargan. Bir paytlari “Bek Tero Sasana” jamoasi finalga chiqsa ham, futbol bilan oshino bo'la olmagan millat hozircha terma jamoa o'yinlariga tashrif buyurmoqda. Tailandlik futbolchilar ham ikkinchi bosqichda chiroyli o'yin ko'rsatishdi. Biz bu yurtdan u qadar qo'rqmaymizu, ammo Suriya variantining oldida turganida, uni tanlamaymiz baribir. Bu savatchadagi tanlovimiz – Suriya!
Yana bir muhim gap. Ushbu savatchadagi jamoa bizga shu qadar ardoqliki, uni aniqlashimiz bilanoq, Toshkentda o'tadigan ilk o'yinimizdagi raqib ma'lum bo'ladi.  Qur'a hali o'tmasidanoq bizga yon bosyapti, sezyapsizmi??? Xayrulla Hamidov
— deya xabar beradi uff.uz nashri.